ខេត្តបាត់ដំបង ៖ ក្រោយពីកោះសន្តិភាពហែកទម្លាយនូវភាពមិនប្រក្រតីរបស់លោកមេប៉ុស្ដិ៍ស្ដីទីភ្នំសំពៅ ដែលបានបង្ខំឲ្យភាគីជម្លោះចរចាបញ្ចប់សំណុំរឿងព្រហ្មទណ្ឌស្ងាត់ៗ មិនបានឆ្លងយោបល់ថ្នាក់ដឹកនាំ ឬតំណាងអយ្យការ ពេលនេះ លោកស្នងការបានបញ្ជាឲ្យមន្ត្រីជំនាញនៃអធិការស្រុកបាណន់ ធ្វើការស្រាវជ្រាវតាមចាប់ខ្លួនក្រុមជនសង្ស័យបានម្នាក់ ហើយបានកសាងសំណុំរឿងបញ្ជូនទៅកាន់សាលាដំបូងហើយនៅព្រឹកថ្ងៃទី០៩ កញ្ញា ។ នេះបើតាមមន្ត្រីការិយាល័យជំនាញបាននិយាយ ។
មន្ត្រីការិយាល័យជំនាញបានឲ្យដឹងថា ជនសង្ស័យឈ្មោះ ជួប វិទូ ភេទប្រុស អាយុ២៨ឆ្នាំ មានមុខរបរច្រៀងភ្លេងការ រស់នៅភូមិក្រពើជើង ឃុំភ្នំសំពៅ ស្រុកបាណន់ ។ ជននេះ ត្រូវបានកម្លាំងអធិការស្រុកបាណន់ឃាត់ខ្លួនបាន កាលពីល្ងាចថ្ងៃទី០៦ កញ្ញា បន្ទាប់ពីលោកមេប៉ុស្ដិ៍ស្ដីទី ឃុំភ្នំសំពៅ ជម្រុញឲ្យភាគីរងគ្រោះ ទទួលយកការសម្រុះសម្រួលពីភាគីបង្កក្នុងសំណុំរឿង «ហិង្សាដោយចេតនា មានស្ថានទម្ងន់ទោស» ដោយលោកមេប៉ុស្ដិ៍រូបនេះ មិនបានឆ្លងយោបល់ថ្នាក់ដឹកនាំ ឬសុំយោបល់ព្រះរាជអាជ្ញាមួយម៉ាត់ឡើយ ។ ជនរងគ្រោះឈ្មោះ ហេង ដារ៉ាវង្ស ភេទប្រុស អាយុ២០ឆ្នាំ មានមុខរបរជាងថតរូប រស់នៅភូមិភ្នំសំពៅ ឃុំភ្នំសំពៅ ស្រុកបាណន់ ។ ជនរងគ្រោះ ត្រូវបានមនុស្សមួយក្រុមដែលដឹកនាំដោយឈ្មោះ ជួប វិទូ (ជនសង្ស័យ) ពួនចាំស្ទាក់វាយ និងបាញ់ដោយជំពាមកៅស៊ូនៅយប់ថ្ងៃទី០៤ កញ្ញា ត្រង់ចំណុច «ស្ពានបឹងច្រមុះ» ស្ថិតក្នុងភូមិសំណាញ់ ឃុំភ្នំសំពៅ ស្រុកបាណន់ ខណៈដែលជនរងគ្រោះកំពុងជិះម៉ូតូជាមួយមិត្តភក្ដិឈ្មោះ ខួច ។
ប៉ុន្តែអ្នកឌុបឈ្មោះ ខួច មិនមែនជាគោលដៅដែលក្រុមជនសង្ស័យត្រូវវាយទេ គឺក្រុមជនសង្ស័យមានបំណងវាយតែទៅលើឈ្មោះ ដារ៉ាវង្ស តែម្នាក់ប៉ុណ្ណោះ ព្រោះជនសង្ស័យឈ្មោះ ទូ បានឈ្លោះប្រកែកជាមួយឈ្មោះ ដារ៉ាវង្ស មុនពេលកើតហេតុមួយថ្ងៃ ។ ជនរងគ្រោះឈ្មោះ ហេង ដារ៉ាវង្ស បានប្រាប់កោះសន្តិភាពតាមទូរស័ព្ទថា ខ្លួននិងឈ្មោះ ទូ (ជនសង្ស័យ) បានឈ្លោះប្រកែកគ្នាបន្តិចបន្តួចទេ ។ ជម្លោះនេះ បានធ្វើឲ្យឈ្មោះទូ ខឹងដោយចោទខ្លួនថា «កេ្មងសោះហ៊ានមើលងាយគាត់» រហូតឈ្មោះទូ បានបបួលខ្លួនឡើងសង្វៀនប្រដាល់វាយគ្នា តាមពិតអ្វីៗដែលខ្លួនប្រកែកជាមួយឈ្មោះទូ គឺខ្លួនគ្រាន់តែនិយាយលេងជាមួយគាត់ ព្រោះធ្លាប់លេងបាល់ ផឹកស៊ីជាមួយគ្នាស្ទើររាល់ថ្ងៃ ។
