ខេត្តសៀមរាប ៖ ភ្លៀងខ្លាំងមានផ្គររន្ទះ លាយឡំនិងខ្យល់កន្ទ្រាក់ រយៈពេល៣ ថ្ងៃជាប់គ្នាចាប់ពីថ្ងៃទី២៨-២៩-៣០ ខែកញ្ញា ឆ្នាំ២០២៥បណ្តាលឱ្យលិចលង់ ផ្លូវថ្នល់ សាលា…
ខេត្តសៀមរាប ៖ ភ្លៀងខ្លាំងមានផ្គររន្ទះ លាយឡំនិងខ្យល់កន្ទ្រាក់ រយៈពេល៣ ថ្ងៃជាប់គ្នាចាប់ពីថ្ងៃទី២៨-២៩-៣០ ខែកញ្ញា ឆ្នាំ២០២៥បណ្តាលឱ្យលិចលង់ ផ្លូវថ្នល់ សាលា រៀន មន្ទីរពេទ្យ ផ្ទះសំបែង និង ខូចខាត ដំណាំយ៉ាងធ្ងន់ធ្ងរ ព្រមទាំងប្រកាសអាសន្ននៅស្រុកបន្ទាយស្រីផងដែរ។
នៅថ្ងៃទី២៩ ខែកញ្ញា ឆ្នាំ២០២៥ លោក រិន ឡូត អភិបាលស្រុក បានដឹកនាំកម្លាំងគណៈបញ្ជាការ ចុះពិនិត្យទឹកស្ទឹងបន្ទាយស្រី កម្ពស់ទឹកឡើងខ្លាំង ៥,៨០ម ដល់ចំណុចប្រកាសអាសន្ន ៦,០០ម៉ែត្រ និងបានជម្លៀសប្រជាពលរដ្ឋបានរួចរាល់ ជាក់ស្តែងមានប៉ះពាល់ចំនួន ២ឃុំ ក្នុងស្រុកបន្ទាយស្រី រួមមាន: ១. ឃុំខ្នារសណ្តាយ ៖ ទឹកហូរដាច់ផ្លូវគ្រួសក្រហម ១កន្លែង នៅភូមិប្រិយ៍ ប្រវែង ៥ម៉ែត្រ -ភូមិបន្ទាយស្រី ទឹកលិចផ្ទះប្រជាពលរដ្ឋចំនួន ២៦គ្រួសារ (ប្រជាពលរដ្ឋដែលរស់នៅតាមបណ្តោយមាត់ស្ទឹងបន្ទាយស្រី និងបានចាកចេញពីទីតាំងដែរលិច មកទីតាំងសុវត្ថិភាពរួចរាល់)។
២. ឃុំឃុនរាម : ទឹកហូរកាត់ផ្លូវជាតិលេខ៦៧ ចំណុចអង្គរមាស ១កន្លែង នៅភូមិទួលគ្រួស និង ទឹកហូរដាច់ផ្លូវ ៣កន្លែង នៅភូមិកំព្រហ្ម(ផ្លូវម៉ាឡេ) បណ្ដាលឱ្យមានការបាក់ដីខូចផ្លូវសរុបប្រវែង ៤០ម៉ែត្រ ។ ក្នុងនោះដែរ ឯកឧត្តម ប្រាក់ សោ ភ័ណ អភិបាលនៃគណៈអភិបាលខេត្តសៀមរា បានចុះពិនិត្យ ស្ថានភាពទឹក ជំនន់នៅតាមបណ្តាស្រុក មួយ ចំនួនក្នុងខេត្តសៀមរាប។ ឯកឧត្តម បានជំរុញឱ្យអាជ្ញាធរមូលដ្ឋាន ត្រូវមានភាពម្ចាស់ ការ ក្នុងពេលមានគ្រោះ មហន្តរាយធម្មជាតិកើតមានក្នុងភូមិសាស្ត្រខ្លួន ត្រូវធ្វើយ៉ាងណាកុំឱ្យមានផលប៉ះពាល់ដល់ប្រជាពលរដ្ឋ គឺត្រូវប្រើឱ្យអស់គ្រប់វិធានការ ក្នុងការដោះស្រាយជូនដល់ប្រជាពលរដ្ឋយើង រស់នៅមានភាពសុខសាន្ត ។
