ខេត្តព្រះសីហនុ ៖ ដោយអនុវត្តតាមអនុសាសន៍ដ៏ខ្ពង់ខ្ពស់របស់នាយឧត្តមសេនីយ៍ ស ថេត អគ្គស្នងការនគរបាលជាតិ និងដោយមានបទបញ្ជារផ្ទាល់របស់ឧត្តមសេនីយ៍ឯក ស រដ្ឋា អគ្គស្នងការរង…
ខេត្តព្រះសីហនុ ៖ ដោយអនុវត្តតាមអនុសាសន៍ដ៏ខ្ពង់ខ្ពស់របស់នាយឧត្តមសេនីយ៍ ស ថេត អគ្គស្នងការនគរបាលជាតិ និងដោយមានបទបញ្ជារផ្ទាល់របស់ឧត្តមសេនីយ៍ឯក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ បានឃាត់ខ្លួនជនសង្ស័យចំនួន០៤នាក់ ពាក់ព័ន្ធករណីចាប់បង្ខាំងមនុស្សដោយខុសច្បាប់ និងធ្វើទារុណកម្មជំរិតទារប្រាក់ ។
ជនសង្ស័យទាំង០៤នាក់ រួមមាន ៖
១-ឈ្មោះ SAMI RAO ភេទប្រុស អាយុ ៣៣ឆ្នាំ ជនជាតិប៉ាគីស្ថាន មុខរបរ ហាងលក់បាយ មានទីលំនៅបច្ចុប្បន្ន ស្ថិតនៅភូមិ៥ សង្កាត់លេខ៤ ក្រុង-ខេត្តព្រះសីហនុ ។
២-ឈ្មោះ WASSI RAJ ភេទប្រុស អាយុ ២៤ឆ្នាំ ជនជាតិប៉ាគីស្ថាន មុខរបរ លក់បាយ មានទីលំនៅបច្ចុប្បន្ន ស្ថិតនៅភូមិ៥ សង្កាត់លេខ៤ ក្រុង-ខេត្តព្រះសីហនុ ។
៣-ឈ្មោះ ATIQ UR REHMAN ភេទប្រុស អាយុ ២៥ឆ្នាំ ជនជាតិប៉ាគីស្ថាន មុខរបរ មិនពិតប្រាកដមានទីលំនៅបច្ចុប្បន្ន ស្ថិតនៅភូមិ៥ សង្កាត់លេខ៤ ក្រុង-ខេត្តព្រះសីហនុ ។
៤-ឈ្មោះ SAMEER KHAN ភេទប្រុស អាយុ ២៣ឆ្នាំ ជនជាតិប៉ាគីស្ថាន មុខរបរ មិនពិតប្រាកដ មានទីលំនៅបច្ចុប្បន្ន ស្ថិតនៅភូមិ៥ សង្កាត់លេខ៤ ក្រុង-ខេត្តព្រះសីហនុ ។
បើតាមស្នងការដ្ឋាននគរបាលខេត្តព្រះសីហនុ បានឲ្យដឹងថា ករណីចាប់បង្ខាំងមនុស្សដោយខុសច្បាប់ និងធ្វើទារុណកម្មជំរិតទារប្រាក់ខាងលើនេះ កើតឡើងកាលពីថ្ងៃទី១ ខែកញ្ញា ឆ្នាំ២០២៥ វេលាម៉ោង០៥និង០០នាទី នៅចំណុចមុខហាងកាហ្វេប្រោន ស្ថិតនៅក្រុមទី១៧ ភូមិ៤ សង្កាត់លេខ៤ ក្រុង-ខេត្តព្រះសីហនុ បង្កដោយជនសង្ស័យចំនួន០៤នាក់ បានធ្វើសកម្មភាពបើករថយន្ត០១គ្រឿងម៉ាក PRIUS ពណ៌ស ទៅបុកម៉ូតូរបស់ជនរងគ្រោះឈ្មោះ RAHMAN MD AFZANUR ដែលជិះគ្នាចំនួន០៣នាក់ បណ្ដាលឱ្យដួលម៉ូតូ ហើយក្រុមជនសង្ស័យបានចុះពីលើរថយន្តចាប់ជនរងគ្រោះដាក់ចូលក្នុងរថយន្ត ហើយជិះគេចចេញពីកន្លែងកើតហេតុ រួចវាយធ្វើបាបទៅលើជនរងគ្រោះ និងគំរាមឱ្យជនរងគ្រោះបើកទូរសព្ទចូលក្នុងកុងធនាគារផ្ទេរប្រាក់ទាំងអស់ឱ្យជនសង្ស័យ បើជនរងគ្រោះមិនព្រមផ្ទេរប្រាក់ទេ ក្រុមជនសង្ស័យ និងវាយសម្លាប់ចោល ។
