ខេត្តក្រចេះ ៖ ស្ថានភាពជំនន់ទឹកភ្លៀង និងទឹកជំនន់ទន្លេមេគង្គខេត្តក្រចេះ គិតចាប់ពីថ្ងៃទី២៤ ខែកញ្ញា ដល់ថ្ងៃទី០២ ខែតុលា ឆ្នាំ២០២៥ បានបង្កផលប៉ះពាល់ដល់ផ្ទះសម្បែង៣.៤២៨ខ្នង…
ខេត្តក្រចេះ ៖ ស្ថានភាពជំនន់ទឹកភ្លៀង និងទឹកជំនន់ទន្លេមេគង្គខេត្តក្រចេះ គិតចាប់ពីថ្ងៃទី២៤ ខែកញ្ញា ដល់ថ្ងៃទី០២ ខែតុលា ឆ្នាំ២០២៥ បានបង្កផលប៉ះពាល់ដល់ផ្ទះសម្បែង៣.៤២៨ខ្នង ជម្លៀសប្រជាជន៤០០គ្រួសារ និងហេដ្ឋារចនាសម្ព័ន្ធជាច្រើនបានរងការវាយប្រហារពីជំនន់ទឹកភ្លៀង និងទឹកជំនន់ទន្លេមេគង្គ ។
លោកគង់ គឹមនី អភិបាលរង និងជាប្រធានលេខាធិការដ្ឋានគ.គ.ម.ខឲ្យដឹងថា កម្ពស់ទឹកទន្លេមេគង្គ កាលពីវេលាម៉ោង៧ព្រឹកថ្ងៃទី៣ ខែតុលា ឆ្នាំ២០២៥ នេះ កម្ពស់ទឹកហក់ឡើង២១.៦២ម៉ែត្រ ខណៈកម្ពស់ទឹកប្រុងប្រយ័ត្ន ២២,០០ម៉ែត្រ ។ ការជន់ឡើងនៃកម្រិតទឹកខាងលើ បានបង្កផលប៉ះពាល់ និងខូចខាតចំនួន៣៩ឃុំ ស្មើនឹង១៧៤ភូមិ ក្នុងក្រុងស្រុក ទាំង០៧នៃខេត្តក្រចេះ ។
ប្រជាពលរដ្ឋរងផលប៉ះពាល់ចំនួន១០.៥៣២គ្រួសារ ស្មើ៤១.២៣៦នាក់ ស្ត្រី២១.១១០នាក់ ។ ជម្លៀសប្រជាជន៤០០គ្រួសារ ស្មើ១.៦៤១នាក់ ស្ត្រី៨៦៦នាក់។ ប៉ះពាល់ ផ្ទះសម្បែង៣.៤២៨ខ្នង សាលារៀន៣០កន្លែង មណ្ឌលសុខភាព០២កន្លែង វិហារសាសនា ៧កន្លែង និងអគាររដ្ឋបាល០៥កន្លែង ។
ពាក់ព័ន្ធវិស័យកសិកម្មបានប៉ះពាល់ស្រូវសន្ទូង. ពង្រោះសរុប៣.៦៧៧ហិកតា ។ ប៉ះពាល់ដំណាំរួមផ្សំសរុប៦១១ហិកតា។ ហេដ្ឋារចនាសម្ព័ន្ធលិចផ្លូវបេតុង (ជនបទ) ១.០០២ ម៉ែត្រ ។ លិចផ្លូវក្រួសក្រហម ដីសប្រវែង១៦៦.២៤១ម៉ែត្រ ។ លិចស្ពានបេឡេតិ៍ ១២កន្លែង។ ប៉ះពាល់អណ្តូងស្នប់ ៧០១កន្លែង. អណ្តូងជីក ០៤កន្លែង បង្គន់អនាម័យ ១៣៩៣ កន្លែង។
លោក គង់ គឹមនី អភិបាលរងខេត្ត និងជាប្រធានលេខាធិការដ្ឋាន គ.គ.ម.ខ បានដឹកនាំកិច្ចប្រជុំបន្ទាន់របស់គណៈកម្មាធិការគ្រប់គ្រងគ្រោះមហន្តរាយខេត្ត ដើម្បីពិនិត្យផែនការត្រៀមបម្រុងគ្រោះមហន្តរាយដោយទឹកជំនន់ និងជំនន់ទឹកភ្លៀង និងបានដឹកនាំក្រុមការងារខេត្ត និងអាជ្ញាធរស្រុក ឃុំចុះពិនិត្យស្ថានភាពលិចលង់ និងការរស់នៅរបស់ប្រជាពលរដ្ឋ នៅភូមិផ្ដើម និងភូមិតាងួន ឃុំដារ ស្រុកចិត្របុរី ខេត្តក្រចេះ ។
កាលពីថ្ងៃទី០១ ខែតុលា ឆ្នាំ២០១៥កន្លងទៅនេះ លោក វ៉ា ថន អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត អញ្ជើញនាំយកអំណោយមនុស្សធម៌ របស់សាខាកាកបាទក្រហមកម្ពុជាខេត្ត ក្រចេះ ប្រគល់ជូនដល់គ្រួសារងាយរងគ្រោះ ចាស់ជ ចាស់ជរា ស្ត្រីមេម៉ាយ កុមារកំព្រា និងគ្រួសារកងទ័ពជួរមុខ នៅ ក្រុងក្រចេះ សរុបចំនួន១០៤គ្រួសារ ក្នុងពេលទឹកជំនន់ ។
នាថ្ងៃទី០២ ខែតុលា ឆ្នាំ២០២៥ លោក វ៉ា ថន អភិបាលខេត្ត និងជាប្រធាន គ.គ.ម.ខ ដឹកនាំក្រុម លេខាធិការដ្ឋាន គ.គ.ម.ខ ចូលរួមអមដំណើរ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធាន ទី១ គណៈកម្មាធិការជាតិគ្រប់គ្រងគ្រោះមហន្តរាយ ចុះពិនិត្យស្ថានភាពទឹកជំនន់ ដែលបង្កផលប៉ះពាល់ដំណាំស្រូវរបស់ប្រជាពលរដ្ឋ ស្ថិតនៅសង្កាត់អូរឬស្សី ក្រុងក្រចេះ និងឃុំបុសលាវ ស្រុកចិត្របុរី ដែលមាន ស្រូវជាច្រើនហិកតាខូចខាត ដោយសារទឹកជំនន់ កើនឡើងក្នុង
រយៈពេលកន្លងមកផងដែរ៕
ចែករំលែកព័តមាននេះ