ខេត្តកំពង់ឆ្នាំង ៖ ការដ្ឋានបូមខ្សាច់មួយកន្លែងកំពុងប្រើគ្រឿងចក្រ និងរថយន្តច្រើនគ្រឿងដឹកបាវខ្សាច់ធំៗយកមកដាក់ទូរថភ្លើង ហើយដឹកចេញទៅក្រៅខេត្ត ដែលតាមព័ត៌មានពីក្រុមកម្មករថា ដឹកយកទៅខេត្តព្រះសីហនុ ។ ទីតាំងបូមខ្សាច់មួយកន្លែងនេះស្ថិតនៅចំណុចអូរឡេងតេង ស្ថិតនៅក្នុងភូមិក្រាំងស្គា…
ខេត្តកំពង់ឆ្នាំង ៖ ការដ្ឋានបូមខ្សាច់មួយកន្លែងកំពុងប្រើគ្រឿងចក្រ និងរថយន្តច្រើនគ្រឿងដឹកបាវខ្សាច់ធំៗយកមកដាក់ទូរថភ្លើង ហើយដឹកចេញទៅក្រៅខេត្ត ដែលតាមព័ត៌មានពីក្រុមកម្មករថា ដឹកយកទៅខេត្តព្រះសីហនុ ។ ទីតាំងបូមខ្សាច់មួយកន្លែងនេះស្ថិតនៅចំណុចអូរឡេងតេង ស្ថិតនៅក្នុងភូមិក្រាំងស្គា ឃុំក្រាំងស្គា ស្រុកទឹកផុស ខេត្តកំពង់ឆ្នាំង ។
តាមប្រភពព័ត៌មានពីប្រជាពលរដ្ឋគួរឱ្យជឿទុកចិត្តបាននិយាយថា អាជីវកម្មបូមយកខ្សាច់ខាងលើនេះ ជាកម្មសិទ្ធិរបស់ឈ្មោះ គង់ ម៉ៃ រស់នៅភូមិក្តុលសែនជ័យ ឃុំក្តុលសែនជ័យ ស្រុកទឹកផុស ខេត្តកំពង់ឆ្នាំង ពុំទាន់មានច្បាប់អនុញ្ញាតឲ្យធ្វើអាជីវកម្មនោះទេ ប៉ុន្តែក្រុមនេះបានលួចធ្វើសកម្មភាពដោយការដាក់ម៉ាស៊ីន បូមខ្សាច់ធំៗយកខ្សាច់រាប់ពាន់រាប់ម៉ឺនម៉ែត្រគូបយ៉ាងគគ្រឹកគគ្រេងច្រើនថ្ងៃមកហើយ ។ ចំណែកអាជ្ញាធរនៅមិនទាន់មានវិធានការបែបណានៅឡើយទេ រហូតមកដល់ថ្ងៃទី៣០ ខែកញ្ញា ឆ្នាំ២០២៥ ។
ជួបជាមួយភ្នាក់ងារសារព័ត៌មានកោះសន្តិភាព នៅរសៀលថ្ងៃទី៣០ ខែកញ្ញា ២០២៥ លោក ពៅ ស៊ីម ប្រធានមន្ទីររ៉ែ និងថាមពលខេត្តកំពង់ឆ្នាំង បានឲ្យដឹងថា លោកទើបទទួលព័ត៌មាននេះពីអភិបាលស្រុកទឹកផុសមុននេះបន្តិច ក្រោយពេលស្រាវជ្រាវ ហើយដឹងថាអាជីវកម្មបូមខ្សាច់នេះកំពុងដាក់សំណើសុំអាជ្ញាបណ្ណមកកាន់ការិយាល័យច្រកចេញ-ចូលតែមួយរបស់រដ្ឋបាលខេត្តកំពង់ឆ្នាំង ។ ប៉ុន្តែមិនទាន់ទទួលបានច្បាប់អនុញ្ញាតនៅឡើយនោះទេ គឺកំពុងតែស្ថិតនៅក្នុងការវាយតម្លៃរបស់មន្ទីរបរិស្ថានខេត្ត ព្រោះការបូមខ្សាច់នេះមានទំហំធំធេងណាស់ ។ ប៉ុន្តែបានប្រាប់ទៅមន្ត្រីការិយាល័យធនធានរ៉ែ និងថាមពលឲ្យពួកគាត់បញ្ឈប់សកម្មភាពនេះជាបណ្ដោះអាសន្នសិន ។
ទោះយ៉ាងណា ការលើកឡើងរបស់លោកប្រធានមន្ទីររ៉ែនិងថាមពលខេត្តកំពង់ឆ្នាំងយ៉ាងនេះក្តីក៏ប្រជាពលរដ្ឋយល់ឃើញថាមិនមែនលោក គង់ ម៉ៃ ម្ចាស់អាជីវកម្មបូមខ្សាច់ដ៏ធំធេងនេះមិនដឹងអំពីច្បាប់ទម្លាប់នោះទេ គឺមានចេតនាបំពានលើច្បាប់យ៉ាងប្រាកដ សង្ស័យដឹងចិត្តមន្ត្រីជំនាញទេដឹង ? ប្រៀបនឹងអត្ថន័យថាកាត់ក្បាលតម្រូវមួក ឬពាក្យមួយទៀតថា កូនកើតមុនឪ ពរតាដើរលេង ។
មហាជននិយាយថា បើគ្មានចំណាត់ការផ្លូវច្បាប់ឲ្យបានតឹងរឹងចំពោះអាជីវកម្មបូមខ្សាច់់ខាងលើនោះទេ ជាគម្រូអាក្រក់ និងរីករាលដាលដល់ម្ចាស់អាជីវកម្មខ្សាច់ផ្សេងទៀតយកគម្រូតាម វាអាចនឹងក្លាយជាជំងឺដំបៅមហារីក ព្យាបាលមិនជាតែម្ដង ព្រោះឈ្មួញបូមប៉ាតណាប៉ាតណីតាមចិត្តចង់ ៕
ចែករំលែកព័តមាននេះ