មិនតែប៉ុណ្ណោះ ខ្លួននិងឈ្មោះទូ ក៏ធ្លាប់ជួយគ្នានៅតាមរោងការនានាទៀតផង មិននឹកស្មានថា «គាត់ប្រកាន់ចងគំនុំ រហូតនាំបក្សពួកតាមពួនស្ទាក់វាយខ្លួនដូច្នេះទេ ។ ជនរងគ្រោះបានបញ្ជាក់ថា នៅយប់កើតហេតុ ឈ្មោះទូ បានទូរស័ព្ទប្រាប់មិត្តភក្ដិខ្លួនឈ្មោះ ខួច ឲ្យឌុបខ្លួនទៅកន្លែងគេលេងប្រដាល់ ហើយខ្លួនក៏ជិះទៅជាមួយមិត្តភក្តិឈ្មោះខួច តែមិននឹងស្មានថា ឈ្មោះ ទូ នាំបក្សពួកមកស្ទាក់ចាំវាយខ្លួនទេ ។ លុះជិះដល់ចំណុច«បឹងច្រមុះ» ដែលជាកន្លែងស្ងាត់ ស្រាប់តែឈ្មោះ ទូ និងបក្សពួកប៉ុន្មាននាក់ទៀត ចេញមកកាក់ រួចលើកដំបង ឬកាំបិត ស្ទុះមករកវាយខ្លួន តែសំណាងល្អ ខ្លួនលោតចុះពីម៉ូតូរត់រួច ហើយពេលនោះ មិត្តភក្ដិខ្លួនឈ្មោះ ខួច បានចាប់ដៃឈ្មោះ ទូ ជាប់ តែពេលខ្លួនស្ទុះរត់ ក៏ត្រូវបក្សពួកឈ្មោះ ទូ ប្រើជំពាកៅស៊ូបាញ់មកលើខ្លួនត្រូវមួយគ្រាប់ចំខ្នង ហើយខ្លួនសង្ស័យជាគ្រាប់បាដាងកង់ ។
ជនរងគ្រោះបានបន្ថែមថា ក្រោយកើតហេតុភ្លាមៗ ខ្លួនក៏បានទៅប្ដឹងនៅប៉ុស្ដិ៍នគរបាល ឃុំភ្នំសំពៅទាំងយប់ ។ ដំបូងមន្ត្រីប៉ុស្ដិ៍មិនចង់ទទួលបណ្ដឹងទេ លុះបន្តិចក្រោយមក ទើបមន្ត្រីប៉ុស្ដិ៍ព្រមទទួលបណ្ដឹងខ្លួន ។ លុះព្រឹកថ្ងៃទី០៥ កញ្ញា ក៏ឲ្យខ្លួននិងមិត្តភក្ដិខ្លួនទៅបំភ្លឺម្ដងទៀត តែគេមិនសួរនាំអ្វីទេ រហូតដល់ថ្ងៃល្ងាច ក៏បង្ខំឲ្យខ្លួនទូរស័ព្ទហៅជនបង្កឈ្មោះ ទូមិនចរចាគ្នាបញ្ចប់រឿងត្រឹមប៉ុស្ដិ៍ តែខ្លួនមិនហ៊ានទូរស័ព្ទហៅជនបង្កទេ ។ ត្រង់ចំណុចនេះ ជនរងគ្រោះរូបនេះបាននិយាយថា នៅល្ងាចថ្ងៃដដែល ស្រាប់តែឃើញឈ្មោះ ទូ មកជួបខ្លួននៅប៉ុស្ដិ៍នគរបាល ហើយមន្ត្រីប៉ុស្ដិ៍បានបង្ខំឲ្យខ្លួនធ្វើការចរចាគ្នាបញ្ចប់រឿងដោយមន្ត្រីរូបនោះបានព្រមានខ្លួនថា «បើមិនព្រមចរចាបញ្ចប់ត្រឹមប៉ុស្ដិ៍ទេ គាត់នឹងចាប់បញ្ជូនទាំង០២ភាគីទៅដេកហាលខ្យល់នៅអធិការស្រុក ។ ដោយខ្លាចដូចការគំរាមផង ខ្លួនមិនសូវយល់ដឹងពីច្បាប់ផង ទើបក្រុមគ្រួសារខ្លួនគិតថា កុំឲ្យវែងឆ្ងាយ ក៏ជឿលើសំដីលោកមេប៉ុស្ដិ៍ ក៏សម្រេចចរចាបញ្ចប់រឿងត្រឹមប៉ុស្ដិ៍ ជាមួយនឹងសំណងបន្តិចបន្តួច រួចធ្វើកិច្ចសន្យាបញ្ឈប់បង្ករឿងជាមួយគ្នាទៀត នៅត្រឹមប៉ុស្ដិ៍ភ្នំសំពៅនោះទៅ ។
