ដោយសារតែភ្លៀងធ្លាក់មកជាប់ៗគ្នាបរិវេណប្រាសាទនៅខេត្តសៀមរាប ត្រូវបានអាជ្ញាធរជាតិអប្សារា អះអាងថា បានជួបបញ្ហាទឹកដក់នៅបរិវេណប្រាសាទមួយចំនួន ។ អាជ្ញាធរជាតិអប្សារា បានអោយដឹង នៅថ្ងៃទី១៥ ខែតុលា តាមហ្វេសប៊ុកផេកថា…
ដោយសារតែភ្លៀងធ្លាក់មកជាប់ៗគ្នាបរិវេណប្រាសាទនៅខេត្តសៀមរាប ត្រូវបានអាជ្ញាធរជាតិអប្សារា អះអាងថា បានជួបបញ្ហាទឹកដក់នៅបរិវេណប្រាសាទមួយចំនួន ។
អាជ្ញាធរជាតិអប្សារា បានអោយដឹង នៅថ្ងៃទី១៥ ខែតុលា តាមហ្វេសប៊ុកផេកថា ទឹកដក់នៅបរិវេណប្រាសាទទាំងនោះ គឺដោយសារតែទីតាំងប្រាសាទទាំងនោះពុំមានលូបង្ហូរទឹកគ្រប់គ្រាន់ ឬលូបង្ហូរទឹកមានមាត់តូចជាដើម ។
ប្រភពដដែលបានបន្តថា ដើម្បីសម្រួលកិច្ចការងារ ឬរំដោះទឹកឱ្យបានទាន់ពេលវេលា ក្រុមភ្នាក់ងារទេសចរណ៍ប្រចាំតាមគោលដៅប្រាសាទនានា បានរួមចំណែកយ៉ាងសំខាន់ក្នុងកិច្ចការងារមួយនេះ និងយកចិត្តទុកដាក់លើសុវត្ថិភាពភ្ញៀវទេសចរ បង្ការពីគ្រោះថ្នាក់ ឬហានិភ័យនានា ។
លោក ស៊ុន កែវភក្តី ប្រធានក្រុមភ្នាក់ងារទេសចរណ៍ប្រចាំប្រាសាទតាព្រហ្ម បានឱ្យដឹងថា ជារឿយៗអំឡុងពេលមានភ្លៀងធ្លាក់ខ្លាំងម្តងៗបរិវេណប្រាសាទតាព្រហ្ម ដែលផ្នែកខាងក្នុងរៀងទំនាបតែងមានទឹកដក់ តួយ៉ាងនៅជ្រុងខាងត្បូងនៃសាលរបាំជាដើម ។
លោកបានបញ្ជាក់ថា លោកតែងដឹកនាំក្រុមការងារ ដើម្បីកាយធ្វើចង្អូររំដោះទឹក ឬកាយយកកម្ទេចដី ឬរុក្ខជាតិតូចនៅតាមមាត់លូ ដើម្បីឱ្យទឹកហូរបានលឿនសម្រួលដល់ការដើរទស្សនារបស់ភ្ញៀវទេសចរឡើងវិញ ។
មន្ត្រីដដែលបានបញ្ជាក់ថា ក្រៅពីបរិវេណខាងក្រៅនៅក្នុងប្រាសាទមួយចំនួនក៏មានទឹកដក់រយៈពេលខ្លីដែរ ដោយក្នុងនោះក្រុមការងារទេសចរបានព្យាយាមយកសម្ភារផ្សេងៗ ដើម្បីដួស ឬសាចទឹកចេញពីផ្លូវដើររបស់ភ្ញៀវទេសចរ ។
បន្ថែមពីនេះ ប្រធានក្រុមភ្នាក់ងារទេសចរណ៍ក៏បានសំណូមពរដល់ភ្ញៀវទេសចរទាំងអស់ ដែលមកកម្សាន្តប្រាសាទតាព្រហ្ម និងប្រាសាទផ្សេងៗ ត្រូវមានការប្រុងប្រយ័ត្ន ដូចជា មិនត្រូវដើរនៅកន្លែងមានទឹកដក់ កន្លែងសើម បង្ការក្រែងរអិល និងមិនត្រូវចូលទស្សនាទីតាំងដែលបានដាក់ស្លាកសញ្ញា «ហាមចូល» ជាដាច់ខាត ដែលជាទីតាំងមានហានិភ័យ ៕
ចែករំលែកព័តមាននេះ