រាជធានីភ្នំពេញ ៖ ភ្លៀងធ្លាក់ខ្លាំងច្រើនមេជាប់គ្នារាល់ថ្ងៃធ្វើឲ្យទឹកហូរមិនទាន់បណ្ដាលឲ្យលិចកំណាត់ផ្លូវជាតិលេខ៤ ត្រង់ចំណុចខាងលិចគល់ស្ពានអាកាសចោមចៅ និងមហាវិថីសហព័ន្ធរុស្សុី ត្រង់ចំណុចខាងលិចអតីតអាកាសយានដ្ឋានអន្តរាជាតិភ្នំពេញ ។ ដោយបានលិចច្រើនថ្ងៃមកហើយ បើគិតត្រឹមវេលារសៀលថ្ងៃទី១៤ ខែកញ្ញា…
រាជធានីភ្នំពេញ ៖ ភ្លៀងធ្លាក់ខ្លាំងច្រើនមេជាប់គ្នារាល់ថ្ងៃធ្វើឲ្យទឹកហូរមិនទាន់បណ្ដាលឲ្យលិចកំណាត់ផ្លូវជាតិលេខ៤ ត្រង់ចំណុចខាងលិចគល់ស្ពានអាកាសចោមចៅ និងមហាវិថីសហព័ន្ធរុស្សុី ត្រង់ចំណុចខាងលិចអតីតអាកាសយានដ្ឋានអន្តរាជាតិភ្នំពេញ ។ ដោយបានលិចច្រើនថ្ងៃមកហើយ បើគិតត្រឹមវេលារសៀលថ្ងៃទី១៤ ខែកញ្ញា ឆ្នាំ២០២៥ ទឹកនៅមិនទាន់ស្រកទៅវិញនៅឡើយទេ ហើយសាលាសង្កាត់ចោមចៅទី៣ ក៏លិចដែរ ។ ប្រសិនបើមេឃនៅតែបន្តធ្លាក់ភ្លៀងមិនឈប់ទៀតនោះទឹកក៏មិនងាយនិងស្រកចេញពីផ្លូវវិញឡើយ លុះត្រាតែអាជ្ញាធរមានវិធានការអ្វីមួយលើបញ្ហានេះ ។
ប្រជាពលរដ្ឋបាននិយាយថា កំណាត់ផ្លូវជាតិលេខ៤ ត្រូវបានទឹកលិចចាប់ពីត្រង់ចំណុចគល់ស្ពានអាកាសចោមចៅ ទៅដល់មុខសាលាសង្កាត់ចោមចៅទី៣ ស្ថិតនៅក្នុងភូមិថ្នល់បំបែក ព្រំប្រទល់ភូមិព្រៃព្រីងខាងត្បូង២ និងភូមិព្រៃព្រីងខាងជើង១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។ បើតាមការប៉ាន់ស្មានទឹកលិចផ្លូវនេះប្រវែងប្រមាណ៣០០ម៉ែត្រ ក្នុងនោះខាងគន្លងផ្លូវចូលរាជធានីភ្នំពេញ លិចខ្លាំងត្រឹមស្មងជើង និងលិចទាំងស្រុងដល់ទ្រូងផ្លូវតែម្ដង ចំណែកឯខាងគន្លងផ្លូវចេញពីរាជធានីភ្នំពេញ គឺទិសដៅពីកើតទៅលិចវិញ លិច១ចំហៀងផ្លូវ និងលិចប្រវែងខ្លីជាង ។
ប្រជាពលរដ្ឋបាននិយាយបន្តទៀតថា ការលិចនេះមានរយៈពេល៤ថ្ងៃមកហើយចាប់តាំងពីវេលាល្ងាចថ្ងៃទី១០ ខែកញ្ញា ឆ្នាំ២០២៥ មកម្ល៉េះដោយសារតែភ្លៀងធ្លាក់ខ្លាំងហើយភ្លៀងរយៈពេលច្រើនម៉ោងទើបរាំងទៅវិញ ។ ក្រោយពេលភ្លៀងរួចទឹកមិនទាន់ស្រកផង ស្រាប់តែភ្លៀងបានធ្លាក់នៅថ្ងៃបន្ទាប់ថែមទៀត ជាក់ស្ដែងនៅវេលាល្ងាចថ្ងៃទី១៣ ខែកញ្ញា មានភ្លៀងរហូតដល់យប់ថ្ងៃដដែលទើបរាំង ។ ដែលបានធ្វើឲ្យទឹកកាន់តែមានលិចផ្លូវថែមទៀត ហើយក៏មានការកកស្ទះចរាចរ ទៀតផង ចំណែកម៉ូតូច្រើនគ្រឿង ជាពិសេសម៉ូតូសណ្ដោងរ៉ឺម៉កដឹកអីវាន់ផ្សេងៗ បានរលត់ម៉ាសុីនទៅមុខលែងរួចតែម្ដង ។
