ទីក្រុងម៉ានីឡា៖ ចំនួនអ្នកស្លាប់ដោយសារគ្រោះរញ្ជួយដីនៅប្រទេសហ្វ៊ីលីពីនបានកើនឡើងដល់៦៩នាក់ហើយ។ រដ្ឋាភិបាលកំពុងបញ្ជាទៅស្ថាប័ននានាដើម្បីស្វែងរកអ្នកដែលអាចនៅរស់រានមានជីវិត និងតភ្ជាប់បណ្ដាញទឹក និងភ្លើងអគ្គិសនីឡើងវិញ។ នៅទីក្រុងបូហ្គោ (Bogo) ភាគខាងជើងខេត្តស៊ីប៊ូ (Cebu) ដែលស្ថិតនៅកៀកនឹងចំណុចកណ្ដាលនៃការរញ្ជួយដីកម្រតិ៦,៩រ៉ិចទ័រនោះ…
ទីក្រុងម៉ានីឡា៖ ចំនួនអ្នកស្លាប់ដោយសារគ្រោះរញ្ជួយដីនៅប្រទេសហ្វ៊ីលីពីនបានកើនឡើងដល់៦៩នាក់ហើយ។ រដ្ឋាភិបាលកំពុងបញ្ជាទៅស្ថាប័ននានាដើម្បីស្វែងរកអ្នកដែលអាចនៅរស់រានមានជីវិត និងតភ្ជាប់បណ្ដាញទឹក និងភ្លើងអគ្គិសនីឡើងវិញ។ នៅទីក្រុងបូហ្គោ (Bogo) ភាគខាងជើងខេត្តស៊ីប៊ូ (Cebu) ដែលស្ថិតនៅកៀកនឹងចំណុចកណ្ដាលនៃការរញ្ជួយដីកម្រតិ៦,៩រ៉ិចទ័រនោះ មន្ទីរពេទ្យពេញប្រៀបដោយអ្នករបួស។
ការរញ្ជួយដីនេះកើតឡើងនៅតំបន់មាត់សមុទ្រនៃទីក្រុងបូហ្គោនៅមុនម៉ោងដប់យប់ថ្ងៃអង្គារបណ្ដាលឱ្យដាច់ភ្លើង និងបាក់អគារ។ វិហារសាសនាគ្រិស្តដែលមានអាយុកាលជាង១០០ឆ្នាំក៏ត្រូវខូចខាតផងដែរ។ ខេត្តស៊ីប៊ូជាតំបន់ទេសចរណ៍ដ៏ពេញនិយមបំផុតមួយរបស់ហ្វ៊ីលីពីន និងមានប្រជាជនរស់នៅ៣,៤លាននាក់។ ទោះបីមានគ្រោះធម្មជាតិបែបនេះក្ដី ប៉ុន្តែអាកាសយានដ្ឋានម៉ាក់តាន់ ស៊ីប៊ូ អ៊ីនធឺណេសិនណល អ៊ែរផត (Mactan-Cebu International Airport) នៅតែបើកដំណើរការជាធម្មតា។
ការរញ្ជួយដីលើកនេះវាយប្រហារខ្លាំងជាងគេទៅលើខេត្តស៊ីប៊ូភាគខាងជើងរួមទាំងតំបន់សាន់ រ៉េមីជីអូ (San Remigio) ផងដែរ។ ទីនេះត្រូវអាជ្ញាធរដាក់នៅក្នុងស្ថានភាពអាសន្នធំដែលត្រូវការការជួយសង្គ្រោះជាបន្ទាន់។ ទោះបីការរញ្ជួយដីកន្លងផុតទៅជាច្រើនម៉ោងហើយក្ដី ប៉ុន្តែនៅមានការរញ្ជួយ ឬរំញ័រកម្រិតតូចៗរាប់រយករណី ជាហេតុធ្វើឱ្យអ្នកស្រុកនៅតំបន់នោះមិនអាចដេកពួនបានស្រួលឡើយពេញមួយរាត្រី។
គេឃើញបុគ្គលិកបម្រើការនៅតាមមន្ទីរពេទ្យក្បែរនោះចាប់ផ្ដើមលើកសាកសពជនរងគ្រោះដាក់ចូលទៅក្នុងថង់ពណ៌ខ្មៅ និងសែងបញ្ចូលឡានដើម្បីដឹកបន្តទៅកាន់ឈាបនដ្ឋាន។ អាជ្ញាធរប្រាប់ថាពួកគេទទួលបានរបាយការណ៍ថាសាកសពមួយចំនួនទៀតត្រូវបានរកឃើញជាបន្តបន្ទាប់ ដូច្នេះចំនួនអ្នកស្លាប់នឹងកើនឡើងច្រើនជាងនេះ។ ក្រុមប្រឹក្សាជាតិទទួលបន្ទុកខាងដោះស្រាយគ្រោះមហន្តរាយប្រាប់ថាមនុស្ស១៤៧នាក់រងរបួសនៅតាមបណ្ដាកោះនានាភាគកណ្ដាល។ អគារ២២ខ្នងត្រូវខូចខាត។
ក្រុមអ្នកជួយសង្គ្រោះប្រាប់ថាពួកគេគ្មានបានដេកពួនអ្វីទេពេញមួយយប់ព្រោះរវល់តែស្វែងរកអ្នករបួស និងអ្នកស្លាប់។ ពេលខ្លះដឹកអ្នករបួសទៅដល់មន្ទីរពេទ្យត្រូវពេទ្យប្រាប់ថាគេឈប់ទទួលហើយព្រោះមន្ទីរពេទ្យចង្អៀតខ្លាំងមែនទែន៕
ចែករំលែកព័តមាននេះ