រាជធានីភ្នំពេញ​៖ កម្ពុជា និងសហរដ្ឋអាម៉េរិក បានពិភាក្សាការងារដើម្បីពង្រឹង និងពង្រីកកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគទ្វេភាគី។

យោងតាមការចុះផ្សាយរបស់ក្រសួងពាណិជ្ជកម្ម បានឱ្យដឹងថា នារសៀលថ្ងៃ​ទី២៦ ខែកញ្ញា ឆ្នាំ២០២៥ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានទទួលជួប និងពិភាក្សាការងារជាមួយគណៈប្រតិភូសភាសហរដ្ឋអាមេរិក ដឹកនាំដោយឯកឧត្តម Adam Smith សមាជិកសភាសហរដ្ឋអាម៉េរិក និងជាសមាជិកគណៈកម្មាធិការកិច្ចការការពាររបស់សភាជាតិ, ឯកឧត្តម Michael Baumgartner សមាជិកសភាសហរដ្ឋអាម៉េរិក និងជាសមាជិកគណៈកម្មាធិការកិច្ចការបរទេសនៃសភាជាតិ, និងលោកជំទាវ Chrissy Houlahan សមាជិកសភាសហរដ្ឋអាម៉េរិក និងជាសមាជិកគណៈកម្មាធិការកិច្ចការការពាររបស់សភាជាតិ ដើម្បីពង្រឹង និងពង្រីកកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគទ្វេភាគី។

យោង​តាម​ទិន្នន័យ​របស់​អគ្គ​នា​យក​ដ្ឋាន​​គយ និង​រដ្ឋាករ​កម្ពុជា ​​បង្ហាញ​ថា គិត​ចាប់​ពី​ខែ​មករា ដល់ខែសីហា ឆ្នាំ ២០២៥ ការ​ដោះ​ដូរ​ទំ​និញ​​​រវាង​កម្ពុជា និង​អាម៉េរិក សម្រេច​បាន​ ៨,៥ ​ពាន់​លានដុល្លារ ​កើនឡើង ២៣,៦% ​ក្នុង​នោះ កម្ពុជា​នាំ​ទំនិញ​ចេញ​ទៅ​អាម៉េរិក​មាន​ទំហំ​ទឹកប្រាក់​ជាង ៨ ពាន់លានដុល្លារ កើនឡើង ២៣,២% ​ចំណែក​អាម៉េរិក​នាំចូល​មក​វិញ ​មាន​ទឹកប្រាក់​ ២៤៣ លានដុល្លារ កើន ៣៩,៨%។

​ទំនិញ​ដែល​កម្ពុជា​នាំចេញ​ទៅ​អាម៉េរិក​មាន​ដូចជា សម្លៀកបំពាក់ សម្ភារធ្វើដំណើរ កង់ និង​សម្ភារ​ប្រើប្រាស់មួយចំនួនទៀត។ ចំណែក​អាម៉េរិក​នាំចូល​មកវិញ មាន​ដូច​ជារថយន្ត គ្រឿង​យន្ត គ្រឿង​អលង្ការ គ្រឿង​សំអាង សម្ភារ​អគ្គិសនី អេឡិចត្រូនិក និង​សម្ភារ​ប្រើប្រាស់​មួយ​ចំនួន​ទៀត៕