អ.ស.ប ៖ ដោយសារនយោបាយឯកតោនិយមរបស់ប្រធានាធិបតីអាមេរិកលោកដូណាល់ត្រាំ អ.ស.បនឹងកាត់បន្ថយ២៥%នៃចំនួនទាហានមួកខៀវ លើពិភពលោកនាបណ្ដាខែខាងមុខ។ ការកាត់បន្ថយនោះមានខ្ទង់រវាងពី១៣.០០០នាក់ទៅ១៤.០០០នាក់ នៃចំនួនយោធានិងប៉ូលិសមួកខៀវ មកពីការខ្វះថវិកាទាក់ទិននឹងការកាត់បន្ថយថវិកាវិភាគទានរបស់អាមេរិក។ ចំនួននិយោជិតស៊ីវិលនៃបេសកកម្មអ.ស.បក៏រងការប៉ះពាល់ដែរ។ នេះបើតាមអ្នកទទួលខុសត្រូវ អ.ស.បមួយរូបដែលមិនបញ្ចេញឈ្មោះ។
ថវិកាសម្រាប់ប្រតិបត្តិការថែរក្សាសន្តិភាព ឆ្នាំ២០២៥-២០២៦ មានប្រមាណជា៥,៤ពាន់លានដុល្លារ ក្នុងនោះ១,៣ពាន់លានដុល្លារមកពីសហរដ្ឋអាមេរិកនិង១,២ពាន់លានដុល្លារបានមកពីចិន។ ប៉ុន្តែចាប់តាំងពីលោកត្រាំឡើងកាន់អំណាចជាថ្មី ក្រុងវ៉ាស៊ីនតោនប្រកាសពីការកាត់ចោលយ៉ាងច្រើននូវជំនួយរបស់ខ្លួនដល់បរទេសនិងអ.ស.បរង់ចាំសេចក្ដីសម្រេចនានា ដែលទាក់ទិននឹងបេសកកម្មថែរក្សាសន្តិភាពហើយព័ត៌មានដែលទទួលបានមិនគាប់ប្រសើរឡើយ។
អាមេរិកពេលនេះបានប្រាប់ដល់អ.ស.បថា ខ្លួននឹងបង់វិភាគទានសម្រាប់ថវិកាឆ្នាំ២០២៥-២០២៦ ត្រឹម៦៨២លានដុល្លារប៉ុណ្ណោះ ក្នុងនោះ៨៥លានដុល្លារគឺសម្រាប់អនាគតការិយាល័យ់អ.ស.បជួយទ្រទ្រង់ដល់បេសកកម្មអន្តរជាតិថ្មីប្រឆាំងក្រុមពួកអ្នកលេងនៅហៃទី។ និយាយរួមមកថវិកាថែរក្សាសន្តិភាពដែលកំពុងដំណើរការ ត្រូវកាត់បន្ថយពី១៦ទៅ១៧%៕
ចែករំលែកព័តមាននេះ