ខេត្តស្ទឹងត្រែង ៖ នគរបាលព្រហ្មទណ្ឌកម្រិតធ្ងន់នៃស្នងការនគរបាលខេត្តបានឃាត់ ខ្លួនជនសង្ស័យម្នាក់ និងកសាងសំណុំរឿងពីបទប៉ុនប៉ងមនុស្សឃាត បញ្ជូនខ្លួនទៅកាន់សាលាដំបូងខេត្ត កាលពីព្រឹកថ្ងៃទី១៣ កក្កដា កន្លងមកនេះ ។ មន្ត្រីនគរបាលព្រហ្មទណ្ឌកម្រិតធ្ងន់បានឱ្យដឹងថា ជនសង្ស័យនោះឈ្មោះយឹម វ ភេទប្រុស
ខេត្តស្ទឹងត្រែង ៖ នគរបាលព្រហ្មទណ្ឌកម្រិតធ្ងន់នៃស្នងការនគរបាលខេត្តបានឃាត់ខ្លួនជនសង្ស័យម្នាក់ និងកសាងសំណុំរឿងពីបទប៉ុនប៉ងមនុស្សឃាត បញ្ជូនខ្លួនទៅកាន់សាលាដំបូងខេត្ត កាលពីព្រឹកថ្ងៃទី១៣ កក្កដា កន្លងមកនេះ ។ មន្ត្រីនគរបាលព្រហ្មទណ្ឌកម្រិតធ្ងន់បានឱ្យដឹងថា ជនសង្ស័យនោះឈ្មោះយឹម វ ភេទប្រុស អាយុ២៧ឆ្នាំ ជាកម្មករចំការកៅស៊ូ នៅភ្នំក្រហម ភូមិស្រែក្រសាំង ឃុំស្រែក្រសាំង ស្រុកសៀមបូក។
ជុំវិញការចាប់ខ្លួនជនសង្ស័យបញ្ជូនមកតុលាការនេះដោយសារតែទទួលពាក្យបណ្តឹងពីក្រុមគ្រួសាររបស់ជនរងគ្រោះឈ្មោះខាត់ ខុម អាយុ៤៥ឆ្នាំ ជាកសិករ រស់នៅចំណុចភ្នំក្រហម ភូមិស្រែក្រសាំង ឃុំស្រែក្រសាំង ស្រុកសៀមបូក បានចោទទៅលើជនសង្ស័យ ពីបទប៉ុនប៉ងមនុស្សឃាត ទើបសមត្ថកិច្ចជំនាញឃាត់ខ្លួន នាំមកស្នងការនគរបាលខេត្ត កាលពីថ្ងៃទី១១ កក្កដា ឆ្នាំ២០១១ កន្លងទៅនេះ ដើម្បីសាកសួរ និងបើកការស្រាវជ្រាវ ហើយកសាងសំណុំរឿងបញ្ជូនទៅតុលាការចាត់ការបន្ត។
គួររំលឹកថា នៅវេលាម៉ោង៨យប់ថ្ងៃទី១០ កក្កដា ឆ្នាំ២០១១ ឈ្មោះខាត់ ខុម ត្រូវបានកម្មករចំការកៅស៊ូ២នាក់ព្រួតគ្នាចាក់នឹងកាំបិតចុងស្រួចមុតក្រោមចុងដង្ហើមខាងឆ្វេង បណ្តាលឱ្យដេកដួលទៅលើដី រងរបួសជាទម្ងន់ និងត្រូវបានបញ្ជូនមកសង្គ្រោះបន្ទាន់នៅមន្ទីរពេទ្យ។
ជនរងគ្រោះបាននិយាយថា នៅយប់កើតហេតុនោះខ្លួនបានដើរចេញពីផ្ទះបំណងទៅទិញម្ហូបដែលមានចម្ងាយផ្លូវពីផ្ទះប្រមាណជា១០០ម៉ែត្រ ។ លុះមកដល់ចំណុចកើតហេតុខាងលើ ជាចំណុចជិតដល់ផ្ទះលក់ម្ហូបទៅហើយ គាត់បានឃើញយុវជនពីរនាក់កំពុងឈ្លោះគ្នា ឃើញដូច្នេះគាត់ក៏បានចូលទៅឃាត់កុំឱ្យឈ្លោះគ្នា ខណៈចូលទៅដល់ក៏ស្រាប់តែយុវជនទាំងពីរនាក់នោះ ស្ទុះមកចាក់គាត់ទាំងកម្រោលដោយគ្មានមូលហេតុ ធ្វើឱ្យគាត់ដួលសន្លប់បាត់ស្មារតី។ លុះពេលដឹងខ្លួនឡើង រូបគាត់ស្ថិតនៅក្នុងបន្ទប់សង្គ្រោះនៃមន្ទីរពេទ្យបង្អែកខេត្តទៅហើយ។
នៅចំពោះមុខសមត្ថកិច្ច ជនសង្ស័យបាននិយាយថា ដំបូង ខ្លួន និងជនរងគ្រោះមានទំនាស់ពាក្យសម្តីគ្នា ហើយក៏មានការប្រវាយប្រតប់បន្តិចបន្តួច ហើយមិត្តភក្តិរបស់ខ្លួនបានឃើញហេតុការណ៍នោះ ក៏រត់មកជួយរួចយកកាំបិតចុងស្រួចមកចាក់ជនរងគ្រោះតែម្តង។
តាមព័ត៌មានពីលោកដួង ស៊ីវុត្ថា នាយការិយាល័យព្រហ្មទណ្ឌកម្រិតធ្ងន់បានឱ្យដឹងថា យោងលើការស្រាវជ្រាវជំហានដំបូង ជនសង្ស័យ និងជនរងគ្រោះ មានទំនាស់ពាក្យសម្តីនិងមានការប្រវាយប្រតប់គ្នា បន្ទាប់មកជនម្នាក់ទៀតជាមិត្តភក្តិជនសង្ស័យបានមកជួយរហូតបង្ករបួសស្នាមធ្វើឱ្យជនរងគ្រោះរងរបួសជាទម្ងន់។ តែលោកមិនទាន់សន្និដ្ឋានថា នរណាជាអ្នកចាក់ជនរងគ្រោះនោះទេ គ្រាន់តែឃាត់ខ្លួនជនសង្ស័យបានម្នាក់ រៀបចំសំណុំរឿងបញ្ជូនទៅតុលាការ និងម្នាក់ទៀតដែលពាក់ព័ន្ធក្នុងករណីនេះបានរត់គេចខ្លួនបាត់ ហើយប៉ូលិសកំពុងតែស្វែងរកចាប់ខ្លួន ដើម្បីសួរនាំឱ្យដឹងការពិត។បច្ចុប្បន្នជនសង្ស័យដែលឃាត់ខ្លួនបានតុលាការបានឃុំខ្លួនជាបណ្តោះអាសន្ន និងបន្តស្រាវជ្រាវ និងវែកមុខជនដៃដល់ម្នាក់ទៀតយកមកផ្តន្ទាទោសតាមច្បាប់ ៕
ចែករំលែកព័តមាននេះ