ទីក្រុងញូយ៉ក៖ ក្រុមប្រឹក្សាសន្តិសុខអង្គការសហប្រជាជាតិបារម្ភចំពោះភាពតានតឹងរវាងអាមេរិក និងវេណេហ្ស៊ូអេឡា។ រុស្ស៊ីចោទប្រកាន់ថាទីក្រុងវ៉ាស៊ីនតោនប្រើប្រាស់យុទ្ធសាស្ត្រវាយប្រហារបែបពួកខូវប៊យនៅក្នុងការតាមប្រមាញទូកដែលសង្ស័យដឹកគ្រឿងញៀន។ ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិ លោកវ៉ាស៊ីលី នេបឹនហ្សៀ (Vassily Nebenzia) ថ្លែងថាវេណេហ្ស៊ូអេឡាមានហេតុផលគ្រប់គ្រាន់ដើម្បីជឿជាក់ថាអាមេរិកពីមុនគ្រាន់តែគំរាមទេ ប៉ុន្តែចុងក្រោយនេះប្រុងវាយប្រហារវេណេហ្ស៊ូអេឡាមែនទែនហើយ។
ប្រទេសមួយចំនួនរួមទាំងសម្ព័ន្ធមិត្តរបស់អាមេរិកផងដែរដូចជាបារាំង ក្រិច និងដាណឺម៉ាកបានអំពាវនាវឱ្យបន្ធូរបន្ថយភាពតានតឹង, សន្ទនាគ្នាដើម្បីដោះស្រាយភាពតានតឹង និងគោរពឱ្យបានខ្ជាប់ខ្ជួនទៅតាមច្បាប់អន្តរជាតិ។ គួរកត់សម្គាល់ថាការព្រួយបារម្ភនេះកើតឡើងបន្ទាប់ពីយោធាអាមេរិកដែលប្រចាំការនៅសមុទ្រការីប៊ីនវាយប្រហារទូកដែលសង្ស័យដឹកគ្រឿងញៀនជាច្រើនគ្រឿងបណ្ដាលឱ្យស្លាប់មនុស្សជាច្រើននាក់។
អាមេរិកចាត់ទុកថាអ្នកទាំងនោះជាពួកភេរវកម្មគ្រឿងញៀន។ ជាកិច្ចឆ្លើយតបចំពោះកង្វល់របស់ប្រទេសខ្លះ អ្នកតំណាងអាមេរិកនៅអង្គការសហប្រជាជាតិ លោកចនខេលី (John Kelly) ថ្លែងថារដ្ឋាភិបាលរបស់លោកមិនបន្ធូរដៃនៅក្នុងរឿងនេះទេព្រោះវិធានការទាំងនេះដើម្បីការពារប្រជាជនអាមេរិកាំងមិនឱ្យធ្លាក់ទៅក្នុងអន្ទាក់របស់ពួកភេរវកម្មគ្រឿងញៀន។
ការវាយប្រហាររបស់អាមេរិកដែលរដ្ឋភិបាលរបស់លោកត្រាំពិពណ៌នាថាជាជម្លោះប្រដាប់អាវុធរវាងអាមេរិង និងពួកឈ្មួញគ្រឿងញៀន (cartel) នោះបានធ្វើឱ្យក្រុមអ្នកតំណាងរាស្ត្ររបស់គណបក្សប្រជាធិបតេយ្យ (នៅអាមេរិក) ភ្ញាក់ផ្អើលមិនតិចទេ។ ពួកគេដាក់ជាសំណួរថាតើទង្វើនេះមាននីត្យានុកូលភាព (ភាពស្របច្បាប់) ដែរឬទេ។ លោកនេបឹនហ្សៀថ្លែងថារុស្ស៊ីសូមថ្កោលទោសការវាយប្រហាររបស់អាមេរិកព្រោះជាការរំលោភច្បាប់អន្តរជាតិ និងសិទ្ធិមនុស្ស។ លោកថ្លែងបន្តទៀតថាទូកដែលត្រូវយោធាអាមេរិកបាញ់ប្រហារនោះគឺបាញ់ដោយគ្មានស៊ើបអង្កេតអ្វីទាំងអស់។
ឯកអគ្គរដ្ឋទូតវេណេហ្ស៊ូអេឡាថ្លែងថាដោយផ្អែកទៅលើការប្រមូលផ្ដុំកម្លាំងយោធាកាន់តែច្រើនឡើងៗ (នៅសមុទ្រការីប៊ីន) គួបផ្សំនឹងទង្វើគឃ្លើនរបស់អាមេរិក និងការបំផ្លោងវោហារសាស្ត្រផងនោះ ប្រទេសរបស់លោកកំពុងស្ថិតនៅក្នុងស្ថានភាពគ្រោះថ្នាក់។ មិនយូរទេ អាមេរិកអាចនឹងវាយប្រហារវេណេហ្ស៊ូអេឡា។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