រាជធានី​ភ្នំពេញ ៖ លោក ហេង រតនា អគ្គនាយក​ស៊ី​ម៉ាក បាន​ប្រកាស​នៅ​លើ​បណ្តាញ​សង្គម​របស់​លោក នា​រសៀល​ថ្ងៃ​ទី​១៧ ខែកញ្ញា ឆ្នាំ​២០២៥ នេះ ៖ ថ្ងៃ​ទី​១៧ ខែកញ្ញា ឆ្នាំ​២០២៥ នៅ​ទីបញ្ជាការ​ស៊ី​ម៉ាក់​ភ្នំពេញ ខ្ញុំ​បាន​ទទួល​ជួប​ពិភាក្សា​ការងារ​ជាមួយ​លោក Liu Wenzhi ប្រធាន​មូលនិធិ​ចិន​Peaceland ប្រចាំ​កម្ពុជា និង​លោក​សាស្ត្រាចារ្យ Chen Yong ទីប្រឹក្សា​ស្រាវជ្រាវ និង​នវានុវត្តន៍​ប្រចាំ​នៅ​មជ្ឈមណ្ឌល​សកម្មភាព​កម្ចាត់​មីន​អាស៊ាន (ARMAC) ដែល​បេសកកម្ម​របស់​លោក​សាស្ត្រាចារ្យ​Chen Yong ជា​ចំណែក​នៃ​ការ​គាំទ្រ​របស់​រដ្ឋាភិបាល​ចិន​ចំពោះ​ARMAC ។

លោក ហេង រតនា បាន​បញ្ជាក់​ថា ក្នុង​ជំនួប​ពិភាក្សា​ការងារ​នេះ មានការ​ផ្តោត​ការ​យកចិត្តទុកដាក់​ជា​សំខាន់​លើ​ការ​ពង្រឹង​ទំនាក់ទំនង​កិច្ច​សហប្រតិបត្តិការ​រវាង​អង្គភាព​CMAC និង​មូលនិធិ​ចិន​Peaceland ក៏​ដូច​ជា ជំនួយ​វិស័យ​មីន​របស់​រដ្ឋាភិបាល​ចិន ផ្តល់​ជូន​រាជរដ្ឋាភិបាល​កម្ពុជា ។ ជា​ពិសេស កិច្ច​សហប្រតិបត្តិការ​លើ​ការ​ចែករំលែក​បទ​ពិសោធន៍ ការងារ​ស្រាវជ្រាវ​អភិវឌ្ឍន៍​បច្ចេកវិទ្យា និង​នវានុវត្តន៍​ក្នុង​វិស័យ​សកម្មភាព​កម្ចាត់​មីន ។

ក្នុង​ជំនួប​ពិភាក្សា​នេះ​ដែរ ក៏​មាន​ចាប់អារម្មណ៍​ខ្លាំង​លើ​ការ​អនុវត្ត​ភារកិច្ច​បន្ទាន់ ចំពោះ​មុខ​របស់​អង្គភាព​CMAC ក្នុង​ការ​ពង្រាយ​កម្លាំង​អន្តរាគមន៍​ចាំបាច់ ដើម្បី​បោសសម្អាត​សំណល់​យុទ្ធភណ្ឌ​សង្គ្រាម ដែល​ជា​មរតក​នៃ​សង្គ្រាម​រយៈពេល​៥​ថ្ងៃ​រវាង​សៀម និង​កម្ពុជា ដើម្បី​ធានា​សុវត្ថិភាព​ជូន​ប្រជាពលរដ្ឋ​ភៀស​សឹក ដែល​ត្រូវ​វិល​ត្រឡប់​ទៅ​កាន់​លំនៅ​ដ្ឋា​ន​របស់​ពួក​គាត់​វិញ ស្រប​តាម​អនុសាសន៍​ដឹកនាំ​ដ៍​ខ្ពង់ខ្ពស់​របស់​សម្តេច​មហា​បវរ​ធិ​បតី ប្រមុខ​រាជរដ្ឋាភិបាល​៕