ខេត្តកំពង់ឆ្នាំង ៖ ប្រជាពលរដ្ឋជិត៣០០គ្រួសារ រស់នៅក្នុងឃុំផ្លូវទូក ស្រុកកំពង់លែង ខេត្តកំពង់ឆ្នាំង កាលពីល្ងាចថ្ងៃទី៤ ខែតុលា ឆ្នាំ២០២៥ បានរងនូវគ្រោះធម្មជាតិ…
ខេត្តកំពង់ឆ្នាំង ៖ ប្រជាពលរដ្ឋជិត៣០០គ្រួសារ រស់នៅក្នុងឃុំផ្លូវទូក ស្រុកកំពង់លែង ខេត្តកំពង់ឆ្នាំង កាលពីល្ងាចថ្ងៃទី៤ ខែតុលា ឆ្នាំ២០២៥ បានរងនូវគ្រោះធម្មជាតិ ទាំងខ្យល់កន្ត្រាក់ និងការលិចលង់លំនៅឋានដោយសារជំនន់ទឹកទន្លេបានហក់ឡើងយ៉ាងគំហុគបណ្ដាលឱ្យជនលិចលង់លំនៅឋានរបស់ពួកគាត់ ត្រូវបានអាជ្ញាធរនិងសមត្ថកិច្ច រួមទាំងកម្លាំងប្រជាការពារជួយសង្គ្រោះបានទាន់ពេលវេលា ។
លោក ប៉ាត់ គន មេឃុំផ្លូវទូក ក្នុងស្រុកកំពង់លែង ខេត្តកំពង់ឆ្នាំង បានបញ្ជាក់ប្រាប់ឲ្យដឹងថា នៅល្ងាចថ្ងៃទី៤ ខែតុលា ឆ្នាំ២០២៥ ជំនន់ទឹកទន្លេបានហក់ឡើងយ៉ាងគំហុក បណ្ដាលឱ្យលិចលង់លំនៅឋានរបស់ប្រជាពលរដ្ឋចំនួន២៧៥ខ្នងក្នុងឃុំរបស់លោក ក្នុងនោះ មាន៨ខ្នងបានលិចចូលទៅក្នុងទឹក និង២ខ្នងទៀតក្រឡាប់ចូលទឹក តែត្រូវបានអាជ្ញាធរនិងសមត្ថកិច្ចជួយសង្គ្រោះបានភ្លាមៗ ។
ដោយឡែក ផ្ទះចំនួន២៦៥ខ្នងផ្ទះទៀត បច្ចុប្បន្ន កំពុងត្រូវបានជួយសង្គ្រោះ និងធ្វើការជួសជុលជាបន្តបន្ទាប់ពីកម្លាំងអាជ្ញាធរ និងសមត្ថកិច្ច រួមទាំងប្រជាការពារ ដោយមានការចូលរួមជួយសង្គ្រោះពីកម្លាំងអធិការដ្ឋាននគរបាលស្រុកកំពង់លែងចំនួន១២នាក់ ដោយធ្វើការជួសជុលទប់ជ្រែងធ្វើយ៉ាងណា អាចឱ្យប្រជាពលរដ្ឋស្នាក់នៅបានប្រកបដោយសុវត្ថិភាព។
លោកមេឃុំក៏បានបញ្ជាក់ឲ្យដឹងទៀតថា បន្ទាប់ពីទទួលព័ត៌មានថា ប្រជាពលរដ្ឋក្នុងឃុំផ្លូវទូកទទួលរងគ្រោះដោយទឹកជំនន់ខាងលើនេះ លោកអភិបាលខេត្តកំពង់ឆ្នាំង បានបញ្ជាឲ្យអាជ្ញាធរ និងសមត្ថកិច្ចក្នុងមូលដ្ឋានរួសរាន់ចុះជួយសង្គ្រោះប្រជាពលរដ្ឋទាំងយប់ ក្នុងនោះលោកអភិបាលក៏បានជួយឧបត្ថម្ភភួយសម្រាប់កល់ផ្ទះបណ្ដែត និងស័ង្កសីមួយចំនួនសម្រាប់ជួយសង្គ្រោះលំនៅឋានដែលលិចចូលទៅក្នុងទឹក ។
លោកមេឃុំបានបញ្ជាក់ឲ្យដឹងទៀតថា នៅថ្ងៃទី៨ តុលា ឆ្នាំ២០២៥ ខាងមុខនេះ លោកអភិបាលនិងនាំយកអំណោយជាគ្រឿងឧបភោគបរិភោគនិងសម្ភារជួសជុលលំនៅឋាន រួមទាំងថវិកាមួយចំនួន មកផ្ដល់ជូនប្រជាពលរដ្ឋដែលរងគ្រោះដោយខ្យល់កន្ត្រាក់ និងទឹកជំនន់ បណ្ដាលឲ្យខូចខាតលំនៅឋានខាងលើនេះ ។
ក្នុងនោះ លោកអភិបាលខេត្តក៏បានផ្ដាំផ្ញើមកដល់អាជ្ញាធរមូលដ្ឋានទាំងអស់ ត្រូវយកចិត្តទុកដាក់ឃ្លាំមើលនូវរាល់សភាពការណ៍ និងត្រៀមកម្លាំងអាជ្ញាធរនិងសមត្ថកិច្ចរួមទាំងកម្លាំងប្រជាការពារជាប្រចាំ ដើម្បីត្រៀមលក្ខណៈជួយសង្គ្រោះដល់ប្រជាពលរដ្ឋដែលរងគ្រោះដោយសារគ្រោះធម្មជាតិផ្សេងៗ ដែលបានកើតឡើងនៅក្នុងមូលដ្ឋានរបស់ខ្លួន ករណីចាំបាច់ត្រូវរាយការណ៍ជាបន្ទាន់មកកាន់រដ្ឋបាលខេត្តឲ្យបានទាន់ពេលវេលា ៕
ចែករំលែកព័តមាននេះ