រាជធានីភ្នំពេញ ៖ ដើម្បីបង្ការទប់ស្កាត់ នូវរាល់បញ្ហាអសន្តិសុខ ដែលអាចកើតមានឡើង បង្កភាពភ័យខ្លាចដល់ប្រជាពលរដ្ឋ ជាពិសេសមានក្រុមក្មេងទំនើង តែងតែចេញចូល និងប្រមូលផ្ដុំគ្នាទាំងយប់ថ្ងៃ គណៈបញ្ជាការឯកភាពសង្កាត់ច្បារអំពៅទី២…
រាជធានីភ្នំពេញ ៖ ដើម្បីបង្ការទប់ស្កាត់ នូវរាល់បញ្ហាអសន្តិសុខ ដែលអាចកើតមានឡើង បង្កភាពភ័យខ្លាចដល់ប្រជាពលរដ្ឋ ជាពិសេសមានក្រុមក្មេងទំនើង តែងតែចេញចូល និងប្រមូលផ្ដុំគ្នាទាំងយប់ថ្ងៃ គណៈបញ្ជាការឯកភាពសង្កាត់ច្បារអំពៅទី២ បានចុះធ្វើរដ្ឋបាលនៅតំបន់ស្មុគស្មាញ ។
ការចុះរដ្ឋបាលនេះដែរ បានធ្វើឡើងនៅវេលាម៉ោង ០២និង៣០នាទីរសៀលថ្ងៃទី០២ ខែតុលា ឆ្នាំ២០២៥ ដោយមានការចង្អុលបង្ហាញពីលោក ចេង មុន្នីរ៉ា អភិបាលខណ្ឌច្បារអំពៅ និងលោកវរសេនីយ៍ឯក ម៉ៅ សឿត អធិការនគរបាលខណ្ឌច្បារអំពៅ ណែនាំដល់លោកវរសេនីយ៍ត្រី អ៊ុ រតនា នាយនគរបាលប៉ុស្តិ៍ច្បារអំពៅទី២ ដឹកនាំកម្លាំងចុះត្រួតពិនិត្យតាមតំបន់អណាធិបតេយ្យ នៅចំណុច ភូមិដើមស្លែង សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ ។
តាមការបញ្ជាក់ពីលោកវរសេនីយ៍ត្រី អ៊ុ រតនា នាយប៉ុស្តិ៍នគរបាលច្បារអំពៅទី២ បញ្ជាក់ថា ព្រោះតំបន់នេះជាតំបន់ភូមិសាស្ត្រស្មុគស្មាញ ឧស្សហ៍កកើតមានសកម្មភាពក្មេងទំនើង ជនញៀនថ្នាំ និងអំពើអសន្តិសុខមួយចំនួន ដែលកើតមានឡើងទាំងពេលយប់ និងពេលថ្ងៃ បង្កជាក្តីព្រួយបារម្ភដល់ពលរដ្ឋជាច្រើនរស់នៅក្នុងតំបន់នេះ ។
លោក បន្តថា បច្ចុប្បន្ននេះ ភាពអាណាធិបតេយ្យ និងសកម្មភាពអសន្តិសុខមួយចំនួននៅតំបន់នេះ មានភាពល្អប្រសើរឡើងច្រើនហើយ ប៉ុន្តែទោះជាយ៉ាងណា កម្លាំងអាជ្ញាធរ ក៏មិនបានបន្ធូរដៃក្នុងការមានវិធានការរដ្ឋបាលលើបញ្ហានេះ នោះឡើយ គឺនៅបន្តធ្វើកិច្ចការងារនេះ រហូតទទួលបានប្រសិទ្ធិភាពខ្ពស់ ដើម្បីជាការធានាបានសន្តិសុខល្អជូនពលរដ្ឋ ។
ប្រជាពលរដ្ឋរស់នៅតំបន់ភូមិដើមស្លែង បានសម្តែងក្តីសប្បាយរីករាយ និងពេញចិត្តបំផុតចំពោះសកម្មភាពចុះធ្វើរដ្ឋបាលរបស់ក្រុមអាជ្ញាធរ ដែលនេះជាការទប់ស្កាត់ បង្ការបានពីសកម្មភាពអសន្តិសុខនានា ដែលតែងកើតមានឡើងពីជនទំនើង ឬមុខសញ្ញាជាក្រុមជនសង្ស័យផ្សេងៗ ដែលយកតំបន់នេះ ជាទីកន្លែងស្នូលសម្រាប់ប្រព្រឹត្តិបទល្មើស ។
សូមបញ្ជាក់ថា នេះមិនមែនជាលើកទី១នោះទេ ដែលកម្លាំងគណៈបញ្ជាការឯកភាពសង្កាត់ច្បារអំពៅទី២ ចុះធ្វើរដ្ឋបាលនៅតំបន់ដែលមានភាពអណាធិបតេយ្យ និងស្មុគស្មាញ ៕
ចែករំលែកព័តមាននេះ