រាជធានីភ្នំពេញ ៖ នារីម្នាក់បានមកអង្គុយយំនៅក្រោមដើមឈើ ផ្អើលអ្នកដំណើរឈប់សួរនាំ ព្រោះជាកន្លែងស្ងាត់ផង ខ្លាចមានជនខិលខូចបំពានលើរូបនាង តែនាងប្រាប់ថា ត្រូវថ្នាំសណ្ដំរបស់គេយកគ្រឿងអលង្ការអស់ពីខ្លួន ។ ហេតុការណ៍ខាងលើនេះបានកើតឡើងកាលពីវេលាម៉ោង៧យប់ថ្ងៃទី១១…
រាជធានីភ្នំពេញ ៖ នារីម្នាក់បានមកអង្គុយយំនៅក្រោមដើមឈើ ផ្អើលអ្នកដំណើរឈប់សួរនាំ ព្រោះជាកន្លែងស្ងាត់ផង ខ្លាចមានជនខិលខូចបំពានលើរូបនាង តែនាងប្រាប់ថា ត្រូវថ្នាំសណ្ដំរបស់គេយកគ្រឿងអលង្ការអស់ពីខ្លួន ។
ហេតុការណ៍ខាងលើនេះបានកើតឡើងកាលពីវេលាម៉ោង៧យប់ថ្ងៃទី១១ ខែ កញ្ញា ឆ្នាំ ២០២៥ នៅចំណុចផ្លូវ៦០ម៉ែត្រ ក្បែរផ្សារអ៊ីអន៣ សង្កាត់ជើងឯក ខណ្ឌដង្កោ រាជធានីភ្នំពេញ ។
នារីរងគ្រោះបានយំរៀបរាប់ប្រាប់ថា គាត់មិនដឹងថាដើរមកពីណានោះទេ មានអ្នកមិនស្គាល់នាំមកអង្គុយកន្លែងក្រោមដើមឈើរួចក៏ដោះយកគ្រឿងអលង្ការពីខ្លួនអស់មិនដឹងតាំងពីណា ។ លុះពេលគាត់ដឹងខ្លួនស្រាប់តែបាត់របស់របរអស់ពីខ្លួន ដោយភ័យអ្នកផ្ទះខឹង មានតែយំស្ដាយរបស់ដែលត្រូវជនសង្ស័យដាក់ថ្នាំសណ្ដំយកទូរស័ព្ទនិងខ្សែកគេចខ្លួនបាត់ ទើបគាត់មិនហ៊ានទៅផ្ទះទេ ក៏សុំទូរស័ព្ទគេតេទៅឪពុកម្ដាយតែគ្មានអ្នកលើកទៀត ។
ក្រោយពីប្រជាពលរដ្ឋដែលជាអ្នកដំណើរបានស្ដាប់ការរៀបរាប់នារីរងគ្រោះរួចហើយ ក៏បានទូរស័ព្ទទៅប្ដឹងនគរបាលរដ្ឋបាលជើងឯក ដើម្បីឱ្យមកទទួលយកនារីរងគ្រោះទៅប៉ុស្តិ៍ ព្រោះមិនអាចអោយនាងអង្គុយយំម្នាក់ឯងបែបនេះ គ្រោះថ្នាក់ណាស់ និងទំនាក់ទំនងទៅគ្រួសារឱ្យមកទទួលយកនាងត្រឡប់ទៅវិញ ដោយអារម្មណ៍នារីរងគ្រោះហាក់បីនៅភ័យនៅឡើយទេ ។
សមត្ថកិច្ចបញ្ចាក់ថា រង់ចាំសួរនាំនារីរងគ្រោះសិន ដើម្បីឱ្យដឹងថាជាករណីបន្លំលួចឬក៏ចាញ់បោកជនឆបោក ដោយមិនទាន់អាចសាកសួរនាំនាងបាននោះទេ ព្រោះមើលទៅនារីរងគ្រោះហាក់ភ័យខ្លាំងពេក រង់ចាំនាងស្ងប់អារម្មណ៍ស្រួលបួលសិន ៕
ចែករំលែកព័តមាននេះ