ទីក្រុងកៀវ៖ លោកហ្សេឡិនស្គីលែនស្គីនិយាយរិះគន់ក្រុមបស្ចិមប្រទេសខ្លាំងៗ។ នៅពេលរុស្ស៊ីបញ្ជូនដ្រូន៥រយគ្រឿង និងមីស៊ីល៥០គ្រាប់វាយប្រហារគ្រប់ទីកន្លែងទូទាំងប្រទេសអ៊ុយក្រែនបែរជាគ្មានក្រុមបស្ចិមប្រទេស ឬក្រុមសម្ព័ន្ធមិត្តណាមួយបញ្ចេញប្រតិកម្មអ្វីទាំងអស់។ លោកថ្លែងថាពួកគេរក្សាភាពស្ងៀមស្ងាត់ទាំងស្រុង។
លោកហ្សេឡិនស្គីអះអាងថារុស្ស៊ីវាយប្រហារទីក្រុងល្វីវ (Lviv) ដោយចេតនា និងដោយចំហដើម្បីបំផ្លិចបំផ្លាញសំណង់ស៊ីវិលរបស់ប្រជាជនមុនពេលរដូវរងាចូលមកដល់។ ទីតាំងស្តុកទុកឧស្ម័ន, រោងចក្រអគ្គិសនី និងខ្សែបណ្ដាញបញ្ជូនភ្លើងអគ្គិសនីត្រូវរងគ្រោះយ៉ាងដំណំ។ ប៉ុន្តែគ្មានឃើញប្រទេសណាមួយចេញមុខថ្កោលទោសទាល់តែសោះ។
ប៉ុន្តែលោកមិនអស់សង្ឃឹមទេ។ លោកអះអាងថាអ៊ុយក្រែនត្រូវតែបន្តការតស៊ូរបស់ខ្លួនរហូតដល់ពិភពលោកលែងរក្សាភាពស្ងប់ស្ងាត់តទៅទៀត និងរហូតដល់រុស្ស៊ីទទួលខុសត្រូវចំពោះទង្វើរបស់ខ្លួន។ យោធាអ៊ុយក្រែនអះអាងថារុស្ស៊ីវាយប្រហារផ្គួបគ្នាដោយមីស៊ីល ដ្រូន និងគ្រាប់បែកបញ្ជាពីចម្ងាយទៅលើតំបន់ធំៗចំនួន៩ទូទាំងប្រទេសអ៊ុយក្រែន។
ប្រទេសប៉ូឡូញដែលនៅជិតខាងអ៊ុយក្រែនបានចល័តយន្តហោះចម្បាំងជាច្រើនគ្រឿងដើម្បីត្រៀមចេញប្រតិបត្តិការជាបន្ទាន់បើមានបញ្ហាមិនស្រួលកើតឡើង។ តំបន់ល្វីវដែលនៅកៀកនឹងប្រទេសប៉ូឡូញនោះរងការវាយប្រហារយ៉ាងខ្លាំងក្លាបំផុត។ នៅពេលដែលអ៊ុយក្រែនកំពុងចាញ់ប្រៀបរុស្ស៊ីដោយសារគ្មានមធ្យោបាយដើម្បីវាយប្រហារឆ្ងាយៗចូលទឹកដីរុស្ស៊ី ទីក្រុងកៀវក៏ស្នើសុំយ៉ាងទទូចឱ្យរដ្ឋបាលរបស់លោកត្រាំប្រញាប់បញ្ជូនគ្រាប់មីស៊ីលបណ្ដែតម៉ាកថូម៉ាហក (Tomahawk)។
ដូច្នេះ រុស្ស៊ីព្យាយាមទប់ស្កាត់មិនឱ្យអាមេរិកផ្ដល់មីស៊ីលនេះទៅអ៊ុយក្រែនទេ។ នេះបើយោងតាមក្រុមអ្នកវិភាគនៅទីក្រុងវ៉ាស៊ីនតោន។ តាមពិត អ៊ុយក្រែនអាចវាយបកទៅលើប្រទេសរុស្ស៊ីវិញដោយប្រើប្រាស់ដ្រូន។ ពេលខ្លះដ្រូនហោះដល់ទីក្រុងម៉ូស្គូ។ ប៉ុន្តែទំហំនៃការខូចខាតមានត្រឹមតែបន្តិចបន្តួចប៉ុណ្ណោះសម្រាប់រុស្ស៊ីព្រោះដ្រូនអាចដឹកជញ្ជូនគ្រាប់រំសេវបានតិច។
អ៊ុយក្រែនចង់បានមីស៊ីលថូម៉ាហកជាយូរមកហើយ ប៉ុន្តែលោកត្រាំបដិសេធ។ ឥឡូវនេះរុស្ស៊ីបានបញ្ចេញប្រតិកម្មទុកជាមុនតាមរយៈមន្ត្រីជាន់ខ្ពស់, អ្នកនាំពាក្យរបស់ខ្លួន និងលោកពូទីនផ្ទាល់តែម្ដង។ ពួកគេថាបើសិនអាមេរិកផ្ដល់មីស៊ីលទៅឱ្យអ៊ុយក្រែន ពេលនោះនឹងមានបញ្ហាធំជាមួយគ្នាជាមិនខាន។ លោកពូទីនថានឹងប៉ះពាល់ទំនាក់ទំនងរវាងទីក្រុងម៉ូស្គូ និងវ៉ាស៊ីនតោន។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