ប្រជាពលរដ្ឋបាននិយាយបន្ថែមទៀតថា មិនត្រឹមតែលិចផ្លូវប៉ុណ្ណោះទេសាលាសង្កាត់ចោមចៅទី៣ និងផ្ទះមួយចំនួននៅតាមផ្លូវនោះក៏ត្រូវទឹកលិចផងដែរ ហើយផ្លូវជាតិលេខ៤ត្រង់ចំណុចខាងលើនោះ ច្រើនឆ្នាំមកហើយលិចតែនៅពេលធ្លាក់ភ្លៀងប៉ុណ្ណោះ ។ លុះក្រោយពេលរាំងភ្លៀងរយៈពេល២ទៅ៣ម៉ោងស្រកទៅវិញហើយ មិនដែលលិចត្រាំត្រែងមិនស្រកទៅវិញបែបនេះទេ លុះពេលចូលមកដល់ឆ្នាំ២០២៥នេះឲ្យតែមានភ្លៀងគឺលិចច្រើនថ្ងៃទើបស្រកទៅវិញ ហាក់ដូចជាហូរយឺតខ្លាំងណាស់ ។
ប្រជាពលរដ្ឋបានលើកឡើងទៀតថា ដោយឡែកនៅឯមហាវិថីសហព័ន្ធរុស្សុី ត្រូវបានទឹកលិចប្រវែងប្រមាណពី៥០០ម៉ែត្រ គឺចាប់ពីត្រង់ចំណុចខាងលិចអតីតអាកាសយានដ្ឋានអន្តរាជាតិភ្នំពេញ ស្ថិតនៅក្នុងភូមិព្រៃទា១ រហូតដល់ភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ។ ប៉ុន្តែទោះបីជាបែបណា អាជ្ញាធរមិនទាន់មានវិធាការហាមឃាត់មិនឲ្យធ្វើចរាចរនៅលើផ្លូវទាំង២ខ្សែខាងលើនោះឡើយ ព្រោះថ្វីដ្បិតតែទឹកលិចមែន តែនៅតែអាចធ្វើដំណើរបានធម្មតា គ្រាន់តែមិនសូវរលូន ហើយមានម៉ូតូមួយចំនួនឈ្លក់ទឹករលត់ប៉ុណ្ណោះ ។
សូមរម្លឹកផងដែរថា ច្រើនឆ្នាំកន្លងមកហើយកំណាត់ផ្លូវជាតិលេខ៤ ចាប់ពីត្រង់ចំណុចផ្លូវរថភ្លើងខ្សែភ្នំពេញ-កំពត ទៅដល់មុខអតីតសាលាក្ដីខ្មែរក្រហម ស្ថិតនៅក្នុងភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ ឲ្យតែដល់ខែកញ្ញា មានភ្លៀងធ្លាក់ច្រើនគឺតែងតែមានការលិចលង់ជាប្រចាំរាល់ថ្ងៃ និងច្រើនថ្ងៃទើបស្រកទៅវិញ ។ ដោយកន្លែងខ្លះមានជម្រៅត្រឹមស្មងជើង ត្រឹមជង្គង់ និងកន្លែងខ្លះត្រឹមភ្លៅ រហូតអាជ្ញាធរផ្អាកមិនឲ្យរថយន្តធុនធំគ្រប់ប្រភេទធ្វើចរាចរឆ្លងកាត់ថែមទៀតផង ប៉ុន្តែនៅខែកញ្ញា ឆ្នាំ២០២៥នេះលែងមានការលិចលង់ទៀតហើយ ដោយសារមានការកែសម្រួលប្រព័ន្ធលូ និងស្ដារប្រឡាយមេនានារួចរាល់ ពីសំណាក់អាជ្ញាធរ ហើយបែរជាទៅលិចនៅជិតគល់ស្ពានអាកាសចោមចៅវិញម្ដង ៕
ចែករំលែកព័តមាននេះ