ទីក្រុងវ៉ាស៊ីនតោន៖ នៅទីបំផុត អាមេរិកត្រូវតែបង្ខំចិត្តបិទដំណើរការរដ្ឋាភិបាលមួយគ្រាសិន មានន័យថាមន្ត្រីបម្រើការនៅតាមក្រសួង-មន្ទីរនានាអាចឈប់សម្រាកមិនទៅធ្វើការ ឬទៅធ្វើការដោយមិនទទួលបានប្រាក់ខែព្រោះរដ្ឋាភិបាលអស់ថវិកាជាតិសម្រាប់បើកឱ្យពួកគេតទៅទៀតហើយ។ ស្ថានភាពនេះកើតឡើងបន្ទាប់ពីសមាជិកសភារបស់គណបក្សសាធារណរដ្ឋ និងគណបក្សប្រជាធិបតេយ្យមិនអាចនិយាយត្រូវរ៉ូវគ្នាទៅលើការអនុម័តកញ្ចប់ថវិកាសម្រាប់ប្រើប្រាស់។
បញ្ហានេះប៉ះពាល់ការបំពេញការងាររបស់រដ្ឋាភិបាលនៅខែតុលា ឬអាចនឹងបន្តទៅមុខទៀតបើបញ្ហានៅតែដោះស្រាយមិនចេញដដែល។ រដ្ឋាភិបាលអាចនឹងមិនបើកប្រាក់ខែសម្រាប់មន្ត្រីបម្រើការនៅតាមស្ថាប័នរដ្ឋប្រមាណ៨សែននាក់ ឬស្មើនឹង៤០%នៃមន្ត្រីរដ្ឋាភិបាលសរុបនៅទូទាំងប្រទេសអាមេរិកដែលធ្វើការអត់ប្រាក់ខែ។ តទៅនេះជាការព្យាករអំពីស្ថានការណ៍ក្រោយពេលបិទរដ្ឋាភិបាលតើនឹងមានរឿងអ្វីខ្លះកើតឡើង។
នៅក្នុងវិស័យអាកាសចរណ៍
ការបិទដំណើរការរដ្ឋាភិបាលនឹងបះពាល់អ្នកធ្វើដំណើរ។ ពួកគេអាចនឹងឈរតម្រង់ជួរគ្នាដ៏វែងអន្លាយ និងដ៏យូរអង្វែងដើម្បីរង់ចាំចេញដំណើរ។ ម៉្យាងទៀត ការចាកចេញដំណើរអាចនឹងត្រូវពន្យារពេលជាច្រើនលើកច្រើនសាដោយសារនៅតាមព្រលានយន្តហោះខ្វះខាតបុគ្គលិក។ ពួកគេសុខចិត្តដេកនៅផ្ទះឱ្យស្រណុកខ្លួនជាជាងទៅធ្វើការអត់ប្រាក់ខែ។
ជាទូទៅអ្នកបម្រើការផ្នែកគ្រប់គ្រងសុវត្ថិភាពធ្វើដំណើរតាមផ្លូវអាកាសត្រូវគេគិតថាជាមនុស្សសំខាន់ដែលខ្វះមិនបាន។ ហេតុនេះ ពួកគេប្រាកដជាទៅធ្វើការទោះបីរដ្ឋាភិបាលត្រូវបិទដំណើរការក៏ដោយ។ ប៉ុន្តែពួកគេមិនទាន់បានប្រាក់ខែទេរហូតទាល់តែរដ្ឋាភិបាលបើកដំណើរការឡើងវិញ (មានថវិកាជាតិប្រើប្រាស់)។ សូមរំលឹកថាកាលពីពេលរដ្ឋាភិបាលបិទដំណើរការនៅឆ្នាំ២០១៨ និងឆ្នាំ២០១៩ បុគ្គលិកបម្រើការផ្នែកនេះចាប់ផ្ដើមដាក់ច្បាប់សូមឈប់សម្រាកព្យាបាលជំងឺ។
កាលនោះធ្វើឱ្យសេវាកម្មនៅតាមព្រលានយន្តហោះត្រូវពន្យារពេលជាច្រើនលើកច្រើនសា។ ផលប៉ះពាល់ដោយសារការបិទរដ្ឋាភិបាលក៏ប៉ះពាល់ចំពោះគម្រោងរបស់ពលរដ្ឋអាមេរិកាំងដែលចង់ធ្វើដំណើរទៅលេងក្រៅប្រទេស។ ទីភ្នាក់ងារធ្វើលិខិតឆ្លងដែនអាមេរិកថ្លែងថាពួកគេត្រូវការពេលវេលាយូរដើម្បីរៀបចំឯកសារជូនអ្នកដាក់ពាក្យស្នើសុំ។
មន្ត្រីរដ្ឋាភិបាលសហព័ន្ធមិនទៅធ្វើការព្រោះអត់លុយ
