រាជធានីភ្នំពេញ ៖ រឿងរ៉ាវក្តៅគគុកមួយដែលកំពុងត្រូវបានមហាជនអ្នកប្រើប្រាស់បណ្តាញសង្គមចាប់អារម្មណ៍ខ្លាំងបំផុតនោះ គឺករណីគ្រោះថ្នាក់ចរាចរណ៍មួយនៅចំណុចក្រោមស្ពានជ្រោយចង្វា ដែលបណ្តាលឱ្យមានអ្នកស្លាប់ម្នាក់ រហូតសមត្ថកិច្ចបានឃាត់ខ្លួនតារាសម្តែងមួយរូបដែលជាអ្នកបើកបរម៉ូតូម៉ាកPCX និងចុងក្រោយសម្រេចបញ្ជូនសំណុំរឿងទៅអយ្យការអមសាលាដំបូងរាជធានីភ្នំពេញ ដើម្បីចាត់ការតាមនីតិវិធី ។
ការសម្រេចរបស់សមត្ថកិច្ចក្នុងការបញ្ជូនសំណុំរឿងគ្រោះថ្នាក់ចរាចរណ៍ដែលបណ្តាលឱ្យមានមនុស្សស្លាប់ទៅអយ្យការអមសាលាដំបូងរាជធានីភ្នំពេញ ដើម្បីចាត់ការតាមនីតិវិធីបន្តនោះទទួលបានទាំងការរិះគន់ដូចទឹកបាក់ទំនប់ ស្របពេលមានមតិខ្លះលើកឡើងការឃាត់ខ្លួន និងបញ្ជូនអ្នកបើកបរម៉ូតូ PCX ពាក់ព័ន្ធគ្រោះថ្នាក់ចរាចរណ៍ក្រោមស្ពានជ្រោយចង្វារបណ្តាលឱ្យមានមនុស្សស្លាប់ទៅតុលាការ គឺធ្វើត្រឹមត្រូវតាមនីតិវិធីហើយ ព្រោះសមត្ថកិច្ចប៉ូលិសពុំំមានសិទ្ធិដោះលែងជនសង្ស័យ ឬនរណាមា្នក់ពាក់ព័ន្ធសំណុំរឿងណាមួយនោះទេ។
ងាកមកបងប្អូនមហាជន ដែលជាអ្នកប្រើប្រាស់បណ្តាញសង្គមវិញ បានរិះគន់ខ្លាំងៗថា ជុំវិញសមត្ថកិច្ចឃាត់ខ្លួន និងបញ្ជួនអ្នកបើកបរម៉ូតូ PCX ដែលបានជួបគ្រោះថ្នាក់ចរាចរណ៍ បណ្ដាលឲ្យបុរសម្នាក់ស្លាប់នៅចំណុចក្រោមស្ពានជ្រោយចង្វារបញ្ជូនទៅកាន់តុលាការ «ជារឿងអយុត្តិធម៌ណាស់» ព្រោះគ្រោះថ្នាក់នេះ បណ្ដាលមកពីអ្នកបើកបរម៉ូតូ Honda C125 ពណ៌ខ្មៅ ពាក់ផ្លាកលេខ ភ្នំពេញ 1KO-1318 បើកបរក្នុងល្បឿនលឿន មកបុកជាមួយម៉ូតូ PCX និងបណ្ដាលឲ្យមានគ្រោះថ្នាក់ស្លាប់ខ្លួនឯង។ ចំណែកបងប្អូនអ្នកប្រើប្រាស់បណ្តាញសង្គមខ្លះទៀតបានពោលថា «ក្នុងលោកយើងនេះមានរឿងអយុត្តិធម៌ម្លេះបើកបរម៉ូតូលឿនខ្លួនឯងហើយមកបុកគេទៀតហើយស្លាប់ខ្លួនឯងសោះ ហើយគ្នាមិនដឹងអីបែរមកជាប់ទោសទៅវិញ » ជាដើម។
ទន្ទឹមនឹងនោះផងដែរ អ្នកប្រើប្រាស់បណ្តាញសង្គមខ្លះ ក៏កំពុងទាមទារឱ្យសមត្ថកិច្ច ឬតុលាការដោះលែងអ្នកបើកបរម៉ូតូ PCX វិញ។ ក៏ប៉ុន្តែ បើតាមនីតិវិធីនៃការអនុវត្តច្បាប់ គឺប៉ូលិស ឬនគរបាលយុត្តិធម៌ ពុំមានសិទ្ធិក្នុងការដោះលែងជនសង្ស័យដែលជាប់ពាក់ព័ន្ធនឹងបទល្មើសនោះទេ មិនថាបទល្មើសព្រហ្មទណ្ឌ មជ្ឈិម ឬលហុឡើយ។
