ខេត្តសៀមរាប ៖ ព័ត៌មានជំហានដំបូងដែលបង្កឱ្យមានការភ្ញាក់ផ្អើលជាទូទៅ ពីស្នេហាត្រីកោណរវាងបុរសម្នាក់និងនារី២នាក់ ជាបងប្អូនជីដូនមួយ ហើយឮថាណាត់ជួបគ្នាផឹកថ្នាំពុលធ្វើអត្តឃា.តទាំង៣នាក់ កណ្តាលយប់ឈានចូលថ្ងៃទី១៣ កក្កដានោះដោយសារតែល្បែងស្នេហាលេងបានតែ២នាក់នោះ ពិតជាបង្កើតឱ្យមានចម្ងល់
ខេត្តសៀមរាប ៖ ព័ត៌មានជំហានដំបូងដែលបង្កឱ្យមានការភ្ញាក់ផ្អើលជាទូទៅពីស្នេហាត្រីកោណរវាងបុរសម្នាក់និងនារី២នាក់ ជាបងប្អូនជីដូនមួយ ហើយឮថាណាត់ជួបគ្នាផឹកថ្នាំពុលធ្វើអត្តឃាតទាំង៣នាក់កណ្តាលយប់ឈានចូលថ្ងៃទី១៣ កក្កដានោះដោយសារតែល្បែងស្នេហាលេងបានតែ២នាក់នោះ ពិតជាបង្កើតឱ្យមានចម្ងល់មួយចំពោះហេតុការណ៍ចម្លែកបែបនេះ ។ ទោះបីជាបែបណារឿងរ៉ាវនៃការលេបថ្នាំពុលត្រូវបានលាតត្រដាងហើយដោយអ្នកដែលទទួលការសង្គ្រោះបានរួចផុតពីសេចក្តីស្លាប់ ។
រឿងរ៉ាវគួរឱ្យចាប់អារម្មណ៍នេះបានកើតឡើងកាលពីចន្លោះម៉ោងប្រមាណ១២ទៅម៉ោង ១យប់ឈានចូលថ្ងៃទី១៣ កក្កដា នៅក្នុងផ្ទះមួយស្ថិតនៅភូមិឬស្សីលក ឃុំសង្វើយ ស្រុកជីក្រែងភាគខាងកើតខេត្ដសៀមរាប ដោយបងប្អូនស្រីជីដូនមួយពីរនាក់ និងយុវជនម្នាក់ដែលគេសង្ស័យថា អ្នកទាំងបីនាក់នោះបានលេងល្បែងស្នេហាត្រីកោណដោយសម្ងាត់ ហើយដល់ពេលបែកការណ៍រៀងៗខ្លួនក៍៍សម្រេចចិត្ដលេបថ្មាំបំពុលសត្វបញ្ចប់ជីវិត ។ ប៉ុន្ដែទីបំផុតនារីជាប្អូនជីដូនមួយដែលជាចំណែកនៃស្នេហាត្រីកោណនេះបានស្លាប់នៅមន្ទីរពេទ្យបង្អែកខេត្ដមុនទៅហើយ ។ ចំណែកពីរនាក់ទៀតម្នាក់ជាបុរសនិងម្នាក់ទៀតជានារីត្រូវបានក្រុមគ្រូពេទ្យជួយសង្គ្រោះបានរស់ទាន់ពេលវេលា ។