បើតាមស្នងការដ្ឋាននគរបាលខេត្តព្រះសីហនុ បានឲ្យដឹងបន្តថា ក្រោយមកជនរងគ្រោះ ខ្លាចគេសម្លាប់ក៏បានផ្ទេរប្រាក់ឱ្យទៅក្រុមជនសង្ស័យនោះទាំងអស់ សរុបចំនួន ១២,៥០០$ (មួយម៉ឺនពីរពាន់ប្រាំរយដុល្លារអាមេរិក) ។ បន្ទាប់ពីជនរងគ្រោះបានផ្ទេរប្រាក់ឱ្យរួចហើយ ក្រុមជនសង្ស័យបានដឹកជនរងគ្រោះទៅខេត្តកំពត ហើយនាំជនរងគ្រោះចូលក្នុងបន្ទប់ផ្ទះសំណាក់មួយកន្លែងក្នុងខេត្តកំពត រួចវាយធ្វើទារុណកម្មទៅលើជនរងគ្រោះ រួចថតវីដេអូ ផ្ញើមកមិត្តភក្តិរបស់ជនរងគ្រោះ ដើម្បីគំរាមទារប្រាក់ចំនួន៣០,០០០$ (បីម៉ឺនដុល្លារអាមេរិក) បើមិនដូចច្នេះទេ និងសម្លាប់ជនរងគ្រោះចោល ក្រោយមកមិត្តភក្តិរបស់ជនរងគ្រោះ បានឡើងមកកាន់អធិការដ្ឋាននគរបាលក្រុងព្រះសីហនុ ដើម្បីប្ដឹងរាយការណ៍ជូនសមត្ថកិច្ចឱ្យជួយអន្តរាគមន៍ និងសង្គ្រោះជនរងគ្រោះត្រឡប់មកវិញ ។
បន្ទាប់ពីទទួលបណ្ដឹងរួចហើយ កម្លាំងសមត្ថកិច្ច នៃអធិការដ្ឋាននគរបាលក្រុងព្រះសីហនុ បានធ្វើការស្រាវជ្រាវជុំវិញកន្លែងកើតហេតុ កំណត់បានភិនភាពជនសង្ស័យ រហូតដល់ថ្ងៃទី២ ខែកញ្ញា ឆ្នាំ២០២៥ វេលាម៉ោង១៣និង០០នាទី ទើបកម្លាំងអធិការដ្ឋាននគរបាលក្រុងព្រះសីហនុ បានសហការជាមួយសមត្ថកិច្ច នៃស្នងការដ្ឋាននគរបាលខេត្តកំពត ចុះប្រតិបត្តិការលើករណីខាងលើ នៅចំណុចកោះស្មៅ ស្ថិតក្នុងស្រុកទឹកឈូ ខេត្តកំពត ហើយឃាត់ខ្លួនជនសង្ស័យបានចំនួន០៤នាក់ខាងលើ និងរំដោះជនរងគ្រោះត្រឡប់មកវិញ រួចនាំខ្លួនជនសង្ស័យយកមកកាន់អធិការដ្ឋាននគរបាលក្រុងព្រះសីហនុ ដើម្បីធ្វើការសាកសួរ និងកសាងសំណុំរឿង បញ្ជូនមកការិយាល័យជំនាញ នៃស្នងការដ្ឋាននគរបាលខេត្តព្រះសីហនុ ចាត់ការតាមនីតិវិធី ។
វត្ថុតាងចាប់យកបាន ៖
-ទូរសព្ទម៉ាក I PHONE 15PRO MAX ពណ៌ស ០១គ្រឿង និងម៉ាក I PHONE 15PRO ពណ៌ប្រផេះ ០១គ្រឿង
-ទូរសព្ទម៉ាក I PHONE 15PRO MAX ពណ៌ស ០១គ្រឿង
-ទូរសព្ទម៉ាក I PHONE13 ពណ៌ស ០១គ្រឿង
-ទូរសព្ទម៉ាក I PHONE11 ពណ៌ខ្មៅ
-លិខិតឆ្លងដែនចំនួន០២ក្បាល ។
ចំពោះជនសង្ស័យចំនួន ០៤នាក់ ភេទប្រុស ជនជាតិប៉ាគីស្ថាន ព្រមទាំងវត្ថុតាងខាងលើ ត្រូវបានកម្លាំងសមត្ថកិច្ចជំនាញ បានកសាងសំនុំរឿងបញ្ជូនទៅសាលាដំបូងខេត្តព្រះសីហនុ ដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