មន្ត្រីរដ្ឋាភិបាលសហព័ន្ធជាក្រុមដែលរងគ្រោះខ្លាំងជាងគេពីការបិទរដ្ឋាភិបាលព្រោះពួកគេនឹងមិនទទួលបានការទូទាត់ប្រាក់ខែឱ្យទេនៅអំឡុងពេលបិទដំណើរការ។ ដូច្នេះ ដើម្បីដោះស្រាយជីវភាពប្រចាំថ្ងៃមន្ត្រីរដ្ឋាភិបាលខ្លះអាចនឹងស្វែងរកការងារបន្ទាប់បន្សំសម្រាប់ធ្វើមួយគ្រាសិនគ្រាន់យកលុយចិញ្ចឹមជីវិត។ កាលពីពេលបិទរដ្ឋាភិបាលឆ្នាំ២០១៨-២០១៩ ពួកគេក៏ធ្លាប់អនុវត្តវិធីនេះផងដែរ។ បុគ្គលិកដែលគេគិតថាគ្រាន់តែជាមនុស្សរាយរង មិនសូវសំខាន់ណាស់ណាទេ គេត្រូវធីបពួកគាត់ចោលសិន មានន័យថាបង្ខំឱ្យពួកគាត់ស្នាក់នៅតែក្នុងផ្ទះ។
ស្ថាប័នមួយចំនួនដូចជាមជ្ឈមណ្ឌលគ្រប់គ្រង និងបង្ការជំងឺឆ្លង និងវិទ្យាស្ថានជាតិសុខភាពអាចនឹងមានករណីបុគ្គលិកទៅធ្វើការអត់ប្រាក់ខែមិនតិចនាក់ឡើយ ដូច្នេះនឹងប៉ះពាល់ការសិក្សាស្រាវជ្រាវ-ពិសោធដែលកំពុងដំណើរការ។ លោកត្រាំចាប់តាំងពីឡើងកាន់អំណាចបានកាត់បន្ថយខ្ទង់ថវិកាចំណាយលើស្ថាប័នដែលលោកយល់ថាមិនសូវសំខាន់។ នៅក្នុងបញ្ហាបិទដំណើរការរដ្ឋាភិបាលលើកនេះ លោកព្រមានថាលោកអាចនឹងកាត់បន្ថយសេវា និងកម្មវិធីរបស់រដ្ឋជាច្រើនទៀត។ ជាពិសេសកាត់កម្មវិធីដែលគណបក្សប្រជាធិបតេយ្យយល់ថាសំខាន់។
សួនឧទ្យានជាតិគ្មានបុគ្គលិកធ្វើការ
ដីសាធារណៈរបស់រដ្ឋរួមទាំងសួនឧទ្យានជាតិ និងព្រៃអភិរក្សជាតិ បានបិទដំណើរការមិនទទួលភ្ញៀវទេសចរចូលលំហែកាយ ឬដើរលេងកម្សាន្តទេកាលពីពេលបិទដំណើរការរដ្ឋាភិបាលលើកមុន។ មន្ត្រីឧទ្យានុរក្សត្រូវថ្នាក់លើប្រាប់ឱ្យឈប់សម្រាកនៅផ្ទះចុះ។ កាលពីពេលបិទរដ្ឋាភិបាលលើកមុន លោកត្រាំបានសម្រេចចិត្តបើកចំហសួនឧទ្យានជាតិនានាឱ្យបើកចំហចោល។ កន្លែងខ្លះមានបុគ្គលិកធ្វើការត្រឹមតែបន្តិចបន្តួចប៉ុណ្ណោះ និងកន្លែងខ្លះគ្មានបុគ្គលិកសូម្បីតែម្នាក់។
ក្រុមអ្នកសង្កេតការណ៍យល់ថាធ្វើដូច្នេះនាំមានអំពើបំផ្លិចបំផ្លាញទ្រព្យសម្បត្តិរបស់រដ្ឋនៅក្នុងសួនឧទ្យាន។ អ្នកទេសចរដែលចូលទៅកម្សាន្តនៅទីនោះដោយសារគ្មានអ្នកណាមើលការខុសត្រូវ ម៉្លោះហើយពួកគេបើកបរយ៉ាងអនាធិបតេយ្យពាសវាលពាសកាល។ ជួនកាល ជនឱកាសនិយមលួចរបស់របរនៅទីតាំងប្រវត្តិសាស្ត្រ និងពង្រាយសំរាមឡើងគរពេញហ្នឹង។ ដូច្នេះលើកនេះក្រុមឧទ្យានុរក្សដែលធ្លាប់បម្រើការផ្នែកនេះបានស្នើសុំថាបើបានជាបិទដំណើរការរដ្ឋាភិបាលទៅហើយ គួរណាស់បិទដំណើរការឧទ្យានជាតិទាំងស្រុងតែម្ដងទៅ៕
ចែករំលែកព័តមាននេះ