យ៉ាងណាមិញ នៅបណ្តាញសង្គមហ្វេសប៊ុក ក៏មានបងប្អូនខ្លះបានចូលរួមយោបល់ថា ការឃាត់ខ្លួនបញ្ជូនទៅកាន់តុលាការរបស់សមត្ថកិច្ចនគរបាលចរាចរណ៍បានអនុវត្តន៍ត្រឹមត្រូវតាមច្បាប់ហើយ បើទោះបីជាអ្នកស្លាប់ (ជនរងគ្រោះ) បើកបរលើសល្បឿនកំណត់ និងមិនបានពាក់មួកសុវត្ថិភាពក្តី តែគាត់នៅលើផ្លូវត្រង់ ខណៈអ្នកបើកបរម្នាក់ទៀត គឺបើកបរលើផ្លូវចរាចរណ៍ផ្លូវអក្សរ T រួចបត់ទៅចូលផ្លូវខាងគេ ។ អ្នកប្រើប្រាស់បណ្តាញសង្គមម្នាក់បាននិយាយថា «បើខុសផ្លូវចរាចរណ៍ ត្រូវគិតឡើងវិញ ចឹងជាមេរៀនសម្រាប់អ្នកជិះបញ្ច្រាស កុំគិតថា មិនអីតែពេលអីគឺបែបនេះ» ។
សូមបញ្ជាក់ផងដែរថា បើយោងតាមសេចក្តីបំភ្លឺរបស់ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញបានបញ្ជាក់ថា កាលពីថ្ងៃទី០៥ ខែកញ្ញា ឆ្នាំ២០២៥ វេលាម៉ោង២៣ និង៣៩នាទីយប់ត្រង់ចំណុចក្រោមស្ពានជ្រោយចង្វារ ផ្លូវទន្លេសាប ប្រសព្វផ្លូវលំ ស្ថិតក្នុងភូមិ៣ សង្កាត់ជ្រោយចង្វារ ខណ្ឌជ្រោយចង្វារមានករណីគ្រោះថ្នាក់ចរាចរណ៍រវាងម៉ូតូHonda PCX ពណ៌ប្រផះ ផ្លាកលេខភ្នំពេញ1IO-4137 ជាមួយម៉ូតូ Honda C125 ពណ៌ខ្មៅ ពាក់ផ្លាកលេខភ្នំពេញ 1KO-1318 បណ្តាលឲ្យអ្នកបើកម៉ូតូ Honda C125 ស្លាប់នៅកន្លែងកើតហេតុ ។
ជុំវិញមូលហេតុគ្រោះថ្នាក់ចរាចរណ៍នេះ គឺបើតាមអធិការដ្ឋាននគរបាលខណ្ឌជ្រោយចង្វារ បានសន្និដ្ឋានថា អ្នកបើកម៉ូតូHonda PCX បើកចេញពីផ្លូវបាត់សិទ្ធិ (ផ្លូវអក្សT) ខណៈអ្នកបើកម៉ូតូ Honda C125 (ជនរងគ្រោះបាត់បង់ជីវិត) បើកបរល្បឿនលឿនខ្វះការប្រុងប្រយ័ត្ន ។
ប្រភពពីសមត្ថកិច្ចដដែលបានបន្តថា បន្ទាប់ពីកើតមានគ្រោះថ្នាក់ លោក ស៊ិន រក្សា ព្រះរាជអាជ្ញារងប្រចាំខណ្ឌជ្រោយចង្វារឱ្យឃាត់អ្នកបើកម៉ូតូPCX ឈ្មោះ នាង សុភ័ក្ត្របញ្ញា នៅថ្ងៃទី៦ ខែកញ្ញា ឆ្នាំ២០២៥ វេលាម៉ោង០៨ និង០០នាទី ។ បន្ទាប់មក កម្លាំងជំនាញរបស់ការិយាល័យនគរបាលបាលចរាចរណ៍ផ្លូវគោកបញ្ជូនសំណុំរឿងវត្ថុតាង និងអ្នកបើកម៉ូតូម៉ាកHonda PCX ឈ្មោះ នាង សុភ័ក្ត្របញ្ញា ភេទប្រុស អាយុ៣០ឆ្នាំ ទៅអយ្យការអមសាលាដំបូងរាជធានីភ្នំពេញ ថ្ងៃទី០៧ ខែកញ្ញា ឆ្នាំ២០២៥ វេលាម៉ោង ១៤ និង៣៣នាទីដើម្បីចាត់ការតាមនីតិវិធី ។
តាមក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ ក៏បានបញ្ជាក់ថា ពាក់ព័ន្ធករណីគ្រោះថ្នាក់ចរាចរណ៍ ដែលបណ្តាលឱ្យមានអ្នកស្លាប់ សមត្ថកិច្ចត្រូវបញ្ជូនសំណុំរឿងទៅអយ្យការអមសាលាដំបូងរាជធានីភ្នំពេញ ដើម្បីចាត់ការតាមនីតិវិធី ។
