ទីក្រុងញូយ៉ក៖ អគ្គលេខាធិការអង្គការសហប្រជាជាតិ លោកអង់តូនីញ៉ូ ហ្គូតេរ៉េស បានអំពាវនាវឱ្យរបបសឹកនៅមីយ៉ាន់ម៉ាបិទបញ្ចប់អំពើហិង្សានៅក្នុងប្រទេសរបស់ខ្លួន។ លោកយល់ថាអំពើហិង្សានេះមិនត្រឹមតែប៉ះពាល់ស្ថិរភាពនៅមីយ៉ាន់ម៉ាប៉ុណ្ណោះទេ ប៉ុន្តែក៏គំរាមកំហែងចំពោះស្ថិរភាពនៅក្នុងតំបន់ថែមទៀតផង។ លោកហ្គូតេរ៉េសថ្លែងដូចខាងលើនេះនៅពេលលោកទៅចូលរួមកិច្ចប្រជុំកំពូលអាស៊ាននៅទីក្រុងគូឡាឡាំពួរ ប្រទេសម៉ាឡេស៊ី។
ជាថ្មីម្ដងទៀត លោកអំពាវនាវឱ្យបញ្ចប់អំពើហិង្សាជាបន្ទាន់, រកឱកាសសន្ទនាគ្នានៅក្នុងចំណោមគូបដិបក្សនយោបាយ និងវិលទៅរកការគ្រប់គ្រងប្រទេសដោយរដ្ឋាភិបាលស៊ីវិល។ ចាប់តាំងពីមានរដ្ឋប្រហារឆ្នាំ២០២១ រហូតមកដល់ពេលនេះ ប្រទេសមីយ៉ាន់ម៉ាពុំដែលស្គាល់សេចក្ដីសុខម្ដងណាឡើយ។ សង្គ្រាមស៊ីវិលដែលបានកើតឡើងជាយូរមកហើយចាប់ផ្ដើមផ្ទុះឡើងកាន់តែខ្លាំង។
របបដឹកនាំយោធារបស់លោកមីនអុងឡាំងគ្រប់គ្រងទឹកដីមួយផ្នែកធំ។ ចំណែកក្រុមចលនាប្រដាប់អាវុធដែលប្រឆាំងនឹងរបបដឹកនាំរបស់លោកក៏គ្រប់គ្រងបានទឹកដីម្នាក់មួយចំណែកៗ។ បញ្ហានេះធ្វើឱ្យរំខានយ៉ាងខ្លាំងចំពោះគម្រោងរៀបចំការបោះឆ្នោត។ ពោលគឺការបោះឆ្នោតនេះដូចអ្វីដែលរបបសឹកធ្លាប់បានប្រកាសទទួលស្គាល់រួចហើយគឺថាមិនអាចរៀបចំ១០០%គ្រប់ទីកន្លែងបានឡើយ។
របបសឹកថ្លែងថាខ្លួនកំពុងព្យាយាមបង្វែរការគ្រប់គ្រងប្រទេសពីយោធាមកស៊ីវិលវិញតាមរយៈការបោះឆ្នោតនៅចុងឆ្នាំនេះ។ គេគិតថាអំណាចពិតប្រាកដក្រោយការបោះឆ្នោតមុខជាគេចមិនផុតពីកណ្ដាប់ដៃរបស់ពួកយោធានោះទេ។ លោកហ្គូតេរ៉េសថ្លែងអ្វីដែលត្រូវធ្វើជាបន្តទៀតសម្រាប់មីយ៉ាន់ម៉ាគឺការស្ដារឡើងវិញនូវស្ថាប័ននានាដែលទ្រទ្រង់លទ្ធិប្រជាធិបតេយ្យ។
នៅពេលអ្នកសារព័ត៌មានសាកសួរពាក់ព័ន្ធនឹងគម្រោងបោះឆ្នោតនៅមីយ៉ាន់ម៉ា លោកហ្គូតេរ៉េសគិតថាគ្មាននរណាជឿថាការបោះឆ្នោតនេះនឹងប្រព្រឹត្តទៅដោយសេរី និងយុត្តិធម៌នោះទេ។ លោកនៅតែគាំទ្រផែនការសន្តិភាព៥ចំណុចដែលរបបសឹកធ្លាប់បានសន្យានៅចំពោះសមាគមអាស៊ានតាំងពីឆ្នាំ២០២១។ នោះគឺការបិទបញ្ចប់អរិភាពនៅក្នុងចំណោមគូបដិបក្សនានា ហើយនិងការចាប់ផ្ដើមការសន្ទនាគ្នាឡើងវិញ។ ប៉ុន្តែផែនការសន្តិភាពទាំងនេះមិនត្រូវបានរបបសឹកអនុវត្តឱ្យបានពេញលេញទេ។ របបសឹកចាត់ទុកក្រុមប្រដាប់អាវុធនៅក្នុងព្រៃជាពួកភេរវកម្មដែលត្រូវតែកម្ចាត់ចោល។ ដូច្នេះគ្មានត្រូវការសន្ទនាគ្នាទេ។
គេនៅចាំបានថានៅក្នុងផែនការសន្តិភាពនោះក៏មាននិយាយអំពីការអនុញ្ញាតឱ្យភ្នាក់ងារមនុស្សធម៌អាចបំពេញការងាររបស់ខ្លួននៅមីយ៉ាន់ម៉ា។ លោកហ្គូតេរ៉េសក៏ឆ្លៀតនិយាយអំពីចំណុចនេះផងដែរ។ លោកយល់ថាដល់ពេលដែលត្រូវអនុញ្ញាតឱ្យមានការផ្ដល់ជំនួយមនុស្សធម៌, ការបិទបញ្ចប់អំពើហិង្សា និងការសម្របសម្រួលដើម្បីបញ្ចប់ជម្លោះតាមដំណោះស្រាយនយោបាយ។ ប្រជាជនមីយ៉ាន់ម៉ាសង្ឃឹមលើការគាំទ្រជាសមូហភាពពីពួកយើង។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