ក្នុងរឿងរ៉ាវគួរឱ្យភ្ញាក់ផ្អើលនេះ តួអង្គបុរសមានឈ្មោះ សាត ទី អាយុ១៩ឆ្នាំ រីឯតួអង្គនារីដែលជាបងប្អូនជីដូនមួយនឹងគ្នានោះមានឈ្មោះស៊ុន ចាន្នី អាយុ២២ឆ្នាំ រីឯឈ្មោះទ្រា ចន្ទ្រា អាយុ២១ឆ្នាំ«ស្លាប់»ដែលអ្នកទាំងបីនោះរស់នៅក្នុងភូមិកើតហេតុខាងលើជាមួយគ្នា ។
នៅព្រឹកថ្ងៃទី១៤ កក្កដានេះ នៅបន្ទប់អគារសង្គ្រោះបន្ទាន់នៃមន្ទីរពេទ្យបង្អែកខេត្ដ បុរសនារីពីររូបដែលរួចផុតពីសេចក្ដីស្លាប់បានរៀបរាប់ប្រាប់កោះសន្តិភាពពីប្រវត្ដិស្នេហារបស់ពួកគេនិងដំណើររឿងដែលពួកគេលេបថ្មាំពុលដើម្បីបញ្ចប់ជីវិតថា ការសម្រេចបញ្ចប់ជីវិតនោះគឺមិនមែនកើតឡើងដោយបញ្ហាស្នេហានោះទេ តែជាបញ្ហាគ្រួសារស្ដីបន្ទោសតែប៉ុណ្ណោះ ។
យុវជនឈ្មោះសាត ទី នៃតួអង្គប្រុសនៅក្នុងភ្លើងស្នេហាត្រីកោណនោះបាននិយាយថា កាលពីយប់កើតហេតុពួកគេទាំងបីនាក់បានជួបជុំគ្នានៅផ្ទះម្ដាយមីងរបស់ចាន្នី និងចន្ទ្រា ដែលនៅក្បែរផ្ទះរបស់ខ្លួន។ លុះរហូតដល់យប់ជ្រៅ ចាន្នីដែលជានារីកំពូលស្នេហ៍របស់ខ្លួនបានប្រាប់ថា នាងមិនចង់រស់ទៀតទេ ព្រោះឪពុកនាងស្ដីបន្ទោសថានាងផឹកស្រា ហើយក៏ទាញកព្ចាប់ថ្នាំមួយកញ្ចក់បម្រុងនឹងលេប ធ្វើឱ្យរូបគេភ័យពេក ក៏ស្រវាទាញថ្នាំនោះបានកន្លះកញ្ចប់។ តែបំណាច់ស្រឡាញ់ពេកខ្លាចនាងសំលាប់ខ្លួននោះរូបគេក៏លេបថ្នាំនោះទៅ ហើយក៏មានអាការវិលមុខក្អួតរួចសន្លប់បាត់ទៅ ។
យុវជនរូបនោះបានបន្ដថា ចំពោះរឿង ចន្ទ្រានោះមិនមានទំនាក់ទំនងស្នេហាអ្វីនឹងគ្នាទេ ហើយក៏មិនដែលប្រាប់ពីមុនមកដែរ ឆ្ងល់ណាស់ហេតុអ្វីបានជារូបនាងលេបថ្នាំសំលាប់ខ្លួនតាមក្រោយបែបនេះទៅវិញ ?
