ខេត្តកំពង់ចាម ៖ «កម្លាំងសមត្ថកិច្ចគ្រប់ប្រភេទ ត្រូវតែបន្តយកចិត្តទុកដាក់ក្នុងការបង្ក្រាបក្មេងទំនើង បទល្មើសគ្រឿងញៀន ព្រមទាំងបទល្មើសផ្សេងទៀតនៅក្នុងមូលដ្ឋានរបស់ខ្លួន ស្របតាមគោលនយោបាយភូមិ-ឃុំមានសុវត្ថិភាព របស់ក្រសួងមហាផ្ទៃ» ។ នេះជាការលើកឡើងរបស់់ឯកឧត្តម…
ខេត្តកំពង់ចាម ៖ «កម្លាំងសមត្ថកិច្ចគ្រប់ប្រភេទ ត្រូវតែបន្តយកចិត្តទុកដាក់ក្នុងការបង្ក្រាបក្មេងទំនើង បទល្មើសគ្រឿងញៀន ព្រមទាំងបទល្មើសផ្សេងទៀតនៅក្នុងមូលដ្ឋានរបស់ខ្លួន ស្របតាមគោលនយោបាយភូមិ-ឃុំមានសុវត្ថិភាព របស់ក្រសួងមហាផ្ទៃ» ។ នេះជាការលើកឡើងរបស់់ឯកឧត្តម អ៊ុន ចាន់ដា អភិបាលខេត្ត នៅក្នុងឱកាសប្រជុំគណៈបញ្ជាការឯកភាពខេត្ត កាលពីព្រឹកថ្ងៃទី៣០ ខែកញ្ញា ឆ្នាំ២០២៥ នៅសាលប្រជុំធំសាលាខេត្ត ដោយមានការចូលរួមពីអភិបាលស្រុក-ក្រុងទាំង១០ និងប្រធានមន្ទីរនានាជុំវិញខេត្ត ។
លោកឧត្តមសេនីយ៍ត្រី ថេង ឆេងលីម មេបញ្ជាការកងរាជអាវុធហត្ថខេត្ត បានលើកឡើងថា នៅក្នុងខែកញ្ញានេះ បទល្មើសត្រូវបានបង្ក្រាបចំនួន៣ករណី ស្មើនឹង៦លើក ក្នុងនោះមានក្មេងទំនើង៣លើក គ្រឿងញៀន២លើក ការរក្សាទុក និងប្រើប្រាស់សារធាតុញៀនដោយខុសច្បាប់១លើក ។ ជាពិសេស ដោយអនុវត្តតាមបទបញ្ជាសម្ដេចបវរធិបតី កម្លាំងអាវុធហត្ថខេត្តបានបង្ក្រាបក្រុមក្មេងទំនើងជាបន្តបន្ទាប់និងជាច្រើនករណីនាពេលកន្លងទៅ។
លោកមេបញ្ជាការកងរាជអាវុធហត្ថខេត្ត ឲ្យដឹងទៀតថា ជាក់ស្ដែងនៅថ្ងៃទី២៩ ខែកញ្ញា ឆ្នាំ២០២៥ ក្រុមក្មេងទំនើងបង្ក្រាបបានចំនួន៣ករណី ក្នុងនោះនៅវេលាម៉ោង៦ល្ងាចបង្ក្រាបបាន១ករណី នៅវេលាម៉ោង៨យប់បង្ក្រាបបាន១ករណី ដែលពួកគេប្រើប្រាស់ម៉ូតូកែច្នៃសំឡេងថ្លង់ខុសបច្ចេកទេស ។ ក្រុមក្មេងទំនើងទាំងនេះ មានមកពីខេត្តត្បូងឃ្មុំ ខេត្តក្រចេះ ខេត្តកំពង់ធំនិងរាជធានីភ្នំពេញ ។ ជាគោលការណ៍ ក្នុងវិធានការអប់រំ ម៉ូតូដែលកែច្នៃខុសបច្ចេកទេស លើកទី១ រក្សាទុកម៉ូតូរយៈពេល៣ខែ លើកទី២ រយៈពេល៦ខែ ។
ដោយមានការណែនាំពីឯកឧត្តម អ៊ុន ចាន់ដា អភិបាលខេត្ត កម្លាំងមន្ត្រីក្រោមឱវាទបានចុះផ្សព្វផ្សាយតាមវត្តអារាម សាលារៀន ដល់ប្រជាជនក៏ដូចជាសិស្សានុសិស្ស យល់ដឹងពីផលប៉ះពាល់នៃគ្រឿងញៀន និងក្រុមក្មេងទំនើង ធ្វើយ៉ាងណាទប់ស្កាត់មិនឱ្យមាននៅក្នុងមូលដ្ឋានរបស់ខ្លួន ។
ឯកឧត្តម អ៊ុន ចាន់ដា អភិបាលខេត្ត មានប្រសាសន៍លើកឡើងថា តាមរបាយការណ៍របស់ស្នងការដ្ឋាននគរបាលខេត្ត គឺគ្រោះថ្នាក់ចរាចរណ៍ម៉ូតូចំនួន៨ករណី ក្នុងនោះបណ្ដាលឲ្យស្លាប់៩នាក់ ។ គ្រោះថ្នាក់ទាំងនេះ កើតឡើងដោយសារអ្នកបើកបរមិនពាក់មួកសុវត្ថិភាព ។មួយវិញទៀត ពេលដែលមានមន្ត្រីអនុវត្តច្បាប់ចរាចរណ៍តាមដងផ្លូវនៅក្នុងភូមិសាស្ត្រខេត្តកំពង់ចាម អ្នកខ្លះជាមន្ត្រីរាជការ បានធ្វើដំណើរឆ្លងកាត់កន្លែងត្រួតពិនិត្យចរាចរណ៍ ដោយបំពានច្បាប់ឌឺដាក់សមត្ថកិច្ចទៀតផង ។ ដូច្នេះចាប់ពីពេលនេះតទៅ ប្រធានមន្ទីរអង្គភាពនីមួយៗក្នុងខេត្តកំពង់ចាម ធ្វើយ៉ាងណាជួយប្រាប់ដល់មន្ត្រីរបស់ខ្លួន កុំឲ្យមានបាតុភាពបែបនេះបន្តទៀត ។
ឯកឧត្តមអភិបាលខេត្តបានបញ្ជាក់ថា ក្នុងរយៈពេល៣ថ្ងៃ គឺមានភ្ញៀវជាតិ និងអន្តរជាតិមកលេងនៅខេត្តកំពង់ចាម តាមរមណីយដ្ឋាននានាក្នុងឱកាសបុណ្យភ្ជុំបិណ្ឌ រហូតដល់ជាង ២១ម៉ឺននាក់ ជាចំនួនមួយដែលច្រើន ។ ប៉ុន្តែក៏មានលេចបាតុភាពអសកម្មកើតឡើងនៅរមណីយដ្ឋានទឹកឆា ក្នុងស្រុកព្រៃឈរ បានដំឡើងថ្លៃតូប និងម្ហូបអាហារ ធ្វើឲ្យភ្ញៀវមួយចំនួនមិនសប្បាយចិត្ត ។ ដូច្នេះមន្ទីរទេសចរណ៍ ត្រូវតែចុះណែនាំថ្ងៃក្រោយកុំឲ្យមានបន្តទៀត បើមានត្រូវដេញអ្នកលក់នោះឈប់ឱ្យធ្វើអាជីវកម្ម ៕
ចែករំលែកព័តមាននេះ