ទីក្រុងយេរូសាឡឹម៖ គណៈកម្មការសិទ្ធិរបស់អង្គការសហប្រជាជាតិធ្វើសេចក្ដីរាយការណ៍ថាអ៊ីស្រាអែលបាន និងកំពុងបន្តប្រព្រឹត្តអំពើប្រល័យពូជសាសន៍ទៅលើជនជាតិប៉ាឡេស្ទីននៅតំបន់ហ្កាហ្សា។ គណៈកម្មការនេះសន្និដ្ឋាននៅចុងបញ្ចប់នៃរបាយការណ៍របស់ខ្លួនថារដ្ឋអ៊ីស្រាអែលត្រូវតែជាអ្នកទទួលខុសត្រូវនៅក្នុងរឿងនេះពីបទ ១-មិនទប់ស្កាត់អំពើប្រល័យពូជសាសន៍, ២-ប្រព្រឹត្តអំពើប្រល័យពូជសាសន៍ដោយខ្លួនឯង និង៣-មិនព្រមដាក់ទោសអ្នកប្រព្រឹត្តអំពើប្រល័យពូជសាសន៍។
តាមពិត នេះមិនមែនជាលើកទី១ទេដែលអ៊ីស្រាអែលទទួលរងការចោទប្រកាន់ពាក់ព័ន្ធនឹងអំពើប្រល័យពូជសាសន៍។ មែនទែនទៅ អ៊ីស្រាអែលខ្លួនឯងធ្លាប់ទទួលរងអំពើនេះកាលពីអំឡុងសង្គ្រាមលោកលើកទី២។ ថ្មីៗនេះ អ៊ីស្រាអែលរងការចោទប្រកាន់ពីអង្គការសិទ្ធិមនុស្ស និងក្រុមអ្នកជំនាញទូទាំងសាកលលោក។ ប៉ុន្តែអ៊ីស្រាអែលបដិសេធ។ អ៊ីស្រាអែលថាខ្លួននឹងមិនសហការជាមួយគណៈកម្មការរបស់ UN ដើម្បីស៊ើបអង្កេតករណីចោទប្រកាន់ពីបទរំលោភសិទ្ធិជនជាតិប៉ាឡេស្ទីនទេ។
ក្រុមអ្នកស៊ើបអង្កេតរបស់ UN ចោទប្រកាន់ថាអ៊ីស្រាអែលបន្តកាប់សម្លាប់ជនជាតិប៉ាឡេស្ទីន, បង្កស្នាមរបួសផ្លូវកាយ និងផ្លូវចិត្ត, មានចេតនាធ្វើឱ្យពួកប៉ាឡេស្ទីនចុះទ្រុឌទ្រោមផ្លូវកាយទាំងស្រុង ឬដោយផ្នែក និងព្យាយាមទប់ស្កាត់មិនឱ្យប៉ាឡេស្ទីនអាចបង្កបង្កើតកូនចៅសម្រាប់បន្តពូជពង្សវង្សត្រកូលរបស់ពួកគេ។ អំពើប្រល័យពូជសាសន៍ត្រូវគេកំណត់និយមន័យថាជាការប៉ុនប៉ងបំផ្លាញទាំងស្រុង ឬមិនទាំងស្រុងទៅលើក្រុមជាតិសាសន៍ ជាតិពន្ធ ជនជាតិភាគតិច ឬសាសនាណាមួយ។
ប្រតិកម្មចំពោះការចេញរបាយការណ៍ថ្មីនេះ អ្នកនាំពាក្យក្រសួងការបរទេសអ៊ីស្រាអែលចាត់ទុកថានេះជារបាយការណ៍ភូតកុហកដែលប្រមូលទិន្នន័យតែមួយជ្រុងពីការនិយាយបំផ្លើសរបស់ក្រុមហាម៉ាស់ រួចហើយយកមកនិយាយឡើងវិញដោយមនុស្សផ្សេង។ គណៈកម្មការខាងលើនេះអះអាងថាខ្លួនចង់ផ្ដោតសំខាន់ទៅលើធាតុផ្សំចំនួន៤នៅក្នុងចំណោម៥ដែលមានចែងនៅក្នុងមាត្រាមួយនៃអនុសញ្ញាទីក្រុងហ្សឺណែវឆ្នាំ១៩៤៨។
អ្នកនាំពាក្យក្រសួងការបរទេសអ៊ីស្រាអែលយល់ថារបាយការណ៍នោះសរសេរផ្ទុយពីការពិត។ គឺក្រុមហាម៉ាស់ទៅវិញទេដែលប៉ុនប៉ងប្រព្រឹត្តអំពើប្រល័យពូជសាសន៍នៅអ៊ីស្រាអែល។ ជាក់ស្ដែង ពួកគេសម្លាប់ជនជាតិអ៊ីស្រាអែលអស់១២០០នាក់ (កាលពីខែតុលា ឆ្នាំ២០២៣), ពួកគេរំលោភសេពសន្ថវៈទៅលើស្ត្រីភេទ, ដុតសម្លាប់មនុស្សទាំងគ្រួសារទាំងរស់ និងប្រកាសជាចំហថាពួកគេត្រូវតែសម្លាប់ជនជាតិជ្វីបឱ្យអស់។ នេះបើយោងតាមប្រភពពីញូស្វីក (Newsweek) និងប្រភពដទៃទៀត៕
ចែករំលែកព័តមាននេះ