ប្រទេសជប៉ុន ៖ ប្រទេសជប៉ុនកាលពីថ្ងៃទី១ ខែកញ្ញា ឆ្នាំ២០២៥ បានបន្ធូរបន្ថយច្បាប់ប្រើប្រាស់កាំភ្លើង ដែលនឹងផ្តល់ភាពងាយស្រួលសម្រាប់អ្នកប្រមាញ់សត្វព្រៃក្នុងការប្រើប្រាស់កាំភ្លើងក្នុងតំបន់ដែលទទួលបានការអនុញ្ញាត ខណៈការសម្រេចនេះ កើតឡើងបន្ទាប់ពីឃើញការកើនឡើងករណីវាយប្រហារដោយសត្វខ្លាឃ្មុំ។ នេះបើតាមប្រភពពីទីភ្នាក់ងារសារព័ត៌មាន…
ប្រទេសជប៉ុន ៖ ប្រទេសជប៉ុនកាលពីថ្ងៃទី១ ខែកញ្ញា ឆ្នាំ២០២៥ បានបន្ធូរបន្ថយច្បាប់ប្រើប្រាស់កាំភ្លើង ដែលនឹងផ្តល់ភាពងាយស្រួលសម្រាប់អ្នកប្រមាញ់សត្វព្រៃក្នុងការប្រើប្រាស់កាំភ្លើងក្នុងតំបន់ដែលទទួលបានការអនុញ្ញាត ខណៈការសម្រេចនេះ កើតឡើងបន្ទាប់ពីឃើញការកើនឡើងករណីវាយប្រហារដោយសត្វខ្លាឃ្មុំ។ នេះបើតាមប្រភពពីទីភ្នាក់ងារសារព័ត៌មាន AFP បានចេញផ្សាយ។
ខ្លាឃ្មុំព្រៃកាន់តែច្រើនឡើងត្រូវបានប្រទះឃើញនៅតំបន់លំនៅដ្ឋានក្នុងប្រទេសជប៉ុន ដោយសារកត្តាមួយចំនួនរួមទាំង ការថយចុះចំនួនប្រជាជន និងការប្រែប្រួលអាកាសធាតុជាដើម។ ចាប់តាំងពីខែមេសា ឆ្នាំ ២០២៥ មនុស្ស៤នាក់ ត្រូវបានសម្លាប់ដោយខ្លាឃ្មុំនៅក្នុងប្រទេសជប៉ុន និងកាលពីថ្មីៗនេះលើអ្នកឡើងភ្នំម្នាក់ នៅកោះហុកកៃដូ កាលពីខែសីហា និងរាប់សិបនាក់ផ្សេងទៀតរងរបួស។
កាលពីខែកក្កដា ស្ត្រីម្នាក់បានសន្លប់បាត់បង់ស្មារតី បន្ទាប់ពីត្រូវបានខ្លាឃ្មុំវាយប្រហារនៅខាងក្រៅទីតាំងសម្រាប់ជនពិការមួយកន្លែង នៅឯជាយក្រុងគីតាគីតា (Kitaakita) ភាគខាងជើង ប្រទេសជប៉ុន។ នៅខែដដែលនោះ កីឡាករវាយកូនហ្គោលជាច្រើនាក់នៅក្នុងការប្រកួតមួយបាននាំគ្នារត់ចេញពីទីលានប្រកួត ដោយសារការអុកឡុកពីខ្លាឃ្មុំ។ កាលពីខែមិថុនា ខ្លាឃ្មុំ១ក្បាលត្រូវបានឃើញដើរតាមផ្លូវរត់ហោះហើរសម្រាប់យន្តហោះ (Runway) នៅឯអាកាសយានដ្ឋានក្នុងតំបន់ផងដែរ។
ប្រទេសជប៉ុនត្រូវបានទទួលស្គាល់ថាមានច្បាប់គ្រប់គ្រងអាវុធដ៏តឹងរ៉ឹងបំផុតមួយ ជាមួយការប្រើប្រាស់កាំភ្លើងសម្រាប់ការបាញ់ប្រហារត្រូវបានអនុញ្ញាត បន្ទាប់ពីមានការយល់ព្រមពីប៉ូលិសតែប៉ុណ្ណោះ។ ប៉ុន្តែទោះយ៉ាងណា ចាប់ពីថ្ងៃទី១ ខែកញ្ញា តទៅ មន្ត្រីក្រុង និងទីប្រជុំជនអាចអនុញ្ញាតឱ្យអ្នកប្រមាញ់សត្វព្រៃអាចប្រើប្រាស់កាំភ្លើងពួកគេក្នុងករណីសង្គ្រោះបន្ទាន់ ដើម្បីជួយធានាដល់សុវត្ថិភាពអ្នកស្រុក។
អ្នកជំនាញបានលើកឡើងថា ចំនួនប្រជាជននៅតាមជនបទ និងការប្រែប្រួលអាកាសធាតុដែលបានប៉ះពាល់ដល់ការស្វែងខ្លាឃ្មុំចំណី និងពេលវេលាសម្ងំលាក់ខ្លួនក្នុងព្រៃនោះ កំពុងជំរុញឱ្យខ្លាឃ្មុំកាន់តែច្រើនភៀសខ្លួនចូលទៅជិតទីក្រុង និងទីប្រជុំជន។ លើសពីនេះទៀត ការកើនឡើងកសិដ្ឋានដែលគេបោះបង់ចោលដោយសារតែការថយចុះចំនួនប្រជាជនរបស់ប្រទេសជប៉ុន ក៏ជាកត្តានាំឱ្យខ្លាឃ្មុំមកសម្ងំលាក់ខ្លួននៅទីនោះផងដែរ។ កត្តាមួយទៀតក៏ត្រូវបានមកមើលឃើញផងដែរ ដែលបង្កឡើងដោយការកើនឡើងប្រជាជនវ័យចំណាស់ បណ្តាលឱ្យមានការថយចុះចំនួនអ្នកប្រមាញ់សត្វព្រៃ។
យ៉ាងណាមិញ ការឃើញវត្តមានខ្លាឃ្មុំ ក៏ថែមទាំងត្រូវបានរាយការណ៍នៅក្នុងតំបន់នៃទីក្រុងតូក្យូក្នុងប៉ុន្មានឆ្នាំថ្មីៗនេះ។ តួយ៉ាង កាលពីខែមុន បុរសម្នាក់ត្រូវបានរាយការណ៍ថា ត្រូវបានខ្លាឃ្មុំវាយប្រហារ ខណៈពេលដែលកំពុងនេសាទនៅទន្លេស្ថិតនៅតំបន់ភ្នំមួយនៃដែនសមត្ថកិច្ចនៃអាជ្ញាធរទីក្រុងតូក្យូ។
បើយោងតាមការផ្សាយរបស់ទូរទស្សន៍ជប៉ុន NHK បានឱ្យដឹងថា យ៉ាងហោចណាស់មានការរកឃើញខ្លាឃ្មុំចំនួន ៣៩ក្បាល លេចវត្តមាននៅខាងក្នុង ឬជិតសាលាបឋមសិក្សា អនុវិទ្យាល័យ និងវិទ្យាល័យនៅក្នុងប្រទេសជប៉ុនក្នុងឆ្នាំនេះ៕
ចែករំលែកព័តមាននេះ