ខេត្តបាត់ដំបង ៖ គិតត្រឹមម៉ោង១១ និង១៥នាទីថ្ងៃត្រង់ថ្ងៃទី០២ កញ្ញា នេះ កម្ពស់ទឹកស្ទឹងសង្កែនៅចំកណ្ដាលក្រុងបាត់ដំបងនៅទ្រឹងហ្នឹងដដែល កម្ពស់ត្រឹម១៣,៨០ម៉ែត្រ ដែលអាចជាសញ្ញាអាសន្នឲ្យប្រជាពលរដ្ឋមានការប្រុងប្រយ័ត្ន ។…
ខេត្តបាត់ដំបង ៖ គិតត្រឹមម៉ោង១១ និង១៥នាទីថ្ងៃត្រង់ថ្ងៃទី០២ កញ្ញា នេះ កម្ពស់ទឹកស្ទឹងសង្កែនៅចំកណ្ដាលក្រុងបាត់ដំបងនៅទ្រឹងហ្នឹងដដែល កម្ពស់ត្រឹម១៣,៨០ម៉ែត្រ ដែលអាចជាសញ្ញាអាសន្នឲ្យប្រជាពលរដ្ឋមានការប្រុងប្រយ័ត្ន ។ នេះបើតាមមន្ត្រីជំនាញបានបញ្ជាក់ប្រាប់កោះសន្តិភាពអំពីស្ថានភាពជំនន់ទឹកភ្លៀងដែលកំពុងហក់ឡើងនៅក្នុងស្ទឹងសង្កែនៅពេលនេះ ។
លោក ខៃ សុដា អនុប្រធានមន្ទីរធនធានទឹក និងឧតុនិយមខេត្ត ទទួលបន្ទុកក្ដាប់រួមបានថ្លែងប្រាប់កោះសន្តិភាពតាមទូរស័ព្ទដូច្នេះថា «ពេលនេះ កម្ពស់ទឹកស្ទឹងសង្កែ ស្ថិតកំរិត១៣,៨០ម៉ែត្រ ។ បើតាមការតាមដានជាប់ជាប្រចាំរបស់មន្ត្រីជំនាញនៅពាក់កណ្ដាលថ្ងៃត្រង់ថ្ងៃនេះ កំរិតទឹកស្ទឹងហាក់នៅទ្រឹងដដែល ។ ប៉ុន្តែវាអាចស្រកចុះ ចាប់ពីពេលរសៀលនេះទៅពីព្រោះកម្ពស់ទឹកនៅទំនប់សេកសកប៉ែកខាងលើ ហាក់ថយចុះច្រើនដែរហើយ»។
ប៉ុន្តែជាមួយនឹងការចាប់ផ្ដើមស្រកចុះសន្សឹមៗក្នុងពេលនេះ លោកអនុប្រធានមន្ទីរជំនាញ ក៏បានព្រមានផងដែរថា ទឹកស្ទឹងសង្កែនេះ ក៏អាចហក់ឡើងវិញទៀតដែរ ប្រសិនបើភ្លៀងនៅតែបន្តធ្លាក់នៅប៉ែកខាងលើនៃក្បាលស្ទឹង ។ ជាពិសេស នៅតំបន់ស្រុកសំឡូត ដែលជាប្រភពនៃជំនន់ទឹកភ្លៀងដែលនាំឲ្យជន់លិចក្រុងបាត់ដំបង និងតាមបណ្ដាស្រុកមួយចំនួន ដែលនៅអមតាមដងស្ទឹងសង្កែ ។
បើតាមការពិនិត្យជាក់ស្ដែងនាពេលនេះ គេឃើញទឹកស្ទឹងសង្កែហាក់មានសញ្ញាស្រកស្រុតយឺតបំផុត បើទោះជាទ្វារទឹកដ៏សំខាន់នៅ «ទំនប់សាលាតាអន» នៃស្រុកឯកភ្នំ (ប៉ែកខាងក្រោម) បានបើកទាំងអស់ក្ដី ។ កំណាត់ផ្លូវមួយចំនួននៅស្រុកឯកភ្នំ ត្រូវបានលិចជាអន្លើរៗ សាលារៀនមួយចំនួនក៏ត្រូវលិចលង់ រួមទាំងចម្ការដំណាំ និងលំនៅឋានរបស់ប្រជាពលរដ្ឋមួយចំនួនផង ។
សមត្ថកិច្ច និងអាជ្ញាធរ បានចុះត្រួតពិនិត្យ និងតាមដានជាប្រចាំអំពីការវិវឌ្ឍន៍នៃជំនន់ទឹកស្ទឹងនេះ ដើម្បីត្រៀមជួយអន្តរាគមន៍ជម្លៀសប្រជាពលរដ្ឋដែលប្រឈមនឹងគ្រោះទឹកជំនន់ ដែលឡើងចុះមិនទៀងទាត់នេះ ។
ពាក់ព័ន្ធនឹងស្ថានភាពជំនន់ទឹកស្ទឹងសង្កែនេះ លោក ខៃ សុដា ដែលបានតាមដានស្ថានភាពទឹកជាប្រចាំបានបញ្ជាក់ថា បើផ្អែកលើកម្ពស់ទឹកស្ទឹងក្នុងពេលនេះ វាអាចចាត់ទុកជាសញ្ញាឲ្យមានការប្រុងប្រយ័ត្នខ្ពស់ហើយ ។ លោកបានបន្ថែមថា ពេលនេះ កម្ពស់ទឹកស្ទឹងស្រកសន្សឹមៗ ហើយកម្ពស់ទឹកនៅប៉ែកខាងលើនៃទំនប់សេកសក ក៏ថយចុះដែរ ។ ប៉ុន្តែបើមានភ្លៀងធ្លាក់បន្ថែមទៀតនៅល្ងាចនេះ ឬថ្ងៃស្អែកទឹកស្ទឹងសង្កែនឹងហក់ឡើងវិញ ។
ពីព្រោះបើតាមមន្ត្រីបច្ចេកទេសបានតាមដានអាកាសធាតុនៅល្ងាចថ្ងៃនេះ (០២ ០៩ ២៥) និងថ្ងៃស្អែកនឹងមានភ្លៀងធ្លាក់បន្តទៀតនៅតំបន់ប៉ែកខាងលើ ជាពិសេស នៅក្នុងភូមិសាស្ត្រស្រុកសំឡូត ។ ដូច្នេះ សូមបងប្អូនប្រជាពលរដ្ឋ ដែលរស់នៅតាមដងស្ទឹងសង្កែ សូមមេត្តប្រុងប្រយ័ត្នឲ្យបានខ្ពស់បំផុត ចៀសវាងគ្រោះថ្នាក់កើតឡើងដោយយថាហេតុ ដោយសារគ្រោះទឹកជំនន់ដែលហូរហៀរចេញពីដងស្ទឹងសង្កែ ៕
ចែករំលែកព័តមាននេះ