ទីក្រុងប៉េកាំង៖ មេដឹកនាំកូរ៉េខាងជើង លោកគីមជុងអ៊ុន ថ្លែងប្រាប់សមភាគីចិន (លោកស៊ីជីនពីង) ថាប្រទេសរបស់លោកនឹងបន្តគាំទ្រប្រទេសចិនជានិច្ចនៅក្នុងការការពារអធិបតេយ្យភាពជាតិ បូរណភាពទឹកដី និងការអភិវឌ្ឍ។ នេះបើតាមការផ្សាយរបស់ទូរទស្សន៍កូរ៉េខាងជើងខេស៊ីអឹនអេ (KCNA)។…
ទីក្រុងប៉េកាំង៖ មេដឹកនាំកូរ៉េខាងជើង លោកគីមជុងអ៊ុន ថ្លែងប្រាប់សមភាគីចិន (លោកស៊ីជីនពីង) ថាប្រទេសរបស់លោកនឹងបន្តគាំទ្រប្រទេសចិនជានិច្ចនៅក្នុងការការពារអធិបតេយ្យភាពជាតិ បូរណភាពទឹកដី និងការអភិវឌ្ឍ។ នេះបើតាមការផ្សាយរបស់ទូរទស្សន៍កូរ៉េខាងជើងខេស៊ីអឹនអេ (KCNA)។ លោកគីមថ្លែងថាទោះបីស្ថានការណ៍ពិភពលោកប្រែប្រួលយ៉ាងណាក៏ចំណងមិត្តភាពរវាងប្រទេសយើងទាំង២មិនអាចប្រែប្រួលជាដាច់ខាត។ លោកថ្លែងដូច្នេះនៅពេលជួបគ្នាទ្វេភាគីជាមួយលោកស៊ីជីនពីងនៅទីក្រុងប៉េកាំងកាលពីថ្ងៃព្រហស្បតិ៍។
ជាកិច្ចឆ្លើយតប លោកស៊ីជីនពីងថ្លែងប្រាប់លោកគីមជុងអ៊ុនថាចិន និងកូរ៉េខាងជើងជាអ្នកជិតខាងដ៏ល្អនឹងគ្នា, ជាមិត្តសម្លាញ់នឹងគ្នា និងជាមិត្តរួមអាវុធដ៏ល្អនឹងគ្នាដែលមានជោគវាសនា-អនាគតតែមួយ។ ថ្នាក់ដឹកនាំទាំង២បានពិភាក្សាគ្នាអំពីការពង្រឹងកិច្ចសហប្រតិបត្តិការជាយុទ្ធសាស្ត្រ និងការការពារផលប្រយោជន៍រួមនៅក្នុងបញ្ហាពិភពលោក និងបញ្ហានៅក្នុងតំបន់។ ប្រទេសទាំង២ឯកភាពគ្នាថានឹងបង្កើនការផ្លាស់ប្ដូរទស្សនកិច្ចគ្នាទៅវិញទៅមករវាងមន្ត្រីជាន់ខ្ពស់នៃប្រទេសទាំង២។
ទស្សនកិច្ចរបស់លោកគីមទៅប្រទេសចិនលើកនេះ បើតាមការផ្សាយរបស់ខេស៊ីអឹនអេ គឺជាព្រឹត្តិការណ៍ប្រវត្តិសាស្ត្រដែលជួយពង្រឹងបន្ថែមទៀតនូវការជឿទុកចិត្តគ្នាផ្នែកនយោបាយ និងក៏ពង្រឹងផងដែរនូវកិច្ចសហប្រតិបត្តិការជាយុទ្ធសាស្ត្ររវាងប្រទេសទាំង២។ កាលពីថ្ងៃព្រហស្បតិ៍ លោកពូទីនបានផ្ញើសារជូនពរនៅថ្ងៃរំលឹកខួបនៃការបង្កើតសាធារណរដ្ឋកូរ៉េ។
នៅក្នុងលិខិតនោះ លោកពូទីនកោតសរសើរមិនដាច់ពីមាត់ចំពោះទឹកចិត្តអង់អាចក្លាហានរបស់កងទ័ពកូរ៉េខាងជើងដែលបញ្ជូនទៅតំបន់ខឺសដើម្បីជួយរុស្ស៊ី។ លោកពូទីនចាត់ទុកថានោះជានិមិត្តរូបដ៏ថ្លៃថ្លានៃចំណងមិត្តភាព និងការជួយគ្នាទៅវិញទៅមករវាងរុស្ស៊ី និងកូរ៉េខាងជើង។ លោកពូទីនមានទំនុកចិត្តថាប្រទេសទាំង២នឹងបន្តសហការគ្នាដើម្បីពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយ។
កូរ៉េខាងជើងជួយជ្រោមជ្រែងរុស្ស៊ីសម្បើមណាស់នៅក្នុងសង្គ្រាមអ៊ុយក្រែន។ កូរ៉េខាងជើងបញ្ជូនកងទ័ព គ្រាប់កាំភ្លើងធំ និងមីស៊ីលទៅ រុស្ស៊ី។ នេះបើតាមរបាយការណ៍របស់ក្រុមស៊ើបការណ៍សម្ងាត់បស្ចិមប្រទេស និងកូរ៉េខាងត្បូង។ កាលពីពេលជួបគ្នាទ្វេភាគីជាមួយលោកពូទីននៅប៉េកាំង លោកគីមថ្លែងថាប្រទេសរបស់លោកគាំទ្រកងទ័ពរុស្ស៊ីយ៉ាងពេញទំហឹង និងចាត់ទុកថានេះជាការចេះជួយគ្នានៅក្នុងគ្រាមានអាសន្ន។ នេះបើតាមការដកស្រង់ប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