ទីក្រុងម៉ូស្គូ៖ រុស្ស៊ីថ្លែងថាខ្លួនកំពុងរង់ចាំស្ដាប់ការបកស្រាយបំភ្លឺឱ្យបានច្បាស់បន្ថែមទៀតនៅក្នុងករណីដែលអាមេរិកថាចង់បញ្ជូនមីស៊ីលបណ្ដែតម៉ាកថូម៉ាហក (Tomahawk) ទៅឱ្យអ៊ុយក្រែននោះតែពិតដែរឬទេ។ រុស្ស៊ីថាមីស៊ីលនេះមិនមែនធម្មតាទេ វាអាចបំពាក់ក្បាលគ្រាប់នុយក្លេអ៊ែរ។ ការថ្លែងដូច្នេះបន្ទាប់ពីលោកត្រាំថ្លែងប្រាប់អ្នកសារព័ត៌មានកាលពីយប់មិញថាលោកចង់ដឹងឱ្យប្រាកដថាតើអ៊ុយក្រែនបន្ទាប់ពីមានមីស៊ីលនេះនៅក្នុងដៃហើយពួកគេនឹងយកមីស៊ីលនេះទៅធ្វើអ្វី។
លោកត្រាំថាគាត់ចង់ដឹងអំពីផែនការរបស់អ៊ុយក្រែនជាមុនសិនមុននឹងសម្រេចចិត្តជាលើកចុងក្រោយថាត្រូវផ្ដល់ ឬមិនផ្ដល់មីស៊ីលទៅឱ្យអ៊ុយក្រែន។ ថូម៉ាហកជាមីស៊ីលសម្រាប់បាញ់ប្រហារទៅលើប្រទេសបច្ចាមិត្ត មិនមែនជាមីស៊ីលសម្រាប់ការពារខ្លួនដូចផេទ្រាត (Patriot) នោះទេ។ ម៉្យាងទៀត ថូម៉ាហកអាចបាញ់បានឆ្ងាយដល់រាប់ពាន់គីឡូម៉ែត្រ។ ដូច្នេះ បើអ៊ុយក្រែនមានមីស៊ីលនេះនៅក្នុងដៃ ហើយប្រើសម្រាប់វាយប្រហាររុស្ស៊ី ពេលនោះអាចធ្វើឱ្យរុស្ស៊ីប្រឈមនឹងបញ្ហាថ្មីមួយទៀត។
មូលហេតុដែលលោកត្រាំមិនចង់បញ្ជូនមីស៊ីលនេះទៅអ៊ុយក្រែនព្រោះមិនចង់ពង្រីកសង្គ្រាម។ លោកចង់បញ្ចប់សង្គ្រាមឱ្យបានឆាប់។ ប៉ុន្តែចុងក្រោយនេះ លោកបង្ហើបឱ្យដឹងថាលោកបានសម្រេចចិត្តជាបណ្ដើរៗហើយ។ អ្នកនាំពាក្យវិមានក្រឹមឡាំង លោកប៉េស្កូស ថ្លែងថាយើងយល់ថាយើងត្រូវរង់ចាំអ៊ុតសភាពការណ៍សិនដើម្បីចង់ឃើញអាមេរិកចេញសេចក្ដីថ្លែងការណ៍ឱ្យបានច្បាស់លាស់ជាងនេះ។
អ្នកនាំពាក្យរូបនេះកត់សម្គាល់ថាកាលពីជំនាន់លោកបៃដិន លោកបានបញ្ជូនអាវុធទៅដល់ដៃអ៊ុយក្រែនរួចហើយទើបលោកប្រកាសជាក្រោយ។ លោកពូទីននៅក្នុងការធ្វើអត្ថាធិប្បាយនៅឯវេទិកាសាធារណៈមួយកាលពីថ្ងៃអាទិត្យលោកបានព្រមានទុកជាមុនថាឱ្យតែអាមេរិកហ៊ានបញ្ជូនមីស៊ីលនេះទៅអ៊ុយក្រែន ទំនាក់ទំនងរវាងម៉ូស្គូ និងវ៉ាស៊ីនតោននឹងមានបញ្ហាជាមិនខាន។
លោកប៉េស្កូសថ្លែងថាចំណុចសំខាន់យើងត្រូវយល់ថាមីស៊ីលដែលយើងកំពុងតែនិយាយនេះអាចបំពាក់ក្បាលគ្រាប់នុយក្លេអ៊ែរ។ ហេតុនេះវាជាសញ្ញាគ្រោះថ្នាក់ និងសញ្ញានៃការផ្ទុះសង្គ្រាមកាន់តែខ្លាំង។ ថូម៉ាហកអាចបាញ់បានចម្ងាយ២៥០០គីឡូម៉ែត្រ។ បើអ៊ុយក្រែនបាញ់ចេញពីទឹកដីរបស់ខ្លួនអាចវាយប្រហារទីក្រុងម៉ូស្គូ និងទីក្រុងដទៃទៀតរបស់រុស្ស៊ីដែលជាប់នឹងទ្វីបអឺរ៉ុប។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