ខេត្តកំពង់ស្ពឺ ៖ ក្រុមកម្មករដឹកជញ្ជូនចំណីសត្វក្នុងឃ្លាំងស្តុកមួយកន្លែង ស្ថិតនៅភូមិត្រពាំងស្លា ឃុំព្រះនិព្វាន ស្រុកគងពិសី ខេត្តកំពង់ស្ពឺ បានដាក់ពាក្យបណ្ដឹងទៅសាលាឃុំព្រះនិព្វាន ដើម្បីឲ្យជួយដោះស្រាយ ករណីថៅកែជាជនជាតិវៀតណាម…
ខេត្តកំពង់ស្ពឺ ៖ ក្រុមកម្មករដឹកជញ្ជូនចំណីសត្វក្នុងឃ្លាំងស្តុកមួយកន្លែង ស្ថិតនៅភូមិត្រពាំងស្លា ឃុំព្រះនិព្វាន ស្រុកគងពិសី ខេត្តកំពង់ស្ពឺ បានដាក់ពាក្យបណ្ដឹងទៅសាលាឃុំព្រះនិព្វាន ដើម្បីឲ្យជួយដោះស្រាយ ករណីថៅកែជាជនជាតិវៀតណាម និងបានចោទថា បានជិះជាន់កម្លាំងពលកម្មរបស់ពួកគាត់ជាកម្មករ ។
នៅក្នុងបណ្ដឹងរបស់ក្រុមកម្មករ បានសំណូមពរឱ្យថៅកែជាជនជាតិវៀតណាម គោរពទៅតាមច្បាប់ការងាររបស់ប្រទេសកម្ពុជាឲ្យបានត្រឹមត្រូវ ជាពិសេសបញ្ហាម៉ោងពេលវេលាធ្វើការងារឲ្យបានត្រឹមត្រូវ មិនត្រូវធ្វើអ្វីតាមតែអំពើចិត្ត ឬត្រូវដេញចោល ដេញចេញតាមចិត្តរបស់ខ្លួន មិនមានច្បាប់ទម្លាប់ត្រឹមត្រូវនោះទេ ។
សូមបញ្ជាក់ថា បើតាមការអះអាងរបស់កម្មករចំណីសត្វប្រាប់អ្នកកាសែតថា ថៅកែមិនបាននៅក្នុងប្រទេសកម្ពុជាទេ គឺនៅតែមេការជាអ្នកទទួលខុសត្រូវ ជាអ្នកគាបសង្កត់ទៅលើក្រុមកម្មករ ។
តាមការបញ្ជាក់ជាច្រើនទៀតថា ការដឹកសម្ភារៈចំណីសត្វនេះ គឺយកមកពីក្រៅប្រទេស មិនដឹងថាយកមកពីប្រទេសណាទេ យកមកលាក់ទុកនៅក្នុងឃ្លាំងនេះជាច្រើន រាប់ម៉ឺនបាវដូចជារោងចក្រមួយទៅហើយ ។ ហើយក៏គ្មានយីហោច្បាស់លាស់នោះដែរ ។ ឃ្លាំងនេះស្ថិតនៅក្នុងភូមិត្រពាំងស្លា ឃុំព្រះនិព្វាន ស្រុកគងពិសី ខេត្តកំពង់ស្ពឺ ។
តាមការបញ្ជាក់របស់កម្មករបានឱ្យដឹងថា មានជនជាតិវៀតណាមនៅក្នុងរោងចក្រនេះជាច្រើននាក់ ដែលបានដឹកជញ្ជូនមកពីក្រៅប្រទេស ហើយក៏មិនមែនមានតែមួយកន្លែងនេះដែរ គឺមានច្រើនកន្លែងទៀត ។
ពាក់ព័ន្ធនឹងការលើកឡើងរបស់ក្រុមកម្មករខាងលើ លោក ទឹម តុន ជំទប់ទី១ឃុំព្រះនិព្វាន បានឱ្យដឹងតាមទូរស័ព្ទថា ពិតជាមានរឿងក្រុមកម្មករចំនួន៥១នាក់ បានដាក់ពាក្យបណ្តឹងថៅកែក្រុមហ៊ុន ជីខេ ដូទ្រីស៊ិន(ខេមបូឌា)ឯ.ក មកសាលាឃុំ ដើម្បីឱ្យជួយអន្តរាគមន៍ដោះស្រាយពិតប្រាកដមែន ។
នៅក្នុងពាក្យបណ្តឹងនោះលោកថា ក្នុងនាមរដ្ឋបាលឃុំ លោកក៏បានធ្វើការទំនាក់ទំនងជាមួយខាងមន្ទីរការងារ និងបណ្តុះបណ្តាលវិជ្ជាជីវៈខេត្តកំពង់ស្ពឺ សុំឱ្យកោះហៅថៅកែមកធ្វើការដោះស្រាយ នៅព្រឹកថ្ងៃទី០១ ខែតុលា ឆ្នាំ២០២៥ នេះហើយ ប៉ុន្តែដោយលោកជាប់រវល់ប្រជុំលោកមិនទាន់បានទទួលព័ត៌មាននោះទេ ។ ខាងមន្ទីរការងារជាអ្នកធ្វើការដោះស្រាយ ។
ដោយឡែកលោក ចឹក បូរិន ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តកំពង់ស្ពឺ បានឱ្យដឹងតាមប្រព័ន្ធតេឡេក្រាមថា រឿងនេះមន្ត្រីរបស់លោកកំពុងធ្វើការសម្របសម្រួលហើយ តែលទ្ធផលបែបណានោះ លោកមិនទាន់ឱ្យដឹងលម្អិតនៅឡើយទេ ៕
ចែករំលែកព័តមាននេះ