ចំណែកឯតួអង្គខាងស្រីដែលសល់ពីសេចក្ដីស្លាប់គឺស៊ុន ចាន្នី បាននិយាយថា ការស្លាប់របស់ចន្ទ្រាពិតជាកើតឡើងដោយស្នេហាត្រីកោណ ទើបរូបនាងសម្រេចចិត្ដលេបថ្នាំបំពុលសំលាប់ខ្លួនតាមពីក្រោយពួកនាងបែបហ្នឹង ព្រោះកាលពីប៉ុន្មានថ្ងៃមុននេះចន្ទ្រាបានសារភាពថា នាងពិតជាស្រឡាញ់បងទីខ្លាំងណាស់ ទោះដឹងថានាងនិងឈ្មោះទីជាគួរសង្សានឹងគ្នាក៏ដោយ ។
នាងបានបញ្ចាក់ទៀតថា ដោយសារឪពុកជេរស្ដីពេកទើបនាងចង់ធ្វើអត្តឃាតក៏បានទៅទិញថ្នាំបំពុលសត្វពីផ្ទះមួយនៅភូមិអូរ ប៉ុន្ដែមិនទាន់បានលេបផង ស្រាប់តែបងទីគាត់កញ្ឆក់កញ្ចប់ថ្នាំបានមុនរួចក៏លេបតែម្ដង ។ ភ្លាមៗនោះរូបនាងក៏សម្រេចចិត្ដលេបតាមពីក្រោយ ហើយប្រមាណជា២ទៅ៣នាទីក៏លែងដឹងខ្លួន លុះដឹងខ្លួនស្រាប់តែនៅក្នុងមន្ទីរពេទ្យខេត្ដនេះតែម្ដង។
គូសង្សារដែលរួចផុតពីសេចក្ដីស្លាប់នោះ គឺសាត ទី និងស៊ុន ចាន្នី ក៏បានរៀបរាប់ប្រាប់ពីប្រវត្ដិស្នេហារបស់ពួកគេយ៉ាងដូច្នេះថា ពន្លកស្នេហារវាងរូបគេទាំងពីរបានកើតឡើងជាយូរខែមកហើយ គឺចាប់តាំងពីរដូវរំហើយឆ្នាំទៅមិញ នៅគ្រាដែលទៅស៊ីឈ្នួលច្រូតស្រូវរួមគ្នានៅឯខេត្ដបាត់ដំបងមកម្ល៉េះ ។ ដោយពុំបានដឹងថា ចន្ទ្រាដែលជាប្អូនស្រីជីដូនមួយចាប់ចិត្ដស្រឡាញ់ភាគីខាងប្រុសនោះទេ ទើបតែពេលថ្មីចន្ទ្រាបានធ្លាយនិយាយការពិត។
ដោយអង្គុយនៅលើគ្រែនៃអគារសង្គ្រោះបន្ទាន់និងក្បែរបុរសកំពូលស្នេហ៍របស់ខ្លួនចាន្នីបានរៀបរាប់ប្រាប់បន្ដថា ទំនាក់ទំនងស្នេហ៍រវាង រូបខ្ញុំជាមួយបងទីពុំមានការបើកចំហរពេកទេ សូម្បីតែឪពុកម្ដាយទាំងសងខាងក៏មិនបានដឹងដែរ គឺរៀងរាប់ពេលពួកយើងបានសន្ទនាគ្នាបញ្ជាក់នូវទឹកដមស្នេហាតាមរយៈទូរសព្ទ័តែប៉ុណ្ណោះ។
ពេលវេលាបានរំកិលទៅមុខអស់រយៈកាលជាងមួយឆ្នាំ បាននាំពួកគេទៅដល់ចំណុចខ្ពស់បំផុតនៃបណ្ដូលស្នេហា ហើយសច្ចាផ្សងថា ជាតិនេះមិនព្រាត់គ្នាសោះឡើយ បើទោះជាមានឧបសគ្គមករារាំងក៏មិនអាចបំបែកពួកគេចេញពីគ្នាបានដែរ។
ប្រធានផ្នែករអគារសង្គ្រោះបន្ទាន់ជំងឺទូទៅ លោកស៊ុំ ពុទ្ធផន កាលពីព្រឹកថ្ងៃទី១៤ កក្កដានេះ បានថ្លែងថា ជនរងគ្រោះដោយសារទង្វើដ៏ឆោតល្ងង់ទាំងបីនាក់ពិតជាបានលេបថ្នាំបំពុលសត្វមែនគឺម្នាក់ក្នុងចំណោមហ្នឹងបានស្លាប់ទៅហើយ ដោយសារជាតិថ្នាំជ្រាបចូលច្រើនពេក ហើយពីរទៀតរួចផុតពីសេចក្ដីស្លាប់និងអាចត្រឡប់ទៅផ្ទះវិញនៅល្ងាចនេះ ៕
ចែករំលែកព័តមាននេះ