រាជធានីភ្នំពេញ ៖ ជនសង្ស័យម្នាក់បានធ្វើសកម្មភាពលួចម៉ូតូសណ្ដោងរ៉ឺម៉ក១គ្រឿង របស់បុរសអ្នកឡើងត្នោតម្នាក់ដែលទុកក្បែរផ្ទះហើយដេកលង់លក់ លុះពេលលួចបានសម្រេចធាក់អត់ឆេះ ។ ពេលនោះ ជនសង្ស័យបានព្យាយាមអូសបណ្ដើរចេញគេចខ្លួនដោយឡែកម្ចាស់ ក្រោយពេលភ្ញាក់ពីដេកបាត់មិនឃើញម៉ូតូសណ្ដោងរ៉ឺម៉ករបស់ខ្លួនក៏តាមរក ស្រាប់តែឃើញជនសង្ស័យកំពុងអូសរ៉ឺម៉ក…
រាជធានីភ្នំពេញ ៖ ជនសង្ស័យម្នាក់បានធ្វើសកម្មភាពលួចម៉ូតូសណ្ដោងរ៉ឺម៉ក១គ្រឿង របស់បុរសអ្នកឡើងត្នោតម្នាក់ដែលទុកក្បែរផ្ទះហើយដេកលង់លក់ លុះពេលលួចបានសម្រេចធាក់អត់ឆេះ ។
ពេលនោះ ជនសង្ស័យបានព្យាយាមអូសបណ្ដើរចេញគេចខ្លួនដោយឡែកម្ចាស់ ក្រោយពេលភ្ញាក់ពីដេកបាត់មិនឃើញម៉ូតូសណ្ដោងរ៉ឺម៉ករបស់ខ្លួនក៏តាមរក ស្រាប់តែឃើញជនសង្ស័យកំពុងអូសរ៉ឺម៉ក ក៏ឃាត់ខ្លួនប្រគល់ឲ្យនគរបាលចាត់ការតាមច្បាប់តែម្ដង ។
ហេតុករណ៍ខាងលើ បានកើតឡើង កាលពីវេលាម៉ោង៣និង៣០នាទីទៀបភ្លឺ ថ្ងៃទី២៤ ខែកញ្ញា ឆ្នាំ២០២៥ នៅក្នុងភូមិខ្វែ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យរូបនោះឈ្មោះ យ៉ន ភាព អាយុ៤៧ឆ្នាំ មានស្រុកកំណើតនៅភូមិព្រៃឃ្នង ឃុំសំរោង ស្រុកស្វាយអន្ទរ ខេត្តព្រៃវែង បច្ចុប្បន្នរស់នៅក្នងភូមិឫស្សី សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។
ដោយឡែក បុរសដែលជាម្ចាស់ម៉ូតូសណ្ដោងរ៉ឹម៉កឈ្មោះ ផាន់ សុខជា អាយុ៤៤ឆ្នាំ មុខរបរឡើងត្នោត មានទីលំនៅក្នុងភូមិខ្វែ សង្កាត់ត្រពាំងក្រសាំង ខណ្ឌពោធិ៍សែនជ័យ និងមានស្រុកកំណើតមៅខេត្តព្រៃវែង ។
គាត់បាននិយាយរៀបរាប់នៅក្នុងពាក្យបណ្ដឹងថា នៅវេលាយប់ថ្ងៃទី២៣ ខែកញ្ញា ឆ្នាំ២០២៥ គាត់បានទុកម៉ូតូសណ្ដោងរ៉ឺម៉កម៉ាកហុងដាវ៉េវពណ៌ខ្មៅនៅចំហៀងផ្ទះ បន្ទាប់មកក៏ចូលដេកក្នុងផ្ទះ ។
រហូតដល់វេលាម៉ោង៣និង៣០នាទីទៀបភ្លឺ ថ្ងៃទី២៤ ខែកញ្ញា ទើបភ្ញាក់រៀបចំចេញទៅឡើងត្នោត នៅស្រុកកំណើតឯខេត្តព្រៃវែង ក៏ស្រាប់តែបាត់ម៉ូតូសណ្ដោងរ៉ឺម៉កខាងលើ ដោយសារតែធាក់អត់ឆេះ ។
បុរសនេះ បាននិយាយបន្តទៀតថា ពេលនោះគាត់ក៏បានចេញតាមរក ក៏ឃើញជនសង្ស័យខាងលើ កំពុងអូសបណ្ដើរម៉ូតូសណ្ដោងរ៉ឺម៉ករបស់គាត់តាមផ្លូវបេតុង ។ ពេលនោះគាត់ក៏ស្រែកឆោឡោបង្កការភ្ញាក់ផ្អើលដល់ប្រជាពលរដ្ឋនាំគ្នាជួយដេញចាប់បាន រួចប្រគល់ឲ្យនគរបាលចាត់ការតាមច្បាប់ងែម្ដង ៕
ចែករំលែកព័តមាននេះ