ទីក្រុងតូក្យូ៖ គណបក្សប្រជាធិបតេយ្យសេរីនៅប្រទេសជប៉ុនត្រៀមរៀបចំការបោះឆ្នោតផ្ទៃក្នុងបក្សដើម្បីជ្រើសរើសប្រធានថ្មីនៅថ្ងៃសៅរ៍សប្ដាហ៍នេះ។ ក្រុមអ្នកតំណាងរាស្ត្រ និងសមាជិកព្រឹទ្ធសភារបស់គណបក្សនេះនឹងទម្លាក់សន្លឹកឆ្នោតរបស់ខ្លួននៅក្នុងធុងឆ្នោតដើម្បីគាំទ្របេក្ខជនរូបណាដែលខ្លួនពេញចិត្ត។ បេក្ខជនដែលប្រកួតជម្រុះនៅសល់៥នាក់នឹងប្រកួតវគ្គផ្ដាច់ព្រ័ត្រដើម្បីស្នងតំណែងបន្តពីលោកអ៊ីស៊ីបាដែលជានាយករដ្ឋមន្ត្រីចាំផ្ទះបច្ចុប្បន្ន។
ក្រោយពេលលោកអ៊ីស៊ីបាប្រកាសលាលែងពីតំណែងកាលពីខែកញ្ញា គណបក្សប្រជាធិបតេយ្យសេរីក៏ប្រញាប់ប្រញាល់គិតគូររកបេក្ខជនដែលស័ក្ដិសមនឹងកាន់តំណែងបន្តពីលោក។ មន្ត្រីជាន់ខ្ពស់របស់គណបក្សបានស្នើសុំឱ្យលោកលាលែងពីតំណែងព្រោះលោកដឹកនាំគណបក្សមិនបានល្អ ធ្វើឱ្យបក្សទទួលបានលទ្ធផលឆ្នោតមិនល្អនៅក្នុងការបោះឆ្នោតព្រឹទ្ធសភា។
នៅក្នុងចំណោមបេក្ខជនទាំងប្រាំនាក់នោះមាន
– អតីតរដ្ឋមន្ត្រីក្រសួងសន្តិសុខសេដ្ឋកិច្ច លោកកូបាយ៉ាស៊ី តាកាយូគី (Kobayashi Takayuki)
– អតីតរដ្ឋមន្ត្រីក្រសួងសន្តិសុខសេដ្ឋកិច្ច លោកស្រីតាកាអ៊ីជិ សាណាអិ (Takaichi Sanae)
– អតីតអគ្គលេខាធិការគណបក្សប្រជាធិបតេយ្យសេរី លោកម៉ូតេគី តូស៊ីមីតស៊ូ (Motegi Toshimitsu)
– រដ្ឋមន្ត្រីទីស្ដីការគណៈរដ្ឋមន្ត្រី លោកហាយ៉ាស៊ី យ៉ូស៊ីម៉ាសា (Hayashi Yoshimasa)
– រដ្ឋមន្ត្រីក្រសួងកសិកម្ម លោកកូអ៊ីហ្ស៊ូមិ ស៊ីនជីរ៉ូ (Koizumi Shinjiro) ដែលជាកូនប្រុសអតីតនាយករដ្ឋមន្ត្រីកូអ៊ីហ្ស៊ូមិ។
នៅក្នុងការបោះឆ្នោតនេះ បើសិនបេក្ខជនរូបណាទទួលបានសំឡេងគាំទ្រលើសពីពាក់កណ្ដាលនៃអ្នកតំណាងរាស្ត្រ និងសមាជិកព្រឹទ្ធសភាសរុបរបស់គណបក្សប្រជាធិបតេយ្យសេរី បេក្ខជនរូបនោះនឹងកាន់តំណែងជាប្រធានគណបក្ស និងជានាយករដ្ឋមន្ត្រី។ ប៉ុន្តែបើគ្មានបេក្ខជនរូបណាទទួលបានសំឡេងគាំទ្រដូចការកំណត់នេះទេ គេនឹងសម្រាំងជ្រើសរើសយកបេក្ខជនដែលទទួលបានសំឡេងគាំទ្រច្រើនជាងគេចំនួន២រូបដើម្បីត្រៀមប្រកួតប្រជែងនៅវគ្គផ្ដាច់ព្រ័ត្រ។ មិនរង់ចាំយូរទេ ការបោះឆ្នោតជុំទី២នឹងរៀបចំនៅល្ងាចថ្ងៃសៅរ៍តែម្ដង។ ខាងលើនេះជាការដកស្រង់ប្រភពពីទូរទស្សន៍អឹនអេចខេ (NHK) និងប្រភពដទៃទៀត៕
ចែករំលែកព័តមាននេះ