រាជធានីភ្នំពេញ ៖ ផ្ទះវីងវេរលុយនិងដូរលុយមួយកន្លែងត្រូវបានក្រុមជនសង្ស័យកាត់ជញ្ជាំងសង្ក័សីចូលគាស់ផ្ទះយកលុយ និងទ្រព្យសម្បត្តិមានតម្លៃអស់មួយចំនួនធំ បង្កឲ្យមានការភ្ញាក់ផ្អើលនៅវេលាម៉ោង៩យប់ថ្ងៃទី២៥ខែកញ្ញាឆ្នាំ២០២៥ ចំនុចផ្ទះវីងវេរលុយនិងដូរលុយ យីហោ ចែឃី ស្ថិតតាមបណ្ដោយផ្លូវ២០០៤ សង្កាត់អូរបែកក្អម…
រាជធានីភ្នំពេញ ៖ ផ្ទះវីងវេរលុយនិងដូរលុយមួយកន្លែងត្រូវបានក្រុមជនសង្ស័យកាត់ជញ្ជាំងសង្ក័សីចូលគាស់ផ្ទះយកលុយ និងទ្រព្យសម្បត្តិមានតម្លៃអស់មួយចំនួនធំ បង្កឲ្យមានការភ្ញាក់ផ្អើលនៅវេលាម៉ោង៩យប់ថ្ងៃទី២៥ខែកញ្ញាឆ្នាំ២០២៥ ចំនុចផ្ទះវីងវេរលុយនិងដូរលុយ យីហោ ចែឃី ស្ថិតតាមបណ្ដោយផ្លូវ២០០៤ សង្កាត់អូរបែកក្អម ខណ្ឌសែនសុខ រាជធានីភ្នំពេញ ។
ប្រភពព័ត៌មានបានអោយដឹងថា មុនពេលកើតហេតុ គឺផ្ទះកើតហេតុបានចាក់សោចោល ដោយម្ចាស់ផ្ទះគឺជាមន្ត្រីយោធាបានទៅកន្លែងធ្វើការ ចំណែកស្ត្រីជាប្រពន្ធនិងកូនៗ បានចេញទៅក្រៅដូចគ្នា លុះដល់វេលាម៉ោងកើតហេតុ ម្ចាស់ផ្ទះរួមទាំងកូនៗ បានត្រឡប់មកវិញ ក៏ចាក់សោចូលទៅក្នុងផ្ទះ ស្រាប់តែផ្ទះមានសភាពមិនប្រក្រតី រប៉ាត់រប៉ាយ ហើយទៅមើលទ្វារខាងក្រោយរបើក និងជញ្ជាំងសង្ក័សីខាងក្រោយចំហៀងផ្ទះជាប់ដីឡូត៍ទុកចោលមានស្នាមកាត់រហែកផងដែរ ។
តាមប្រភពព័ត៌មានបានបន្តទៀតថា បន្ទាប់ពីដឹងថាមានជនសង្ស័យគាស់ផ្ទះ ហើយមានការបាត់បង់ប្រាក់មួយចំនួនធំ រួមទាំងសំភារៈរបស់មានតម្លៃមួយចំនួន និងអាវុធខ្លី១ដើម ។ ម្ចាស់ផ្ទះបានរាយការណ៍ជូនកម្លាំងសមត្ថកិច្ចមូលដ្ឋាន មានទាំងកម្លាំងព្រហ្មទណ្ឌខណ្ឌសែនសុខ និងកម្លាំងការិយាល័យព្រហ្មទណ្ឌកំរិតស្រាល បានចុះទៅកន្លែងកើតហេតុ ធ្វើការឡោមព័ទ្ធទីតាំងខាងលើ ដើម្បីស្វែងរកជនសង្ស័យ តែមិនមិនថាជនសង្ស័យគេចខ្លួនតាំងពីពេលណានោះទេ ។
ពាក់ព័ន្ធនឹងហេតុការណ៍ខាងលើនេះ កូនស្រីរបស់ម្ចាស់ផ្ទះកើតហេតុមានអារម្មណ៍តក់ស្លុតរហូតសន្លប់បានបញ្ជូនទៅមន្ទីរពេទ្យ ចំណែកបុរសជាម្ចាស់ផ្ទះ ត្រូវបានសមត្ថកិច្ចហៅទៅបំភ្លឺសួរនាំនិងដាក់ពាក្យបណ្ដឹងនៅប៉ុស្តិ៍នគរបាលរដ្ឋអូបែកក្អមផងដែរ ។ ម្ចាស់ផ្ទះមិនទាន់អាចបញ្ជាក់ថា ការបាត់បង់ទ្រព្យសម្បត្តិមានចំនួនសរុបប៉ុន្មានអោយប្រាកដនៅឡើយទេ ៕
ចែករំលែកព័តមាននេះ