ទីក្រុងកាត់ត្មាន់ឌូ៖ ស្ថានការណ៍នៅប្រទេសណេប៉ាល់កាន់តែជ្រួលច្របល់ខ្លាំងមែនទែនហើយ។ នៅយប់ថ្ងៃអង្គារនេះ ហ្វូងបាតុកររាប់រយនាក់សម្រុកចូលវិមានរដ្ឋសភានៅរដ្ឋធានីកាត់ត្មាន់ឌូ និងដុតឆេះយ៉ាងសន្ធោសន្ធៅ។ គេអាចមើលឃើញពីចម្ងាយនូវភ្លើងឆេះចេញពីអគារ។ ហ្វូងបាតុករបន្ទាប់ពីដុតឆេះហើយ ពួកគេមិនបានទៅណាទេ ពួកគេសំកុកនៅក្បែរៗបរិវេណសភា។
ហ្វូងបាតុករបានធ្វើផ្គើននឹងបម្រាមគោចរដែលដាក់ចេញដោយអាជ្ញាធរ។ ពួកគេហាក់ដូចជាមានកំហឹងយ៉ាងខ្លាំងបន្ទាប់ពីមានករណីស្លាប់គ្នារបស់គេកាលពីម្សិលមិញ។ ពួកបាតុករខ្លះរាំ និងស្រែកពាក្យជ័យឃោសនៅក្បែរកន្លែងឆេះនៃមាត់ច្រកចូលអគារ។ ពួកគេភាគច្រើនកាន់ទង់ជាតិណេប៉ាល់។ គ្នារបស់គេខ្លះដើរចូលទៅក្នុងអគារដែលកញ្ចក់បង្អួចត្រូវបានវាយបំបែកខ្ទេចខ្ទីអស់។
នៅខាងក្រៅអគារ គេឃើញតែការបាញ់ថ្នាំប្រឡាក់ពាសពេញជញ្ជាំង។ ប្រភពខ្លះឱ្យដឹងថាមន្ត្រីជាន់ខ្ពស់របស់ណេប៉ាល់កំពុងលាក់ខ្លួននៅក្នុងទីន្លែងសុវត្ថិភាពក្រោមការការពារពីកងកម្លាំងប្រដាប់អាវុធ។ រហូតមកដល់ពេលនេះ ក្រុមបាតុករនៅតែមិនព្រមទម្លាក់ចោលការទាមទាររបស់ពួកគេដែលស្នើសុំឱ្យកម្ចាត់អំពើពុករលួយ។ តាមមើលទៅ ចលនាបាតុកម្មនេះកើតឡើងដោយឯកឯង និងគ្មាននរណាបញ្ជាពីក្រោយទេ។
បន្ទាប់ពីនាយករដ្ឋមន្ត្រីណេប៉ាល់ប្រកាសលាលែងពីតំណែងកាលពីល្ងាចមិញ គេមិនទាន់ដឹងច្បាស់ថាតើនរណានឹងឡើងមកជំនួសលោក។ ម៉្យាងទៀត មិនទាន់មានមន្ត្រីរដ្ឋាភិបាលណាចេញសេចក្ដីថ្លែងការណ៍ ឬចេញមុខដោះស្រាយបញ្ហានៅចំពោះមុខទេ។ គេឃើញតែមន្ត្រីកំពូលៗនៃកងកម្លាំងប្រដាប់អាវុធ និងមន្ត្រីថ្នាក់ក្រោមៗអំពាវនាវឱ្យមានភាពស្ងប់ស្ងាត់។
សម្រាប់ពេលនេះ នយោបាយណេប៉ាល់ស្ថិតនៅក្នុងដំណាក់កាលចំហនៅពេលគ្មានមេដឹកនាំ។ បើនៅតែបណ្ដោយបែបនេះតទៅទៀត គេបារម្ភថាអំពើហិង្សាអាចនឹងបន្តកើតឡើង។ តាមពិត កងទ័ពណេប៉ាល់ជាស្ថាប័នដ៏មានឥទ្ធិពល និងជាទីគោរព។ ពួកគេអាចនឹងដើរតួនាទីសំខាន់ក្នុងការថែរក្សាសណ្ដាប់ធ្នាប់ឡើងវិញ។ ប៉ុន្តែបញ្ហាច្បាប់ និងសណ្ដាប់ធ្នាប់ជាកិច្ចការរបស់នគរបាល។ ហេតុនេះហើយ ពួកគេមិនទាន់ចង់លូកដៃចូលក្នុងកិច្ចការនេះទេ។ នេះបើយោងតាមប្រភពពីប៊ីប៊ីស៊ី និងប្រភពដទៃទៀត៕
ចែករំលែកព័តមាននេះ