ខេត្តបាត់ដំបង ៖ ក្រវិលកំប៉ុងស្រាបបៀរចម្រុះច្រើនម៉ាក ដែលអ្នកនិយមផឹកហៅថា «ប័ណ្ណក្រីក្រ»ប្រហែល១០កេស ត្រូវបានលោកចោរដាច់យ៉ៃម្នាក់ចូល«ប្លន់»យកពីក្នុងផ្ទះលក់ចាប់ហួយមួយកន្លែងនៅចំណុច«ដងទង់»ស្ថិតក្នុងភូមិផ្លូវមាស ឃុំផ្លូវមាស ស្រុករតនមណ្ឌល កាលពីវេលាម៉ោងជាង៦ព្រឹកថ្ងៃទី០៥ តុលា …
ខេត្តបាត់ដំបង ៖ ក្រវិលកំប៉ុងស្រាបបៀរចម្រុះច្រើនម៉ាក ដែលអ្នកនិយមផឹកហៅថា «ប័ណ្ណក្រីក្រ»ប្រហែល១០កេស ត្រូវបានលោកចោរដាច់យ៉ៃម្នាក់ចូល«ប្លន់»យកពីក្នុងផ្ទះលក់ចាប់ហួយមួយកន្លែងនៅចំណុច«ដងទង់»ស្ថិតក្នុងភូមិផ្លូវមាស ឃុំផ្លូវមាស ស្រុករតនមណ្ឌល កាលពីវេលាម៉ោងជាង៦ព្រឹកថ្ងៃទី០៥ តុលា បន្ទាប់ពីលោកចោរទាញកាំបិតខ្វែវកាប់ជនរងគ្រោះ០២នាក់ប្ដីប្រពន្ធឲ្យរងរបួសយ៉ាងដំណំ ។
នាយប៉ុស្ដិ៍រដ្ឋបាលផ្លូវមាស លោក និន សារ៉េន បានប្រាប់កោះសន្តិភាពតាមទូរស័ព្ទ នៅព្រឹកថ្ងៃទី ០៦ តុលា នេះថា ជនសង្ស័យដែលចូល«ប្លន់»ក្រវិលកំប៉ុងនៅផ្ទះលក់ដូរនេះ ទំនងជាមនុស្ស
«បែកថ្នាំ»តែគេមិនទាន់ស្គាល់អត្តសញ្ញាណជននោះនៅឡើយទេ ។ លោកថា ជននោះទំនងបានលួចចូលទៅសំងំនៅក្នុងចម្ការខាងក្រោយផ្ទះជនរងគ្រោះ តាំងពីក្បាលព្រលប់ លុះព្រឹកឡើង នៅពេលម្ចាស់ផ្ទះបើកទ្វារ ជននេះធ្វើសកម្មភាពតែម្ដង ។
បើតាមលោកមេប៉ុស្ដិ៍ដដែលបានបញ្ជាក់ថា ជនដៃដល់បានប្រើប្រាស់កាំបិតខ្វែវ ដែលជារបស់ជនរងគ្រោះទុកនៅខ្ទមខាងក្រោយ កាប់ទៅលើជនរងគ្រោះ០២នាក់ប្ដីប្រពន្ធ ពេលជនរងគ្រោះបើកទ្វារចេញដើរទៅខាងក្រោយ និងកំពុងរៀបចំបើកទ្វារផ្ទះលក់ដូរ បណ្ដាលឲ្យជនរងគ្រោះទាំង០២នាក់ប្ដីប្រពន្ធរងរបួសយ៉ាងដំណំ ។
លោកបានប្រាប់ថា ជនរងគ្រោះឈ្មោះ ណំ ធារី អាយុ៦៨ឆ្នាំ (ប្ដី) របួសត្រូវក្បាល០១កាំបិត និងប្រពន្ធឈ្មោះ ចាត ណា អាយុ៤៩ឆ្នាំ របួស០៤កន្លែង ត្រូវក្បាល០៣កន្លែង និងត្រូវដៃឆ្វែង០១កន្លែង មានមុខរបរលក់ដូរ រស់នៅចំណុចកើតហេតុ ។
បើតាមចម្លើយជនរងគ្រោះដែលសមត្ថកិច្ចបានសួរនាំបាននិយាយថា ជនដៃដល់អាចផ្លោះរបងចូលសំងំក្នុងដីចម្ការខាងក្រោយផ្ទះគាត់តាំងពីយប់ លុះព្រឹកឡើងនៅពេលគាត់បើកទ្វារផ្ទះចេញទៅក្រោយ មានរឿងនេះកើតឡើង ។
សមត្ថកិច្ចបានស្រង់សម្ដីគាត់ទៀតថា គ្រាហ៍នោះប្រពន្ធបានបើកទ្វារក្រោយចេញក្រៅ បន្ទាប់ពីឮសំឡេងឆ្កែព្រុះ លុះរកមិនឃើញអ្វី គាត់ក៏ដើរទៅដកបន្លែង ហើយក៏ត្រូវជនដៃដល់នោះទាញខ្វែងស្ទុះមកកាប់គាត់ និងបានប្រតាយប្រតប់គ្នា ស្រែកផ្អើលភូមិ ។ ក្រោយឮសំឡេងប្រពន្ធស្រែកបែបនេះ ប្ដីគាត់ក៏ស្ទុះចេញមកជួយ ទើបត្រូវជនដៃដល់កាប់គាត់ត្រូវក្បាលមួយកាំបិតដែរ ។ នៅពេលដែលប្ដីកំពុងជួយប្រពន្ធ ជនដៃដល់ក៏ឆក់ឱកាសរត់ចូលក្នុងផ្ទះឆក់យកបានក្រវិលកំប៉ុងស្រាបៀរមួយថង់ ហើយក៏រត់ចេញត្រប់ក្រោយចូលព្រៃចម្ការគេចខ្លួនបាត់ស្រមោលភ្លាមរំពេច ។
