រាជធានីភ្នំពេញ ៖ រថយន្តប្រភេទកូរ៉េដឹកកម្មកររោងចក្រមួយគ្រឿង ខណៈអ្នកបើកបរខ្វះការប្រុងប្រយ័ត្ន ហើយបំពានភ្លើងស្តុបក៏ជ្រុលទៅបុក និងកៀររថយន្តស្តារិចបត់ឆ្លងផ្លូវ បណ្ដាលឲ្យរថយន្តដឹកកម្មកររោងចក្រក្រឡាប់ផ្ងារជើងមួយចំហៀង ធ្វើឲ្យកម្មករប្រុសស្រីជិះលើរថយន្តរងរបួសជាច្រើននាក់ ។ ហេតុការណ៍ខាងលើនេះ…
រាជធានីភ្នំពេញ ៖ រថយន្តប្រភេទកូរ៉េដឹកកម្មកររោងចក្រមួយគ្រឿង ខណៈអ្នកបើកបរខ្វះការប្រុងប្រយ័ត្ន ហើយបំពានភ្លើងស្តុបក៏ជ្រុលទៅបុក និងកៀររថយន្តស្តារិចបត់ឆ្លងផ្លូវ បណ្ដាលឲ្យរថយន្តដឹកកម្មកររោងចក្រក្រឡាប់ផ្ងារជើងមួយចំហៀង ធ្វើឲ្យកម្មករប្រុសស្រីជិះលើរថយន្តរងរបួសជាច្រើននាក់ ។
ហេតុការណ៍ខាងលើនេះ បង្កការភ្ញាក់ផ្អើលកាលពីវេលាម៉ោង៦និង៣០នាទីយប់ថ្ងៃទី១៦ ខែកញ្ញា ឆ្នាំ២០២៥ នៅចំនុចស្តុបABC ផ្លូវបេតុង កែងផ្លូវ៥០ម៉ែត្រ ភូមិព្រែកថ្លឹង សង្កាត់ជើងឯក ខណ្ឌដង្កោ រាជធានីភ្នំពេញ ។
តាមប្រភពព័ត៌មានបានអោយដឹងថា មុនពេលកើតហេតុ គេបានឃើញបុរសម្នាក់បានបើករថយន្តម៉ាកស្តារិច ពណ៌ទឹកប្រាក់ ពាក់ស្លាកលេខ ភ្នំពេញ 2BE 5628 ធ្វើដំណើរតាមបណ្ដោយផ្លូវ៥០ម៉ែត្រទិសដៅពីកើតទៅលិច លុះមកដល់ចំនុចកើតហេតុជាផ្លូវបំបែកជាបួន ហើយភ្លើងស្តុបអាទិភាពបត់ឆ្វេង រថយន្តក៏បត់ឆ្វេងឆ្លងផ្លូវចូលទៅផ្លូវបេតុងABC គាប់ជួនពេលនោះ ស្រាប់តែរថយន្តកូរ៉េដឹកកម្មកររោងចក្រម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ 2AJ 0931 មានកម្មករប្រុសស្រីជិះចំនួន១២នាក់ (ប្រុស២នាក់ទាំងអ្នកបើកបរ) ធ្វើដំណើរតាមបណ្ដោយផ្លូវ៥០ម៉ែត្រ ក្នុងទិសដៅពីលិចទៅកើតល្បឿនលឿនបំពានភ្លើងស្តុប បួងចង្កូតគេចមិនទាន់« ក៍ជ្រុលទៅបុកនិងកៀររថយន្តស្តារិច ចំផ្នែកខាងមុខ ក្រឡាប់រថយន្តកូរ៉េដឹកកម្មករផ្អៀងមួយចំហៀង បត់ក្បាលត្រលប់ក្រោយវិញ រងការខូចខាត ។
ចំណែកមនុស្សចេញពីរថយន្ដកូរ៉េ រងរបួសធ្ងន់ស្រាល និងមធ្យម សរុបអស់ទាំង១២នាក់ ក្នុងនោះមានមនុស្សស្រី៨នាក់ ជាកម្មករជិះលើរថយន្ត រងរបួស៤និងស្រាល៤នាក់បញ្ជូនតាមរថយន្តសាមុយរបស់មន្ទីរពេទ្យបង្អែកដង្កោដឹកយកទៅសង្គ្រោះផងដែរ ។ ដោយឡែកអ្នកផ្សេងៗទៀតរបួសស្រាលមិនបានទៅមន្ទីរពេទ្យនោះទេ ។ រីឯអ្នកបើកបររថយន្តកូរ៉េវិញ មានសភាពធំខ្លិនស្រាត្រូវបានសមត្ថកិច្ចឃាត់យកទៅសួរនាំ ។ ចំនែកខាងរថយន្តស្តារិចវិញរងការខូចខាតផ្នែកខាងមុខ អ្នកបើកបរក៍ត្រូវសមត្ថកិច្ចឃាត់យកទៅសួរនាំដូចគ្នា ។
ក្រោយកើតហេតុ នៅសល់តែមធ្យោបាយទាំង២គ្រឿង ត្រូវសមត្ថកិច្ចមូលដ្ឋានប្រគល់ឲ្យជំនាញចរាចរណ៍ក្រុងវាស់វែងស្ទូចយកទៅរក្សាទុករង់ចាំដំណោះស្រាយនៅពេលក្រោយ ៕
ចែករំលែកព័តមាននេះ