ខេត្តតាកែវ ៖ គួរឲ្យអាណោចអាធម៌ណាស់ កុមារា កុមារី២នាក់ បងប្អូនបង្កើតបានស្លា.ប់ក្នុងអណ្តាតភ្លើង ដោយមូលហេតុឆ្លងចរន្តអគ្គីសនី ខណៈអាណាព្យាបាលមិននៅ ដែលហេតុនោះបានកើតឡើងកាលពីមោង៨ និង៣០នាទីយប់…
ខេត្តតាកែវ ៖ គួរឲ្យអាណោចអាធម៌ណាស់ កុមារា កុមារី២នាក់ បងប្អូនបង្កើតបានស្លា.ប់ក្នុងអណ្តាតភ្លើង ដោយមូលហេតុឆ្លងចរន្តអគ្គីសនី ខណៈអាណាព្យាបាលមិននៅ ដែលហេតុនោះបានកើតឡើងកាលពីមោង៨ និង៣០នាទីយប់ ថ្ងៃទី១៤ ខែតុលា ឆ្នាំ២០២៥ ស្ថិតនៅភូមិកណ្ដោល ឃុំពត់សរ ស្រុកបាទី ខេត្តតាកែវ ។
កុមាររងគ្រោះ២នាក់មានម្នាក់ឈ្មោះ ទូច ចាន់ដារ៉ា ភេទប្រុស អាយុ០៦ឆ្នាំ និងម្នាក់ឈ្មោះ ទូច ចាន់ណារី ភេទស្រី អាយុ០៣ ឆ្នាំ (បងប្អូនបង្កើត) ។
តាមការបំភ្លើពីសាក្សីឈ្មោះ ហ៊ុន ហុកលី ភេទប្រុស អាយុ ២៥ឆ្នាំ ត្រូវជាប្អូនរបស់ម្ចាស់ផ្ទះបាននិយាយថា ដំបូងគាត់បានចុះនោមរួចក៏ឡើងលើផ្ទះវិញ ហើយបានចុចទូរស័ព្ទលេង ស្រាប់តែលឺសូរផ្ទុះផេះៗ នៅលើផ្ទះបងរបស់គាត់ ។
បន្តិចក្រោយមកក៏ឮសូរផ្ទុះខ្លាំង គាត់បានស្ទុះចេញទៅមើលក៏ឃើញភ្លើងឆេះខ្លាំង និងឮសូរសំឡេងក្មួយគាត់ស្រែកនៅលើផ្ទះកំពុងឆេះឲ្យគេជួយ ។ ពេលឃើញដូចនោះគាត់ក៏បានយកភួយជ្រលក់ទឹកបម្រុងចូលជួយសង្គ្រោះក្មួយ ប៉ុន្តែភ្លើងឆេះខ្លាំងពេកទើបចូលមិនបានបាន ត្រឹមយកទឹកជះលើភ្លើងរួមជាមួយអ្នកជិតខាង ខណៈពេលភ្លើងរលត់ក្មួយប្រុសស្រី២នាក់ បងប្អូនបង្កើតរបស់គាត់បានឆេះក្លាយទៅជាស.ពយ៉ាងអាណោចអាធម៌បាត់ទៅហើយ ។
តាមស្ដាប់ការបំភ្លឺពីឈ្មោះ ឯក ងួន ជាមេភូមិកណ្ដោលបានឱ្យដឹងថា ផ្ទះដែលអគ្គីភ័យឆេះនោះ គឺជាកូនផ្ទះសង់ពីឈើ ប្រកស័ង្កសីមានទំហំ៣×៤ ម៉ែត្រនៅផ្ទាល់ដីម្ចាស់ផ្ទះឈ្មោះ បាន ទូច និងប្រពន្ធឈ្មោះ ហ៊ុន ម៉េងហួយ ស្ថិតនៅភូមិកណ្ដោល ឃុំពត់សរ ស្រុកបាទី ខេត្តតាកែវ ។ ផ្ទះនេះ បានតខ្សែភ្លើងប្រើប្រាស់រាល់ថ្ងៃចេញពីផ្ទះឪពុក ដោយជីវភាពរស់មានស្ថានភាពខ្វះខាត ប្តីប្រពន្ធ២ នាក់ ជាមេគ្រួសារ ភាគច្រើនមិនសូវបាននៅជាប់លាប់ទេ រវល់ចេញដើររកការងារធ្វើបាត់ៗពីផ្ទះ ទុកកូនឲ្យនៅ២នាក់បងប្អូន ។
ក្រោយកើតហេតុសមត្ថកិច្ចនគរបាល និងអាជ្ញាមូលដ្ឋានបានចុះទៅដល់ ដោយបានបង្កើតគណៈកម្មការពិនិត្យ និងធ្វើកោសវិច្ច័យលើសាកសព ហើយបានធ្វើការសន្និដ្ឋានជំហ៊ានដំបូងថា កុមារ២នាក់បងប្អូនស្លា.ប់ដោយសារការឈ្លក់ផ្សែងភ្លើង បណ្តាលមកពីអគ្គិភ័យឆេះផ្ទះនោះពិតប្រាកដមែន ។ សពត្រូវបានប្រគល់ឲ្យឪពុកម្តាយ ធ្វើបុណ្យតាមប្រពៃណី ៕
ចែករំលែកព័តមាននេះ