អាកាសយានដ្ឋានអន្តរជាតិថ្មីដែលទើបបើកដំណើរការ នៅថ្ងៃទី០៩ ខែកញ្ញា ឆ្នាំ២០២៥នេះ ត្រូវបានពលរដ្ឋគិតថា ប្រសិនបើអាចលៃលកទុកទីកន្លែងបន្តិច ឬមានហាងដែលមានបញ្ជីម្ហូបនំបញ្ចុកខ្មែរ វា គឺជាការលើកស្ទួយអាហារប្រពៃណី និងកសាងយីហោខ្មែរឲ្យបរទេសបានស្គាល់…
អាកាសយានដ្ឋានអន្តរជាតិថ្មីដែលទើបបើកដំណើរការ នៅថ្ងៃទី០៩ ខែកញ្ញា ឆ្នាំ២០២៥នេះ ត្រូវបានពលរដ្ឋគិតថា ប្រសិនបើអាចលៃលកទុកទីកន្លែងបន្តិច ឬមានហាងដែលមានបញ្ជីម្ហូបនំបញ្ចុកខ្មែរ វា គឺជាការលើកស្ទួយអាហារប្រពៃណី និងកសាងយីហោខ្មែរឲ្យបរទេសបានស្គាល់ ។
មតិ និងគោលគំនិតនេះត្រូវបានអ្នកលេងបណ្តាញសង្គម បានកំពុងតែផ្សព្វផ្សាយ និងចែករំលែកជាបន្តបន្ទាប់ នៅក្នុងរយៈពេលប៉ុន្មានថ្ងៃចុងក្រោយនេះ មុនពេលអាកាសយានដ្ឋានអន្តរជាតិតេជោ ដែលកសាងតម្លៃ១,៥ពាន់លានដុល្លារបើកដំណើរការ ។
អ្នកលេងបណ្តាញសង្គមម្នាក់ដែលមានគណនី សូរីដា បានលើកឡើងថា នំបញ្ចុកខ្មែរគួរតែមានលក់នៅព្រលានយន្តហោះថ្មី ដោយបង្ហាញនូវលក្ខណៈពិសេសរបស់ខ្មែរឱ្យបានច្រើនជាងហ្វឺរ តុមយ៉ាំ មីកូរ៉េ ចិន បារាំង អ៊ីតាលី… ជាដើម ។
ដោយឡែក អ្នកលេងហ្វេសបុកម្នាក់ទៀតឈ្មោះ សាមឺឌី ក៏បានបន្ថែមថា ពិតមែនហើយ គួរមានរៀបចំលក់បែបវិជ្ជាជីវៈពិតប្រាកដ មានឯកសណ្ឋាន រៀបចំលក់ក្នុងព្រលានតាមបែបបទវប្បធម៍ តំណាងខ្មែរ ។
បន្ទាប់មកក៏មានគណនីមួយទៀត ដែលមានឈ្មោះថា ពិសី បានបន្ថែមថា ក្រៅពីនំបញ្ចុកក៏គួរមានហាងមួយមានលក់ម្ហូបខ្មែរសុទ្ធ បាយសាច់ជ្រូក បបរត្រី នំបញ្ចុក លតឆា ជាដើម ។
អាកាសយានដ្ឋានអន្តរជាតិតេជោ បានបើកដំណើរការហើយ ក្រោយពេលចំណាយពេលសាងសង់អស់១,៥ពាន់លានដុល្លារ នៅលើផ្ទៃដីសរុប២.៦០០ ហិកតា ។
តាមផែនការ អាកាសយានដ្ឋានអន្តរជាតិតេជោ ត្រូវបានសាងឡើងជាបីដំណាក់កាល ដោយដំណាក់កាលទី១ មានផ្លូវរត់ចម្ងាយ៤គីឡូម៉ែត្រនឹងមានសមត្ថភាពទទួលអ្នកដំណើរជាង១៥លាននាក់ក្នុងមួយឆ្នាំ ។
ក្នុងដំណាក់កាលទីពីរ ការបន្ថែមផ្លូវរត់ពីរបន្ថែមទៀតនឹងបង្កើនសមត្ថភាពអ្នកដំណើរដល់៣០លាននាក់នៅឆ្នាំ២០៣០ ខណៈដំណាក់កាលទីបី អាកាសយានដ្ឋាននេះនឹងពង្រីកបន្ថែមទៀតជាមួយនឹងការដាក់ឱ្យប្រើប្រាស់ផ្លូវរត់ទីបី ដែលអាចទទួលអ្នកដំណើរបានរហូតដល់៤៥លាននាក់នៅឆ្នាំ២០៥០ ៕
ចែករំលែកព័តមាននេះ