បើតាមការរៀបរាប់ពីលោក ព្រឿង ងិក ប្រជាពលរដ្ឋ ដែលមានទីលំនៅបច្ចុប្បន្ន ភូមិដានរុន ឃុំ ដានរុន ស្រុកសូទ្រនិគម ខេត្តសៀមរាប បានប្រាប់ នូវរសៀល ថ្ងៃទី១ ខែ តុលា ឆ្នាំ ២០២៥ នេះថា ចំពោះនៅស្រុក សូទ្រនិគម ខេត្តសៀម រាប ដែលមានភ្លៀង ធ្លាក់ខ្លាំង រយៈពេលប៉ុន្មានថ្ងៃជាប់គ្នានេះ បណ្តាលឱ្យ មានទឹកជំនន់លិច លើផ្លូវ គ្រួសក្រហម ផ្ទះប្រជាពល , សាលារៀន មណ្ឌលសុខភាព និង ផលប៉ះពាល់ ដំណាំដាំដុះ របស់ បងប្អូន ក្នុងភូមិដានរុន ឃុំ ដានរុន ស្រុកសូទ្រនិគម ខេត្តសៀមរាប ផងដែរ។
បើតាម លោក ឌី រ៉ាដូ អភិបាល រងខេត្ត បានបញ្ជាក់នៅថ្ងៃទី៣០ ខែកញ្ញា ឆ្នាំ២០២៥នេះ ថា ក្រុមការងារខេត្តបានចាប់ផ្ដើមប្រើប្រាស់គ្រឿងចក្រកាយស្ដារប្រព័ន្ធលូ និងប្រឡាយរំដោះទឹក នៅតាមបណ្ដោយផ្លូវជាតិលេខ៦ ចាប់ពីតំបន់ខាងលិចរង្វង់មូលផ្ការំដួលស្វាយធំ រហូតដល់អតីតទីតាំងភោជនីយដ្ឋានអាប៉ូឡូប្លាហ្សា ដើម្បីបង្កើនល្បឿនទឹកហូរ ក៏ដូចជារំដោះទឹក ដេីម្បីបញ្ចៀសបញ្ហាជំនន់ទឹកភ្លៀងនៅក្នុងភូមិសាស្ត្រប៉ែកខាងកើតក្រុងសៀមរាប និង ស្រុកប្រាសាទបាគង។
ការយកគ្រឿងចក្រមកកាយប្រព័ន្ធបង្ហូរទឹកភ្លៀងបន្ថែមនេះដេីម្បីបង្កេីនល្បឿនទឹកហូរចូលទៅក្នុងប្រព័ន្ធលូធំ គឺកុំឱ្យជន់លិចទីធ្លាសាធារណៈ ឬហូរចូលផ្ទះប្រជាពលរដ្ឋ។ តាមរយៈការដាក់លូថ្មី ឬពង្រីកលូដែលមានស្រាប់នៅតាមមុខផ្ទះនេះ អាចការពារផ្ទះសម្បែង ទ្រព្យសម្បត្តិ និងហេដ្ឋារចនាសម្ព័ន្ធផ្លូវ មិនឱ្យខូចខាតដោយសារជំនន់។
លោក ឈឿន វិចិត្រ អភិបាលរងស្រុកប្រាសាទបាគង បានបញ្ជាក់ថា មូលហេតុនៃការជន់លិចនេះ គឺដោយសារភ្លៀងធ្លាក់ជាប់គ្នាជាច្រើនថ្ងៃនិងទឹកហូរធ្លាក់មកពីឃុំអំពិលបណ្ដាលឱ្យជំនន់ទឹកភ្លៀងហក់ឡើងតាមបណ្ដោយផ្លូវជាតិលេខ៦ ក្នុងភូមិសាស្ត្រមួយចំនួននៃស្រុកប្រាសាទ បាគង ខេត្តសៀមរាប ផងដែរ។
លោក បន្ថែមថា បញ្ហាចម្បងមួយទៀតគឺ ប្រព័ន្ធលូរំដោះទឹកមានសភាពតូច ហេីយបញ្ហាទឹកធំ ដែលធ្វើឱ្យលំហូរទឹកមិនអាចរំដោះបានទាន់។ លោកអភិបាលរងស្រុក បញ្ជាក់ទៀតថា ក្រោយការស្ដារលូនេះ ក្រុមការងារខេត្តនឹងបន្តសម្រប សម្រួលជាមួយប្រជាពលរដ្ឋក្នុងការ ដាក់លូតាមមុខផ្ទះតាមលទ្ធភាពជាក់ស្ដែង។ ជាមួយគ្នានេះ លោកសូមសំណូមពរដល់ប្រជាពលរដ្ឋឱ្យចូលរួមទុកដាក់សំរាមឱ្យបានត្រឹមត្រូវ ដើម្បីកុំឱ្យមានការកកស្ទះនៅក្នុងលូ ដែលធ្វើឱ្យចរន្តនៃការហូររបស់ទឹកមានការរអាក់រអួល ៕
ចែករំលែកព័តមាននេះ