ទីក្រុងវ៉ាស៊ីនតោន៖ លោកត្រាំថ្លែងថាលោកពូទីនគួរណាស់បិទបញ្ចប់សង្គ្រាមអ៊ុយក្រែនជាជាងធ្វើតេស្តសាកល្បងមីស៊ីលបំពាក់ក្បាលគ្រាប់នុយក្លេអ៊ែរ។ លោកសូមរំលឹកលោកពូទីនថាឥឡូវនេះអាមេរិកបានបញ្ជូននាវាមុជទឹកនុយក្លេអ៊ែរទៅកៀកនឹងដែនសមុទ្ររុស្ស៊ីហើយ។ លោកថ្លែងដូច្នេះបន្ទាប់ពីលោកពូទីនថ្លែងកាលពីថ្ងៃអាទិត្យថារុស្ស៊ីបានធ្វើតេស្តដោយជោគជ័យនូវមីស៊ីលម៉ាកបុរេវេស្នីក (Burevestnik) ដែលបំពាក់ក្បាលគ្រាប់នុយក្លេអ៊ែរ ហើយអាចគេចផុតពីការតាមប្រមាញ់របស់ខែលការពារដែនអាកាសគ្រប់ប្រភេទ។ លោកពូទីនថានឹងដាក់ពង្រាយមីស៊ីលនេះនៅលើទីតាំងយុទ្ធសាស្ត្រសំខាន់ៗ។
គ្រាប់មីស៊ីលនេះត្រូវរុស្ស៊ីអះអាងថាបានហោះចម្ងាយ១៤០០០គីឡូម៉ែត្រ ហើយត្រូវអង្គការណាតូប្រសិទ្ធនាមថាអែសអែសស៊ី អ៊ិច៩ ស្កាយហ្វល (SSC-X-9 Skyfall)។ លោកត្រាំប្រាប់អ្នកសារព័ត៌មាននៅលើយន្តហោះអ៊ែហ្វស់វាន់ (Air Force One) ថាបើសម្រាប់អាមេរិកវិញ អាមេរិកមិនចាំបាច់បញ្ជូនគ្រាប់មីស៊ីលហោះឆ្ងាយដល់ម្លឹងទេព្រោះអាមេរិកប្រើនាវាមុជទឹកនុយក្លេអ៊ែរបើកចូលស្ងាត់ៗទៅសម្ងំលាក់ខ្លួនពួនអាត្មាក្បែរឆ្នេរសមុទ្រប្រទេសរុស្ស៊ីតែម្ដង។
ក្រោយមក សេតវិមានបានផ្សព្វផ្សាយសារជាសំឡេងរបស់លោកត្រាំថាពួកគេ (រុស្ស៊ី)ដឹងច្បាស់ណាស់ថាយើងមាននាវាមុជទឹកនុយក្លេអ៊ែរ ហើយមានច្រើនជាងគេបំផុតនៅលើពិភពលោកទៀតផង។ ឥឡូវនេះនាវាខ្លះបានបញ្ជូនទៅក្បែរឆ្នេរសមុទ្ររបស់ពួកគេ។ លោកនិយាយនេះចង់មានន័យថាអាមេរិកមិនចាំបាច់បាញ់មីស៊ីលហោះចម្ងាយ១៤០០០គីឡូម៉ែត្រទេ។
លោកគ្រាន់តែបង្ហើបឱ្យដឹងប៉ុណ្ណឹងលោកពូទីនអាចយល់បានហើយ មិនចាំបាច់ធ្វើអត្ថាធិប្បាយអ្វីវែងឆ្ងាយទេ។ ប៉ុន្តែអ្វីដែលសំខាន់លោកចង់ឃើញលោកពូទីនបញ្ចប់សង្គ្រាមអ៊ុយក្រែននៅក្នុងពេលនេះ។ សង្គ្រាមដែលគួរណាស់បិទបញ្ចប់ត្រឹមតែ១សប្ដាហ៍ប៉ុណ្ណោះ ប៉ុន្តែឥឡូវនេះវាបានអូសបន្លាយពេលដល់ជិត៤ឆ្នាំទៅហើយ។ នេះជាអ្វីដែលលោក (ពូទីន) គួរណាស់ធ្វើឱ្យបានជាជាងបាញ់សាកល្បងមីស៊ីល។