បើនិយាយដល់ចំណុច «ការឃាត់ខ្លួន» តាមច្បាប់ គឺមន្ត្រីនគរបាលយុត្តិធម៌អាចធ្វើការឃាត់ខ្លួនក្នុងករណីបទល្មើសជាក់ស្តែង និងការស៊ើបអង្កេតបឋម ករណីនេះ គឺជាវិធានបង្ខិតបង្ខំដែលច្បាប់បានកំណត់ជាធរមាន ។ ហេតុដូច្នេះ ដើម្បីឆ្លើយតបទៅនឹងភាពចាំបាច់នៃការស៊ើបអង្កេត មន្ត្រីនគរបាលយុត្តិធម៌ជាអាជ្ញាធរមានអំណាចក្នុងការសម្រេចឃាត់ខ្លួនបុគ្គលណាម្នាក់ ឬច្រើន ដែលត្រូវបានសង្ស័យថា បានចូលរួមប្រព្រឹត្តបទល្មើស ហើយក៏អាចឃាត់ខ្លួនរាល់បុគ្គលដទៃទៀត ដែលអាចផ្ដល់ព័ត៌មានស្ដីអំពីរឿងហេតុបានផងដែរ ប្រសិនបើបុគ្គលទាំងនោះប្រកែកមិនព្រមផ្ដល់ព័ត៌មាន ដោយមានការយល់ព្រមជាលាយលក្ខណ៍អក្សរពីព្រះរាជអាជ្ញា ទើបអាចធ្វើការឃាត់ខ្លួនបាន ។
ការឃាត់ខ្លួនត្រូវបានធ្វើឡើង ដើម្បីទទួលបានព័ត៌មានពាក់ព័ន្ធនឹងបទល្មើសពីបុគ្គលដែលត្រូវបានមន្ត្រីនគរបាលយុត្តិធម៌ឃាត់ខ្លួននោះ ។ ក្នុងករណីបទឧក្រិដ្ឋ ឬបទមជ្ឃឹមជាក់
ស្តែង គ្រប់បុគ្គលទាំងអស់មានសិទ្ធិចាប់ខ្លួនជនល្មើស ហើយប្រគល់ជូនមន្ត្រីនគរបាលយុត្តិធម៌ដែលនៅជិតបំផុត ដើម្បីធ្វើការឃាត់ខ្លួន ដោយមានកំណត់ហេតុឃាត់ខ្លួន និងប្រាប់ជនល្មើសឲ្យបានដឹងពីមូលហេតុនៃការឃាត់ខ្លួន ។ ផ្ទុយទៅវិញ ប្រសិនបើជនទាំងនោះ ធ្វើការចាប់ខ្លួនជនល្មើស ដោយមិនបានបញ្ជូនជនល្មើសទៅមន្ត្រីនគរបាលយុត្តិធម៌ដើម្បីធ្វើការឃាត់ខ្លួន ឬប្រើអំពើហិង្សាទៅលើជនល្មើស នោះជនបង្កនិងត្រូវទទួលទោសព្រហ្មទណ្ឌតាមកម្រិតនៃអំពើរបស់ខ្លួន ។
យោងតាមមាត្រា៩៦នៃក្រមនីតិវិធីព្រហ្មទណ្ឌ នៅពេលដែលមានការឃាត់ខ្លួនបុគ្គលណាម្នាក់ នគរបាលយុត្តិធម៌ត្រូវរាយការណ៍ភ្លាមជូនទៅព្រះរាជអាជ្ញា ព្រមទាំងត្រូវបញ្ជូនគ្រប់ភស្តុតាងទាំងអស់ដែលនាំឲ្យមានការឃាត់ខ្លួននោះផងដែរ។
យ៉ាងណាមិញ សមត្ថកិច្ចប៉ូលិសយុត្តិធម៌ពុំមានសិទ្ធិក្នុងការដោះលែងជនសង្ស័យពាក់ព័ន្ធនឹងបទល្មើសណាមួយនោះទេ ។ ដូច្នេះ ការបញ្ជូនជនសង្ស័យ និងសំណុំរឿងទៅតុលាការការ ដើម្បីបន្តនីតិវិធីច្បាប់ជារឿងត្រឹមត្រូវ ។
បើសិនជាតុលាការរកមិនឃើញមានកំហុសនោះ តុលាការលោកនឹងមានសិទ្ធិក្នុងការសម្រេច និងអនុវត្តតាមច្បាប់ និងភាពចាំបាច់ជាក់ស្តែង បើរកមិនឃើញកំហុសប្រាកដណាស់ ការដោះលែងពិតជាមានដោយផ្អែកលើក្របខណ្ឌច្បាប់ជាធរមាន ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