ទីក្រុងឡុង៖ បុរសម្នាក់បើកឡានបុកមនុស្សនៅខាងក្រៅវិហារមួយកន្លែងនៃប្រទេសអង់គ្លេសភាគខាងជើង និងក្រោយមកមនុស្សដដែលនោះយកកាំបិតចាក់អ្នកដទៃ។ ហេតុការណ៍នេះបណ្ដាលឱ្យស្លាប់មនុស្ស២នាក់ និងរបួស៣នាក់។ ក្រោយមក ជនដៃដល់ដែលមានគ្នាតែម្នាក់នោះក៏បានស្លាប់ដែរបន្ទាប់ពីសមត្ថកិច្ចចុះធ្វើអន្តរាគមន៍ និងបាញ់ប្រហារទៅលើគាត់។ ករណីនេះកើតឡើងចំពេលមនុស្សកំពុងជួបជុំគ្នានៅវិហារគ្រិស្តសាសនាដែលរៀបចំពិធីបុណ្យចូលឆ្នាំថ្មីតាមជំនឿរបស់ជនជាតិជ្វីប។
តាមរយៈការបង្ហោះសារនៅលើបណ្ដាញអ៊ិចជាហូរហែ សមត្ថកិច្ចអះអាងថាខ្លួនបានទទួលការហៅទូរស័ព្ទដើម្បីធ្វើអន្តរាគមន៍នៅវិហាររបស់ជនជាតិជ្វីបនៃតំបន់ក្រាំសល (Crumpsall) ក្រោយម៉ោង៩:៣០ព្រឹក។ អ្នកហៅទូរស័ព្ទនោះប្រាប់ថាខ្លួនឃើញរថយន្តមួយគ្រឿងបើកយ៉ាងលឿនតម្រង់ទៅរកមនុស្សនៅទីសាធារណៈ និងឃើញមនុស្សម្នាក់ត្រូវជនដៃដល់ចាក់នឹងកាំបិត។
ស្ត្រីម្នាក់ឈ្មោះឆាវ៉ា ឡេវីន (Chava Lewin) ដែលរស់នៅក្បែរវិហារនោះប្រាប់ថាមុនដំបូង អ្នកស្រីស្ដាប់ឮសំឡេងលាន់ឮយ៉ាងកងរំពង។ ពេលនោះអ្នកស្រីគិតថាប្រហែលជាគេបាញ់កាំជ្រួចហើយមើលទៅ។ លុះពេលប្ដីរបស់អ្នកស្រីរត់វឹងចូលទៅក្នុងផ្ទះ និងប្រាប់ថា «មានអំពើភេរវកម្មកើតឡើងហើយ» ទើបអ្នកស្រីដឹងច្បាស់ថាមានអ្វីកើតឡើង។ សាក្សីម្នាក់ប្រាប់អ្នកស្រីថារថយន្តមួយគ្រឿងនោះបើកបុករបងវិហារ។
អ្នកស្រីឡេវីនមុនដំបូងគិតថាប្រហែលជាអ្នកបើកឡាននោះមានបញ្ហាធ្វើទុក្ខបេះដូងហើយមើលទៅ។ មិនយូរប៉ុន្មាន អ្នកបើកឡានរូបនោះក៏យកកាំបិតចាក់អ្នកដែលនៅក្បែរៗគាត់។ គាត់ដើរសំដៅទៅរកភ្នាក់ងារសន្តិសុខប្រចាំវិហារ និងព្យាយាមដើរចូលទៅក្នុងវិហារ។ ប៉ុន្មាននាទីក្រោយមក អ្នកស្រីស្ដាប់ឮស្នូរកាំភ្លើងរបស់សមត្ថកិច្ច។ នោះជាការបាញ់ត្រូវចំបុរសជាជនដៃដល់។
តាមរយៈវីឌីអូឃ្លីបដែលគេបង្ហោះតគ្នានៅលើបណ្ដាញសង្គម គេឃើញសមត្ថកិច្ចប្រដាប់ដោយកាំភ្លើងបានភ្ជង់បុរសម្នាក់។ គេស្ដាប់ឮអ្នកធ្វើដំណើរកាត់ទីនោះស្រែកថាបុរសជាជនដៃដល់មានគ្រាប់បែក គាត់ប្រុងចុចគន្លឹះឱ្យផ្ទុះហើយ។ នៅពេលបុរសនោះព្យាយាមងើបឡើង គេស្ដាប់ឮស្នូរគ្រាប់កាំភ្លើង។ បន្ទាប់មក បុរសជាជនដៃដល់ក៏ដួលគ្រឹបទៅលើដីបាត់មាត់បាត់កតែម្ដង។
របាយការណ៍បឋមរបស់សមត្ថកិច្ចបង្ហាញថាមនុស្សបួននាក់រងរបួស និងកំពុងសម្រាកព្យាបាលនៅមន្ទីរពេទ្យដោយសារការបើកឡានបុក និងការចាក់នឹងកាំបិត។ ក្រោយមក គេទទួលរបាយការណ៍ថាចំនួនអ្នករបួសកើនឡើងដល់៥នាក់។ នេះបើយោងតាមការផ្សាយរបស់ទីភ្នាក់ងារព័ត៌មានអេភី និងប្រភពដទៃទៀត៕
ចែករំលែកព័តមាននេះ