រាជធានី​ភ្នំពេញ ៖ រថយន្ត​ស៊េរី​ទំនើប​ម៉ាក​Jeep​មួយ​គ្រឿង បើក​បោះពួយ​ជ្រុល​ទៅ​បុក​ជាមួយ​រថ​យន្ត​Toyota Prius និង​បន្ត​ទៅ​បុក​ជាមួយ​ម៉ូតូ​មួយ​គ្រឿង​ទៀត បណ្តាល​ឲ្យ​រង​ការ​ខូចខាត និង​ធ្វើ​ឱ្យ​រថយន្តJeep​ឆេះ​យ៉ាង​សន្ធោសន្ធៅ​រង​ការ​ខូចខាត​ទាំងស្រុង ដែល​ហេតុការណ៍​កើតឡើង​នៅ​វេលា​ម៉ោង​២​ និង​២០​នាទី​រំលង​អធ្រាត្រ ​ឈាន​ចូល​ថ្ងៃ​ទី​២៥ កញ្ញា ឆ្នាំ​២០២៥ ស្ថិត​នៅ​ស្តុ​បណត​ប្រ៊ី​ត លើ​ផ្លូវ​២០០៤ សង្កាត់​អូរ​បែក​ក្អម ខណ្ឌ​សែន​សុខ ។

ប្រភព​ព័ត៌មាន​បានអោយ​ដឹង​ថា គេ​បានឃើញ​រថយន្ត​មួយ​គ្រឿង​ម៉ាក Toyota Prius ពណ៌​ប្រផេះ ជិះ​ដោយ​បុរស​២​នាក់ និង​ម៉ូតូ​ម៉ូតូ​ហុងដា Click ពណ៌​ខ្មៅ​ជិះ​បុរស​ម្នាក់ ដោយ​មធ្យោបាយ​ទាំង​២​ធ្វើ​ដំណើរ​តាម​បណ្ដោយ​ផ្លូវ​ណ​ត​ប្រ៊ី​ត ក្នុង​ទិស​ដៅ​ពី​ជើង​ទៅ​ត្បូង ។ លុះ​មក​ដល់​ចំណុច​កើតហេតុ​ជា​ផ្លូវបំបែក​ជា​បួន ក៏​បាន​បត់​ឆ្វេង​ឡើង​ទៅ​ផ្លូវ​២០០៤ គាប់​ជួន​ពេល​នោះ​ ក៏​ស្រាប់តែ​បុរស​២​នាក់ រួម​ដំណើរ​ជាមួយ​និង​នារី​ម្នាក់​បាន​បើករថយន្ត​ស៊េរី​ទំនើប​ម៉ាក​Jeep ពណ៌​ខ្មៅ បើក​បោះពួយ​តាម​បណ្ដោយ​ផ្លូវ​២០០៤ ​ទិស​ដៅ​ពី​កើត​ទៅ​លិច​ក្នុង​ល្បឿន​លឿន​ជាន់​ហ្វ្រាំង​មិន​ទាន់​ក៏​ជ្រុល​ទៅ​បុក​បញ្ឆិត​និង​រថយន្តToyota Priusរួម​ទាំង​ម៉ូតូ Click បណ្តាល​ឲ្យ​រង​ការ​ខូចខាត រថយន្តToyota Priusមួយ​ចំហៀង​ខាងឆ្វេង ចំណែក​ម៉ូតូ​រង​ការ​ខូចខាត​បាក់បែក​តិចតួច ។

ប្រភព​ដដែល​បន្ត​ទៀត​ថា លុះ​នៅ​ពេល​បង្ក​គ្រោះថ្នាក់​ហើយ ស្រាប់តែ​រថយន្ត​ស៊េរី​ទំនើប​ម៉ាក​jeep​នោះ​បាន​ឆ្លង​ចរន្ត បណ្តាល​ឲ្យ​មានការ​ឆាបឆេះ​ចេញ​ជា​អណ្ដាតភ្លើង​យ៉ាង​សន្ធោសន្ធៅ​តែ​ម្តង ដែល​ធ្វើ​ឲ្យ​ប្រជាពលរដ្ឋ​នៅ​ទីនោះ​យក​បំពង់​ពន្លត់​អគ្គិភ័យ​មក​បាញ់​អស់​៤​បំពង់ តែ​មិន​រលត់ ទើប​រាយការណ៍​ជូន​អាជ្ញាធរ​និង​សមត្ថកិច្ច​ចេញ​រថយន្ត​ពន្លត់អគ្គិភ័យ​របស់​ការិយាល័យ​បង្ការ និង​ពន្លត់​អគ្គិភ័យ​ចំនួន​១​គ្រឿង មក​ធ្វើការ​បាញ់​អស់​ទឹក​ចំនួន​១​រថយន្ត​ធ្វើ​អោយ​ភ្លើង​រលត់​ទៅ​វិញ​ទាំងស្រុង ហើយ​រថយន្ត​Jeep បាន​រង​ការ​ខូចខាត​អស់ទាំង​ស្រុង​ដូច​គ្នា ។

ករណី​នេះ​ផង​ដែរ ភាគី​ខាង​រថយន្ត​ញJeep​បាន​ធ្វើការ​ដោះស្រាយ​ជាមួយ​ខាង​រថយន្តToyota Prius និង​ម៉ូតូ​click ដោយ​សង​សំណង​ថ្លៃ​ការ​ខូចខាត ដើម្បី​បញ្ចប់រឿង ចំណែក​រថយន្ត​ឆេះ​សល់​តែ​គ្រោងឆ្អឹង ៕