ខេត្តកំពង់ឆ្នាំង ៖ កំណាត់ផ្លូវចេញពីភូមិឈើត្រាច ទៅភូមិកងមាស ឃុំគោកបន្ទាយ ស្រុករលាប្អៀរ បាទក្លាយទៅជាកន្លែងទេសចរណ៍ដ៍ទាក់ទាញ ដែលមានភ្ញៀវទៅលេងកំសាន្តយ៉ាងច្រើនកុះករ ក្នុងពេលខែទឹកឡើងនៅឆ្នាំ ២០២៥…
ខេត្តកំពង់ឆ្នាំង ៖ កំណាត់ផ្លូវចេញពីភូមិឈើត្រាច ទៅភូមិកងមាស ឃុំគោកបន្ទាយ ស្រុករលាប្អៀរ បាទក្លាយទៅជាកន្លែងទេសចរណ៍ដ៍ទាក់ទាញ ដែលមានភ្ញៀវទៅលេងកំសាន្តយ៉ាងច្រើនកុះករ ក្នុងពេលខែទឹកឡើងនៅឆ្នាំ ២០២៥ បន្ទាប់ពីកំណាត់ផ្លូវនេះត្រូវបានកសាងជាផ្លូវកៅស៊ូនិងផ្លូវបេតុងដោយកន្លែង ។ ជាក់ស្ដែងនៅថ្ងៃអាទិត្យ ទី១២ ខែតុលា ឆ្នាំ២០២៥ ម្សិលមិញនេះ ប្រជាពលរដ្ឋក្មេងចាស់ប្រុសស្រីជាច្រើនពាន់នាក់បាននាំគ្នាសម្រុកទៅលេងកម្សាន្តលើកំណាត់ផ្លូវកៅស៊ូ ដែលលិចដោយទឹកជំនន់ ។
ក្នុងស្ថានភាពមនុស្សយ៉ាងច្រើនកុះករ បាននាំគ្នាអង្គុយតាមទីគោក ខ្លះក្នុងទឹក ខ្លះច្រៀង ខ្លះរាំលេងកំសាន្ត ខ្លះទៀតជិះទូក ដើម្បីទស្សនាមនុស្សម្នាយ៉ាងច្រើនកុះករបែបនេះ ។នៅលើកំណាត់ផ្លូវកៅស៊ូដែលលិចទឹក ត្រឹមស្មងជើង ខ្លះចតរថយន្ត ចតគោយន្ត អែបម្ខាងផ្លូវ ដាក់ម្ហូបអាហារនិងនិងភេសជ្ជៈ ឈរពិសាក្នុងទឹក លេងសប្បាយ ជាមួយហ្វូងមនុស្ស យ៉ាងប្រជ្រៀតគ្នានេះដែរ ។សំឡេងធុងបាស យ៉ាងកងរំពង ដែលគ្រប់គ្នាចាក់ ស្ដាប់ និងរាំកំសាន្ត រៀងៗខ្លួន លាយដោយសំឡេងម៉ាស៊ីនកាណូត បើកចុះឡើង និងសំឡេងមនុស្ស បានញ៉ាំងឱ្យបរិយាកាសមានសំឡេងទ្រហឹងអឺងអាប់ ។ អ្វីដែលចាប់អារម្មណ៍នោះគឺទីនេះកាលដើមឡើយពុំដែលមានមនុស្សមកអង្គុយលេងទស្សនានោះទេ គ្រាន់តែជាផ្លូវក្រាលគ្រួសក្រហមធម្មតាប៉ុណ្ណោះ ។ប៉ុន្តែបន្ទាប់ពីកណាត់ផ្លូវនេះក្លាយជាផ្លូវក្រាលកៅស៊ូ និងបេតុង គួបផ្សុះលិចទឹកដោយជំនន់ស្រាប់តែប្រែក្លាយជាតំបន់ទេសចរណ៍យ៉ាងទាក់ទាញ់ទៅវិញ ។
លោក យឹម យ៉ុន មេឃុំគោកបន្ទាយ ស្រុករលាប្អៀរ បានបញ្ជាក់តាមទូរសព្ទនៅព្រឹកថ្ងៃទី ១៣ ខែតុលានេះថា ក្រោយពីមានបងប្អូនទៅលេងកំសាន្តនៅលើផ្លូវការកៅស៊ូដែលលិចទឹកពីភូមិឈើត្រាចទៅភូមិកងមាស រយៈការកន្លងមកនេះ ពិសេសដូចថ្ងៃអាទិត្យម្សិលមិញនេះ ខាងឃុំសហការជាមួយបណ្ដាភូមិ បានរៀបចំកន្លែង ឱ្យមានផ្ញើម៉ូតូ រៀបចំសណ្ដាប់ធ្នាប់ ដោយសហការជាមួយកម្លាំងនគរបាលប៉ុស្តិ៍រដ្ឋបាលឃុំកម្លាំងប្រជាការពារ ដើម្បីការពារថែរក្សាសន្តិសុខជូនពួកគាត់ ។ជាមួយគ្នានេះក៏មានដាក់សំឡេងឧឃោសនស័ព្ទ ចាក់ណែនាំដល់ពួកគាត់មកលេងកម្សាន្តសូមប្រុងប្រយ័ត្ន បញ្ហាគ្រោះថ្នាក់ដោយសារការលង់ទឹក បញ្ហាបាត់បង់សម្ភារៈផ្ទាល់ខ្លួនដូចជាគ្រឿងអលង្ការនិងយានជំនិះ និងការបើកបរកាណូតសូមកុំបើកលឿនពេកជាដើម។
លោកមេឃុំបានរំលឹកថា កាលដើមឡើយផ្លូវចេញពីភូមិឈើត្រាចទៅភូមិកងមាសគឺជាផ្លូវដីក្រហមដែលលិចទឹក មានប្រវែងជា១៣គីឡូម៉ែត្រ ។ក្រោយបានសាងសង់របស់ក្រសួងអភិវឌ្ឍន៍ជនបទ ដែលកសាងបានប្រវែងជាង២គីឡូម៉ែត្រជាផ្លូវការកៅស៊ូនិងបេតុងដោយកន្លែង ។ប៉ុន្តែឆ្នាំនេះទឹកធំ ធ្វើឱ្យកំណត់ផ្លូវនៅចំណុចកាលកៅស៊ូ និងបេតុងនោះលិចទឹក ដែលធ្វើឲ្យបងប្អូនចូលចិត្តនាំគ្នាទៅលេងកំសាន្តចាប់តាំងពីថ្ងៃដំបូងរហូតមកដល់ពេលនេះមាន មនុស្សកាន់តែច្រើនមកលេងកម្សាន្ត ដែលធ្វើឲ្យខាងរដ្ឋបាលឃុំគោកបន្ទាយរៀបចំសណ្តាប់ធ្នាប់សាធារណៈជូនពួកគាត់។ ហើយការមកលេងរបស់របស់បងប្អូន ប្រជាពលរដ្ឋដ៏ច្រើនបែបនេះធ្វើឲ្យអ្នកភូមិនៅតំបន់នោះអាចឆ្លៀតប្រកបមុខរបរលក់ដូរដើម្បីជីវភាពគ្រួសារពួកគាត់បានខ្លះៗដែរ៕
ចែករំលែកព័តមាននេះ