រាជធានីភ្នំពេញ ៖ នារីម្នាក់ ខឹងប្ដីរបស់ខ្លួន ដើរលេងយប់ជ្រៅ អត់ចូលផ្ទះហើយ ពេលនាងទូរសព្ទរកចូលច្រើនដង លោកប្ដីអត់លើកទូរសព្ទទៀត ធ្វើឲ្យនាងខឹង គិតខ្លី…
រាជធានីភ្នំពេញ ៖ នារីម្នាក់ ខឹងប្ដីរបស់ខ្លួន ដើរលេងយប់ជ្រៅ អត់ចូលផ្ទះហើយ ពេលនាងទូរសព្ទរកចូលច្រើនដង លោកប្ដីអត់លើកទូរសព្ទទៀត ធ្វើឲ្យនាងខឹង គិតខ្លី ក៏បានចាកចេញពីផ្ទះជួល រួចឡើងទៅលើបង្កាន់ដៃស្ពានអាកាសមហាវិថីស៊ី ជីនពីង ប៉ងលោតពីលើស្ពាន ប៉ុន្តែមិនបានសម្រេចនោះទេ ដោយបានអ្នកដំណើរឆ្លងកាត់ទីនោះ បានឃើញរួចរាយការណ៍ជូននគរបាលប៉ុស្តិ៍ចោមចៅទី៣ រួមជាមួយប្រជាការពារ ចុះទៅលួងលោមនាងឲ្យដឹងខ្លួន ក្រោយមកប្ដីនាងទៅដល់ ។ ខណៈនោះ នាងរវល់តែមើលប្ដីភ្លេចខ្លួន ទើបនគរបាលមានឱកាសស្ទុះចូលទៅចាប់ទាញទម្លាក់ចុះពីលើបង្កាន់ដៃស្ពាន ជួយសង្គ្រោះជីវិតបាន រួចប្រគល់ឲ្យប្ដីនាំយកទៅផ្ទះវិញ ។
ហេតុការណ៍ខាងលើបានកើតឡើងបង្កឲ្យមានការភ្ញាក់ផ្អើល កាលពីវេលាម៉ោង១យប់រំលងអាធ្រាត្រឈានចូលថ្ងៃទី០១ ខែសីហា ឆ្នាំ២០២៥ នៅលើស្ពានអាកាសមហាវិថីស៊ី ជីនពីង ជម្ពូវ័ន ត្រើយខាងជើង ស្ថិតនៅក្នុងភូមិព្រៃស្វាយ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ស្ត្រីរូបនោះ រួមនិងប្ដីរបស់នាង មិនត្រូវបានគេស្គាល់អត្តសញ្ញាណនោះទេ អ្នកទាំង២ មានអាយុប្រមាណជាង២០ឆ្នាំដូចគ្នា ហើយគ្រាន់តែដឹងថា ស្នាក់នៅផ្ទះជួល នៅក្នុងបុរីសែនមនោរម្យ ស្ថិតនៅក្នុងភូមិកន្ទោកខាងជើង សង្កាត់កន្ទោក ខណ្ឌកំបូល រាជធានីភ្នំពេញ ។
បើតាមអ្នកដំណើរតាមផ្លូវនោះ បាននិយាយថា នៅវេលាម៉ោងខាងលើ គាត់បានឃើញស្ត្រីរូបនោះ ស្ពាយកាបូបពណ៍ផ្កាឈូក១ ដើរផង យំផង លើឡើងស្ពានអាកាសមហាវិថីស៊ី ជីនពីង ក្នុងស្ថានភាពអស់សង្ឃឹម។ បន្ទាប់មក នាងក៏បានឡើងទៅអង្គុយលើបង្កាន់ដៃស្ពាននោះ រួចដោះកាបូបស្ពាយចេញពីខ្លួន ដាក់នៅលើបង្កាន់ដៃស្ពាន ប៉ងលោតពីលើស្ពាន ។
អ្នកដំណើររូបនោះ បាននិយាយបន្តទៀតថា នៅពេលឃើញបែបនេះ គាត់ក៏បានរាយការណ៍ជូននគរបាលប៉ុស្តិ៍ចោមចៅទី៣ ឲ្យជួយអន្តរាគមន៍ ហើយនគរបាល និងប្រជាការ ក៏បានចុះទៅកាន់ទីនោះភ្លាមៗ រួចធ្វើការនិយាយលួងលោមឲ្យស្ត្រីនោះចុះចេញពីបង្កាន់ដៃស្ពានវិញ ប៉ុន្តែទោះបីជានគរបាល និងប្រជាការពារ និយាយលួងលោមយ៉ាងណា ក៏នាងមិនព្រមចុះពីដែរ ហើយនាងនិយាយផង យំផង ថានាងចង់ស្លាប់ និងមិនឲ្យនគរបាលចូលទៅជិតនាងទេ ។
ប្រភពមួយនេះ បានប្រាប់ឲ្យដឹងបន្ថែមទៀតថា នាងនិយាយថា មូលហេតុចង់ស្លាប់ ព្រោះនាងខឹងប្ដីដើរលេងយប់ ហើយពេលនាងខលរកប្ដី អត់លើកទូរសព្ទរបស់នាងសោះ តែបើទោះជាបែបនេះក្ដី ក៏នគរបាលនៅតែព្យាយាមលួងលោមនាងដដែល។ លុះមួយសន្ទុះក្រោយមក ក៏ឃើញបុរសជាប្ដីរបស់នាងជិះម៉ូតូម៉ាកហុងដាស្កូបពី ពណ៍ស ១គ្រឿង ឌុបបុរសម្នាក់ទៀត ត្រូវជាឪពុកមារទៅដល់ ហើយខណៈនាងរវល់តែមើលប្ដីភ្លេចខ្លួន ទើបនគរបាលប៉ុស្តិ៍ចោមចៅទី៣ ស្ទុះចូលទៅចាប់ទាញចុះ ជួយសង្គ្រោះបានសម្រេច ។
ប្រភពខាងលើបានបញ្ជាក់ប្រាប់ទៀតថា ភ្លាមៗនោះ បុរសជាប្ដី ក៏បានចាប់ឱបនាងដែរ និងនិយាយទៅកាន់ប្រពន្ធថា «ម៉េចចង់ល្បីស្អីគេ ?» ដោយខឹងប្ដីពេក នារីនោះ ក៏ស្រែកយំខ្លាំងៗ រួចទះកំផ្លៀងប្ដី ចំនួន២ដៃ។ ក្រោយមកអ្នកទាំង២ ក៏បានឈ្លោះប្រកែកគ្នានៅមុខនគរបាលថែមទៀតផង ប៉ុន្តែនគរបាល និងប្រជាការពារ បានឃាត់មិនឲ្យឈ្លោះគ្នានោះទេ។ ព្រមទាំងធ្វើការអប់រំ ដល់អ្នកទាំង២ ជាពិសេសណែនាំដល់បុរសជាប្ដី កុំឲ្យដើរលេងយប់ និងធ្វើបាបប្រពន្ធតទៅទៀត រួចប្រគល់នារីនេះ ឲ្យប្ដីនាំយកត្រលប់ទៅផ្ទះវិញ ។
សមត្ថកិច្ចបាននិយាយថា ចាប់តាំងពីស្ពានអាកាសមហាវិថីស៊ី ជីនពីង នេះសាងសង់រួចប៉ុន្មានឆ្នាំមកនេះ គឺជាលើទី១ហើយ ដែលមានមនុស្សចង់លោតបែបនេះ ប៉ុន្តែត្រូវបានជួយទាន់ពេលវេលា ៕
ចែករំលែកព័តមាននេះ