យើងតែងតែគិតថា វីតាមីន D គឺសម្រាប់តែ ជំងឺពុកឆ្អឹង ប៉ុណ្ណោះ។ ប៉ុន្តែ ការសិក្សាស្រាវជ្រាវជាច្រើនបានបង្ហាញថា វីតាមីនដ៏សំខាន់នេះ មានតួនាទីយ៉ាងជ្រាលជ្រៅក្នុងការ លូតលាស់ និងដំណើរការរបស់ប្រព័ន្ធប្រសាទ ទៀតផង!

ហេតុអ្វីយើងខ្វះវីតាមីន D?
ទោះបីយើងរស់នៅក្នុងតំបន់ត្រូពិកដែលមានពន្លឺព្រះអាទិត្យខ្លាំងក៏ដោយ ក៏យើងនៅតែអាចប្រឈមនឹងការខ្វះវីតាមីន D បានដែរ។ មូលហេតុរួមមាន៖

• ការផ្លាស់ប្តូរជីវិតក្នុងទីក្រុង: យើងចំណាយពេលច្រើននៅក្នុងផ្ទះ ឬការិយាល័យ។
• ការបំពុលបរិយាកាស: ខ្យល់បំពុលអាចកាត់បន្ថយប្រសិទ្ធភាពនៃការស្រូបយកពន្លឺព្រះអាទិត្យ។
• របៀបស្លៀកពាក់: ការស្លៀកពាក់បិទបាំងជិតៗ ធ្វើឱ្យស្បែកទទួលបានពន្លឺព្រះអាទិត្យតិច។

ផលប៉ះពាល់ដ៏គ្រោះថ្នាក់ដល់ខួរក្បាល និងប្រព័ន្ធប្រសាទ:
ការខ្វះវីតាមីន D មិនត្រឹមតែប៉ះពាល់ដល់ឆ្អឹងប៉ុណ្ណោះទេ ថែមទាំងអាចបង្កឱ្យមានបញ្ហាធ្ងន់ធ្ងរដល់ប្រព័ន្ធប្រសាទរបស់យើង ដែលរួមមាន៖

ចំពោះប្រព័ន្ធប្រសាទកណ្តាល (Central Nervous System):

• ថយចុះទំហំខួរក្បាល
• ជំងឺក្រិនប្រព័ន្ធប្រសាទ (Multiple Sclerosis)
• ជំងឺរលាកសរសៃភ្នែក
• ជំងឺឆ្កួតជ្រូក (Epilepsy)
• ផលប៉ះពាល់ដល់សរសៃឈាមខួរក្បាល និងការស្ទះសរសៃឈាម
• ជំងឺផាកឃីនសុន (Parkinson’s Disease)
• ជំងឺស្វិតសាច់ដុំ (Amyotrophic Lateral Sclerosis – ALS)
• ប៉ះពាល់ដល់ការចងចាំ និងបង្កជាជំងឺភ្លេចភ្លាំង (Alzheimer’s Disease)

ចំពោះប្រព័ន្ធប្រសាទខាងក្រៅ (Peripheral Nervous System):

• បញ្ហា​សាច់ដុំ: ឈឺចុកចាប់ និងខ្សោយសាច់ដុំ។
• បញ្ហា​សរសៃប្រសាទ: រងការប៉ះពាល់ដល់សរសៃប្រសាទដោយផ្ទាល់។

អ្វីដែលអ្នកគួរធ្វើ?
ប្រសិនបើអ្នកសង្ស័យថាអ្នកមានកង្វះវីតាមីន D សូមពិគ្រោះជាមួយវេជ្ជបណ្ឌិត ដើម្បីទទួលបានការធ្វើរោគវិនិច្ឆ័យ និងការណែនាំអំពីវិធីបង្កើនកម្រិតវីតាមីន D ឱ្យបានត្រឹមត្រូវ។ ការថែរក្សាកម្រិតវីតាមីន D ឱ្យបានល្អ គឺជារឿងចាំបាច់សម្រាប់ការថែរក្សាសុខភាពខួរក្បាល និងប្រព័ន្ធប្រសាទរបស់អ្នកឱ្យរឹងមាំ៕

ប្រភព៖ មន្ទីរពេទ្យកាល់ម៉ែត
​