ទីក្រុងប៉ារីស៖ ប្រទេសចំនួន២៦បានសន្យាធានាសន្តិសុខជូនអ៊ុយក្រែនក្រោយពេលចប់សង្គ្រាម។ ក្នុងនោះក៏មានផែនការបញ្ជូនកងកម្លាំងថែរក្សាសន្តិភាពជើងគោក ជើងទឹក និងជើងអាកាសទៅអ៊ុយក្រែនផងដែរ។ នេះបើយោងតាមការអះអាងរបស់ប្រធានាធិបតីបារាំង លោកម៉ាក្រុង ដែលទើបតែជួបគ្នាជាមួយលោកហ្សេឡិនស្គី។ ម៉ាក្រុងថ្លែងថារូបលោកផ្ទាល់ជាមួយមិត្តភក្ដិអឺរ៉ុបដទៃទៀត និងលោកហ្សេឡិនស្គីទើបតែសន្ទនាគ្នាជាមួយលោកត្រាំ។
លោកម៉ាក្រុងថាប៉ុន្មានថ្ងៃខាងមុខនេះ អាមេរិកនឹងសម្រេចទៅលើការចូលរួមកម្រិតណាមួយនៅក្នុងការធានាសន្តិសុខអ៊ុយក្រែន។ លោកត្រាំត្រូវអ្នកសារព័ត៌មានសាកសួរថាតើលោកនឹងនិយាយទូរស័ព្ទទៅលោកពូទីននៅពេលឆាប់ៗនេះទេ? លោកឆ្លើយតបថាលោកនឹងធ្វើរឿងនេះឆាប់ៗនេះ។ យើងនឹងមានការសន្ទនាគ្នាដ៏ល្អ។
ការរៀបចំកិច្ចជំនួបមេដឹកនាំ៣៥ប្រទេស (ភាគច្រើននៅអឺរ៉ុប) ដើម្បីពិភាក្សាអំពីការធានាសន្តិសុខ និងស្នើសុំឱ្យលោកត្រាំជួយជ្រោមជ្រែងនៅក្នុងរឿងនេះ។ អឺរ៉ុបយល់ថាការចូលរួមចំណែករបស់អាមេរិកពិតជាមានសារៈសំខាន់ណាស់ដើម្បីឱ្យការធានាសន្តិសុខមានប្រសិទ្ធភាព។ មូលហេតុនៃការបង្កើតកិច្ចព្រមព្រៀងធានាសន្តិសុខដើម្បីកុំឱ្យរុស្ស៊ីវាយប្រហារអ៊ុយក្រែនទៀតនាពេលអនាគត។
លោកម៉ាក្រុងថ្លែងថានៅសង្គ្រាមអ៊ុយក្រែនបិទបញ្ចប់ទៅវិញ ការធានាសន្តិសុខនឹងចាប់ផ្ដើមអនុវត្តភ្លាម។ ថ្នាក់ដឹកនាំនៅទ្វីបអឺរ៉ុបថ្លែងថាសន្តិភាពអាចនឹងស្ថិតនៅឆ្ងាយបន្តិចមែនសម្រាប់ពេលនេះ។ ប៉ុន្តែពួកគេចង់ត្រៀមខ្លួនទុកឱ្យហើយ។ នៅពេលថ្ងៃនោះមកដល់មិនពិបាកស្ទុះស្ទា។
មុនដំបូង លោកម៉ាក្រុងថ្លែងថាប្រទេសចំនួន២៦សន្យាផ្ដល់ការធានាសន្តិសុខអ៊ុយក្រែន។ ប៉ុន្តែក្រោយមក លោកថាប្រទេសមួយចំនួនទៀតក៏សន្យាធានាសន្តិសុខផងដែរ។ ប៉ុន្តែពួកគេស្ថិតនៅខាងក្រោយវាំងនន។ ពួកគេអាចជួយហ្វឹកហ្វឺន និងផ្ដល់គ្រឿងបរិក្ខារផ្សេងៗ។ លោកមិនបានបញ្ជាក់ថាតើត្រូវបញ្ជូនកងទ័ពប៉ុន្មាននាក់ទៅឈរជើងនៅអ៊ុយក្រែននោះទេ៕
ចែករំលែកព័តមាននេះ