រាជធានីភ្នំពេញ ៖ ក្នុងឱកាសបុណ្យកាន់បិណ្ឌនិងភ្ជុំបិណ្ឌ ចាប់ពីថ្ងៃទី៨ រហូតដល់ថ្ងៃទី២៣ ខែកញ្ញា ឆ្នាំ២០២៥ គណៈកម្មាធិការជាតិសុវត្ថិភាពចរាចរណ៍ផ្លូវគោក បានអំពាវនាវឱ្យប្រជាពលរដ្ឋចូលរួមបង្ការ និងទប់ស្កាត់គ្រោះថ្នាក់ចរាចរណ៍…
រាជធានីភ្នំពេញ ៖ ក្នុងឱកាសបុណ្យកាន់បិណ្ឌនិងភ្ជុំបិណ្ឌ ចាប់ពីថ្ងៃទី៨ រហូតដល់ថ្ងៃទី២៣ ខែកញ្ញា ឆ្នាំ២០២៥ គណៈកម្មាធិការជាតិសុវត្ថិភាពចរាចរណ៍ផ្លូវគោក បានអំពាវនាវឱ្យប្រជាពលរដ្ឋចូលរួមបង្ការ និងទប់ស្កាត់គ្រោះថ្នាក់ចរាចរណ៍ ។ ជាមួយនេះ គណៈកម្មាធិការជាតិសុវត្ថិភាពចរាចរណ៍ផ្លូវគោក បានណែនាំនូវវិធានការចំនួន ៨ចំណុច ដើម្បីពលរដ្ឋចូលរួមអនុវត្តចៀសវាងការកើតមានគ្រោះថ្នាក់ចរាចរណ៍ជាយថាហេតុ ដោយសាររដូវបុណ្យភ្ជុំដែលមានរយៈពេល១៥ថ្ងៃនេះ ការធ្វើដំណើរមានភាពមមាញឹកនៅលើដងផ្លូវ ។
គណៈកម្មាធិការជាតិសុវត្ថិភាពចរាចរណ៍ផ្លូវគោក បានអំពាវនាវកាលពីថ្ងៃទី៩ ខែកញ្ញា ឆ្នាំ២០២៥ថា ភាគច្រើននៃមូលហេតុបង្កឲ្យមានគ្រោះថ្នាក់ចរាចរណ៍ គឺបណ្តាលមកពីការបើកបរយានយន្តមិនគោរពច្បាប់ ឬធ្វេសប្រហែស ដូចជា បើកបរលើសល្បឿនកំណត់ ជែងក្នុងស្ថានភាពគ្រោះថ្នាក់ បើកបរក្នុងស្ថានភាពស្រវឹង និងមិនគោរពសិទ្ធិអាទិភាព ។
ដើម្បីចូលរួមចំណែកក្នុងការកាត់បន្ថយគ្រោះថ្នាក់ចរាចរណ៍ គណៈកម្មាធិការជាតិសុវត្ថិភាពចរាចរណ៍ផ្លូវគោក បានអំពាវនាវដល់ពលរដ្ឋកុំបើកបរលើសល្បឿនកំណត់ និងកុំបើកបរក្រោមឥទ្ធិពលនៃគ្រឿងស្រវឹង ឬគ្រឿងញៀន ។ លើសពីនេះទៀត ត្រូវគោរពសិទ្ធិអាទិភាព គោរពភ្លើង-ផ្លាកសញ្ញាចរាចរណ៍ និងសញ្ញាបញ្ជារបស់មន្ត្រីនគរបាលចរាចរណ៍ផ្លូវគោក ។ម្យ៉ាងវិញទៀត ពលរដ្ឋត្រូវបើកបរក្នុងគន្លងផ្លូវដែលកំណត់ដោយច្បាប់ស្តីពីចរាចរណ៍ផ្លូវគោក និងមិនត្រូវបើកបរជាន់លើគំនូសសញ្ញាបែងចែកគន្លងផ្លូវឡើយ ។ ក្នុងពេលធ្វើដំណើរ ពលរដ្ឋត្រូវប្រុងប្រយ័ត្នជានិច្ចក្នុងការបត់ ការជែង ការចត និងការឈប់ ។
គណៈកម្មាធិការជាតិសុវត្ថិភាពចរាចរណ៍ផ្លូវគោក ជំរុញឱ្យពលរដ្ឋត្រូវត្រួតពិនិត្យមុនចេញដំណើរនូវលក្ខណៈបច្ចេកទេសយានយន្ត ដូចជាសម្បកកង់ ហ្វ្រាំង ភ្លើងបំភ្លឺ និងចង្កូត ជាដើម ។
ជាពិសេស ត្រូវពាក់មួកសុវត្ថិភាពនៅពេលធ្វើដំណើរតាមម៉ូតូ និងមិនត្រូវផ្ទុកអ្នកដំណើរ ឬទំនិញលើសច្បាប់កំណត់ឡើយ ។ សូមបញ្ជាក់ថា ក្នុងឆមាសទី១ ឆ្នាំ២០២៥ គ្រោះថ្នាក់ចរាចរណ៍ កើតមានចំនួន ១ ០៦៦លើក (យប់៥៨ភាគរយ) បណ្ដាលឱ្យស្លាប់ ៦៩៤នាក់ និងរងរបួស ១ ៤៧៦នាក់ ក្នុងនោះធ្ងន់ ៨៤៩នាក់ ។
មូលហេតុបង្កឲ្យមានគ្រោះថ្នាក់រួមមាន បើកបរល្មើសល្បឿនកំណត់ ៥០ភាគរយ មិនគោរពសិទ្ធិ ២១ភាគរយ មិនប្រកាន់ស្ដាំ ១១ភាគរយប្រជែងគ្រោះថ្នាក់ ៧ភាគរយ ស្រវឹង ៥ភាគរយ បត់ ២ភាគរយ កត្តាយាន ២ភាគរយ ងងុយ ១ភាគរយ និងសញ្ញាចរាចរណ៍ ១ភាគរយ ។នេះបើតាមរបាយការណ៍របស់អគ្គស្នងការដ្ឋាននគរបាលជាតិ ៕
ចែករំលែកព័តមាននេះ