ងាកមកនិយាយពីអ្នកច្រៀងភ្លេងការ ដែលជាជនសង្ស័យឈ្មោះជួប វិទូ ក្រោយត្រូវសមត្ថកិច្ចឃាត់ខ្លួនយកមកសួរនាំ ជននេះបានសារភាពទទួលស្គាល់កំហុសរបស់ខ្លួនថា ខ្លួនពិតជាបានធ្វើសកម្មភាពពួនស្ទាក់វាយទៅលើជនរងគ្រោះឈ្មោះដារ៉ាវង្សមែន ដោយប្រើប្រាស់ដំបងដែករលាស់ ។ ប៉ុន្តែជននេះបានបដិសេធថា ខ្លួនមិនបានវាយត្រូវជនរងគ្រោះទេ ដោយសារជនរងគ្រោះលោតចុះពីម៉ូតូរត់រួច ។ ជននេះបាននិយាយថា មូលហេតុដែលខ្លួនស្ទាក់វាយជនរងគ្រោះ ដោយសារខឹងជនរងគ្រោះសម្ដីឈ្លើយមិនគោរពខ្លួនដែលមានអាយុច្រើនជាង ទើបនៅយប់នោះ ខ្លួនទូរស័ព្ទប្រាប់ឈ្មោះខួច ជាមិត្តភក្ដិជនរងគ្រោះ ឲ្យឌុបឈ្មោះដារ៉ាវង្ស មកជួបខ្លួន លុះជិះមកដល់ចំណុចបឹងច្រមុះ ខណៈខ្លួននិងបក្សពួកពួនចាំនៅទីនោះ ក៏ស្ទាក់វាយតែម្ដង ។
ជននេះបញ្ជាក់ថា ខ្លួនមិនបានវាយជនរងគ្រោះទេ ព្រោះរត់ផុត រីឯគ្រាប់ជំពាមកៅស៊ូ ដែលបាញ់ត្រូវខ្នងជនរងគ្រោះ ក៏ខ្លួនមិនបានបាញ់ដែរ តែអាចបក្សពួកខ្លួនជាអ្នកបាញ់។ លោក ឈឿង គឹមសុង ស្នងការរងទទួលផែនព្រហ្មទណ្ឌបាននិយាយថា សំណុំរឿងនេះលោកមិនបានដឹងទេ ចាប់តាំងពីពេលកើតហេតុ រហូតដល់ថ្ងៃដែលគេចរចាគ្នាបញ្ចប់រឿងត្រឹមប៉ុស្ដិ៍រដ្ឋបាល ។ ប៉ុន្តែក្រោយពីបែកធ្លាយរឿងនេះ លោកស្នងការក៏បានបញ្ជាឲ្យលោកដឹកនាំមន្ត្រីជំនាញចុះទៅសួរនាំជាថ្មី និងធ្វើការស្រាវជ្រាវរហូតតាមឃាត់ខ្លួនជនសង្ស័យបានម្នាក់ឈ្មោះ ជួប វិទូ ដែលជាសាមីខ្លួនក្នុងជម្លោះជាមួយជនរងគ្រោះ តែបក្សពួកផ្សេងទៀតបានរត់គេចខ្លួនអស់ហើយ ។ លោកឈឿង គឹមសុងបានបញ្ជាក់ថា ក្រោយត្រូវឃាត់ខ្លួន ជនសង្ស័យឈ្មោះ ជួប វិទូ បានសារភាពទទួលស្គាល់់កំហុស ហើយពេលនេះលោកស្នងការខេត្តបានបញ្ជាឲ្យមន្ត្រីការិយាល័យជំនាញកសាងសំណុំរឿង បញ្ជូនជននេះទៅកាន់សាលាដំបូងខេត្តហើយ តែមន្ត្រីជំនាញកំពុងតាមរកមុខបក្សពួកជនសង្ស័យដែលរត់គេចខ្លួនបន្តទៀត ដើម្បីចាត់វិធានការតាមនីតិវិធី ៕
ចែករំលែកព័តមាននេះ