ខេត្តមណ្ឌលគិរី ៖ យុវជនម្នាក់បានស្លាប់បាត់បង់អាយុជីវិត នៅស្រះចំណុចត្រពាំង៧ ស្ថិតនៅភូមិពូតាង ឃុំពូជ្រៃ ស្រុកពេជ្រាដា ខេត្តមណ្ឌលគិរី ខណៈពេលកំពុងស្ទូចត្រី ផ្លែសន្ទូចបានជាប់ហ្នឹងសម្រាស់…
ខេត្តមណ្ឌលគិរី ៖ យុវជនម្នាក់បានស្លាប់បាត់បង់អាយុជីវិត នៅស្រះចំណុចត្រពាំង៧ ស្ថិតនៅភូមិពូតាង ឃុំពូជ្រៃ ស្រុកពេជ្រាដា ខេត្តមណ្ឌលគិរី ខណៈពេលកំពុងស្ទូចត្រី ផ្លែសន្ទូចបានជាប់ហ្នឹងសម្រាស់ យុវជននោះក៏បានចុះទៅដោះដូចចុះទៅស្លាប់ ដែលហេតុនោះបានកើតឡើងកាលពីវេលារសៀលថ្ងៃទី១ ខែតុលា ឆ្នាំ២០២៥ ។
ជនរងគ្រោះឈ្មោះ ម៉េង លីហ៊ួ ភេទប្រុស អាយុ១៧ឆ្នាំ ទីលំនៅភូមិពូតាង ឃុំពូជ្រៃ ស្រុកពេជ្រាដា ខេត្តមណ្ឌលគិរី។
តាមសាក្សីបញ្ជាក់ឲ្យដឹងថា នៅរសៀលថ្ងៃកើតហេតុ ជនរងគ្រោះបានលីដងសន្ទូចទៅស្ទូចត្រីនៅស្រះមួយដែលមានចម្ងាយប្រមាណ៣០០ម៉ែត្រពីភូមិរស់នៅ។ ពេលទៅដល់ជនរងគ្រោះបានឈរស្ទូចត្រីធម្មតា ក៏ស្រាប់តែផ្លែសន្ទូចជាប់ហ្នឹងសម្រាស់នៅកណ្តាលទឹកស្រះ ហើយពេលនោះជនរងគ្រោះបានចុះទៅដោះផ្លែសន្ទូច រួចហែលត្រឡប់មកច្រាំងវិញ ប៉ុន្តែទំនងដោយកម្លាំង នឹងអស់ដៃអស់ជើង ម្យ៉ាងក្នុងស្រះនោះមានសារា យដុះច្រើន មិនអាចហែលបន្តទៅមុខទៀតបាន ជនរងគ្រោះក៏លង់ទឹកស្លាប់តែម្តងទៅ។
ក្រោយកើតហេតុ ទើបសាច់ញាតិជនរងគ្រោះ បានផ្តល់ព័ត៌មានឲ្យសមត្តកិច្ចនគរបាលមូលដ្ឋានបានដឹង បន្ទាប់មកសមត្ថកិច្ចបានបង្កើតគណកម្មការជំនាញថ្នាក់ស្រុក ខេត្ត ក្រោមការសម្របសម្រួលពីស្ថាប័នអយ្យការអមសាលាដំបូង បានចុះទៅពិនិត្យ និងធ្វើកោសលវិច្ច័យលើសាកសពតាមនីតិវិធី ហើយក៏បានបញ្ជាក់យ៉ាងច្បាស់ថា ជនរងគ្រោះពិតជាស្លាប់ដោយសារលង់ទឹកពិតប្រាកដមែន ដោយមិនជាប់ពាក់ពន្ធបទល្មើសណាមួយនោះទេ។ សាកសពជនរងគ្រោះ ត្រូវបានសមត្ថកិច្ចប្រគល់ឲ្យក្រុមគ្រួសារធ្វើបុណ្យតាមប្រពៃណី ៕
ចែករំលែកព័តមាននេះ