កោះសន្តិភាពមិនទាន់អាចស្វែងរកការបំភ្លឺពីជនរងគ្រោះបាននៅឡើយទេ ពាក់ព័ន្ធនឹងករណីលោកចោរដាច់យ៉ៃ«ប្លន់»ក្រវិលស្រាបៀរនេះ។ ប៉ុន្តែលោកឈឿង គឹមសុង ស្នងការរងទទួលផែនព្រហ្មទណ្ឌ ដែលបានចុះដល់កន្លែងកើតហេតុបានប្រាប់ថា ករណីនេះ ពិតជាបានកើតឡើងមែន ។
លោក ឈឿង គឹមសុង បាននិយាយថា បើតាមមន្ត្រីជំនាញរបស់លោកបានត្រូតពិនិត្យកាមេរ៉ាសុវត្ថិភាពនៅផ្ទះជនរងគ្រោះ ជនសង្ស័យបានធ្វើសកម្មភាពតាំងពីម៉ោង៧យប់ម្ល៉េះ ។ លោកបានប្រាប់ថា កាមេរ៉ាបានបង្ហាញសកម្មភាព គឺម៉ោង៧យប់ ជនសង្ស័យបានយកកាំបិតកាប់ទ្វារខាងមុខ តែធ្វើមិនកើត ។ ត្រង់ចំណុចនេះ ម្ចាស់ផ្ទះបានអះអាងថា «ខ្ញុំបានឮសំឡេងដែរ តែស្មានថា គេគប់ជញ្ជាំងផ្ទះ» ។ រហូតដល់ម៉ោងប្រហែល៣រំលងអធ្រាត្រ ជនដៃដល់ដដែលនេះ បានដើរមកខាងមុខផ្ទះផ្ដងទៀត យកទឹកក្រូចហួសឌឺឡេដែលម្ចាស់ទុកចោលនៅខាងក្រៅ យកទៅផឹកនៅខ្ទមចម្ការខាងក្រោយ ។
លុះនៅព្រឹកឡើង ពេលម្ចាស់ផ្ទះ (ប្រពន្ធ) បើកទ្វារចេញទៅខាងក្រោយ ក៏ត្រូវជនដៃដល់ទាញខ្វែងមកកាប់ផ្អើលឈុលទាំងព្រឹកតែម្ដង ។ លោក ឈឿង គឹមសុង បានបញ្ជាក់ដែរថា បើតាមចម្លើយជនរងគ្រោះ គឺជនដៃដល់បាន«ប្លន់»យកតែក្រវិលកំប៉ុងស្រាបៀរមួយថង់តែប៉ុណ្ណោះ រីឯលុយកាក់ដែលទុកក្នុងថតតុមិនបាត់បង់ទេ ។
ជុំវិញករណីលោកចោរ«ប្លន់»យកក្រវិលកំប៉ុងខាងលើនេះ លោកស្នងការរងបានធ្វើការសន្និដ្ឋានជាបឋមដូច្នេះថា «បើយោងលើការតាមសកម្មភាពរបស់ជនសង្ស័យ ដែលបន្សល់ទុកក្នុងកាមេរ៉ាសុវត្ថិភាព ជនសង្ស័យអាចលួចចូលមកសំងំក្នុងខ្ទមចម្ការខាងក្រោយផ្ទះជនរងគ្រោះតាំងពីក្បាលព្រលប់ម្ល៉េះ ។ ហើយជនរងគ្រោះបានព្យាយាមធ្វើសកម្មភាពច្រើនលើកច្រើនសារ តែមិនបានសម្រេច» ។
លោកបានបញ្ជាក់បន្ថែមថា ជននេះទំនងទៅសំងំដេកនៅខ្ទមខាងក្រោយលង់លក់ជ្រុល រហូតដល់ភ្លឺឡើង ពេលឃើញម្ចាស់ផ្ទះបើកទ្វារចេញក្រៅ ក៏ទាញកាំបិតខ្វែវរបស់ជនរងគ្រោះនៅក្នុងខ្ទម ធ្វើសកម្មភាពកាប់ជនរងគ្រោះ រួចរត់ចូលក្នុងផ្ទះ«ប្លន់»បានតែក្រវិលកំប៉ុងស្រាបៀរមួយថង់ ក៏រត់ចេញទៅខាងក្រោយបាត់ទៅ ។ បើតាមសកម្មភាព ជនសង្ស័យរួបនោះ ទំនងជាមនុស្ស«បែកថ្នាំ»ផង ។
ប៉ុន្តែយ៉ាងណា ពេលនេះ ទាំងមន្ត្រីការិយាល័យជំនាញ ទាំងមន្ត្រីមូលដ្ឋាន បាននិងកំពុងធ្វើការស្រាវជ្រាវតាមរកលោកចោរដាច់យ៉ៃ«ប្លន់»យក«ប័ណ្ណក្រីក្រ»ប្រហែល១០កេសខាងលើនេះហើយ សូម្បីតាមបណ្ដាតូបលក់ដូរនានានៅតំបន់នោះ ក៏ត្រូវបានប្រាប់ឲ្យជួយតាមដានដែរ ក្រែងលោកចោរយកក្រវិលទៅលក់ ឬប្ដូរនៅតាមតាមកន្លែងលក់ដូរនានា ៕
ចែករំលែកព័តមាននេះ