លោកត្រាំធ្លាប់និយាយជាច្រើនដងហើយថាលោកចង់ឃើញការបិទបញ្ចប់សង្គ្រាមអ៊ុយក្រែនឱ្យបានឆាប់ព្រោះវាជាសង្គ្រាមដែលធំ និងផ្ដាច់ផ្ដិលអាយុជីវិតរបស់មនុស្សច្រើនមិនធ្លាប់មាននៅអឺរ៉ុបចាប់តាំងពីក្រោយសង្គ្រាមលោកលើកទី២។ ទន្ទឹមនឹងនោះ លោកក៏ទទួលស្គាល់ផងដែរថាការស្វែងរកសន្តិភាពនៅអ៊ុយក្រែនពិតជាពិបាកណាស់។ ពោលគឺពិបាកជាងការចរចាឱ្យមានបទឈប់បាញ់នៅតំបន់ហ្កាហ្សា និងការបិទបញ្ចប់ជម្លោះរវាងឥណ្ឌា និងប៉ាគីស្ថានទៅទៀត។
ចាប់តាំងពីប្រកាសបើកសម្ពោធមីស៊ីលបុរេវេស្នីកកាលពីឆ្នាំ២០១៨ លោកពូទីនចាប់ផ្ដើមផ្សព្វផ្សាយមីស៊ីលនេះសម្បើមណាស់។ លោកអះអាងថាមីស៊ីលនេះជាការឆ្លើយតបទៅអាមេរិកដែលកំពុងកសាងខែលការពារមីស៊ីលបន្ទាប់ពីទីក្រុងវ៉ាស៊ីនតោនដកខ្លួនថយជាឯកតោភាគី «ពីកិច្ចព្រមព្រៀងឆ្នាំ១៩៧២ស្ដីពីការហាមឃាត់ការធ្វើតេស្តសាកល្បងមីស៊ីលផ្លោង» និងក៏ដើម្បីឆ្លើយតបទៅអង្គការណាតូដែលចេះតែពង្រីកសមាជិកភាពរបស់ខ្លួនជិតដល់របងផ្ទះរបស់រុស្ស៊ី។
លោកត្រាំថ្លែងថាពួកគេ (រុស្ស៊ី) មិនចង់លេងហ្គេមជាមួយយើងទេ ហើយយើងក៏មិនចង់លេងហ្គេមជាមួយពួកគេដែរ។ យើងធ្វើតេស្តសាកល្បងគ្រាប់មីស៊ីលជាហូរហែ។ មានសេចក្ដីរាយការណ៍ថាបើលោកពូទីននៅតែមិនព្រមបញ្ចប់សង្គ្រាមអ៊ុយក្រែនឱ្យបានឆាប់ទេ រដ្ឋាភិបាលរបស់លោកត្រាំអាចនឹងពិចារណាដាក់ទណ្ឌកម្មបន្ថែមទៀត។
ឆ្លើយតបទៅនឹងពាក្យសម្ដីរបស់លោកត្រាំនោះ រុស្ស៊ីចាប់ផ្ដើមបញ្ចេញប្រតិកម្មជាបណ្ដើរៗហើយ។ ចំពោះពាក្យសម្ដីរបស់លោកត្រាំដែលថារុស្ស៊ីគួរគិតគូរអំពីការបញ្ចប់សង្គ្រាមជាជាងបាញ់សាកល្បងមីស៊ីល អ្នកនាំពាក្យវិមានក្រឹមឡាំងលោកប៉េស្កូស ថ្លែងថាអ្វីដែលរុស្ស៊ីបាន និងកំពុងធ្វើនៅពេលនេះគឺដើម្បីការពារផលប្រយោជន៍ជាតិរបស់ខ្លួន។ លោកប៉េស្កូសយល់ថាការធ្វើតេស្តមីស៊ីលនេះមិនគួរធ្វើឱ្យប៉ះពាល់ទំនាក់ទំនងរវាងម៉ូស្គូ និងវ៉ាស៊ីនតោននោះទេ។ នេះបើតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