ខេត្តកំពង់ចាម ៖ ស្របពេលដែលមេឃកំពុងតែភ្លៀងធ្លាក់ ភ្លើងបានឆាបឆេះពីកន្លែងផាត់មុខរបស់បុគ្គលិកខារ៉ាអូខេមួយកន្លែងនៅជាប់ផ្លូវជាតិលេខ៧ស្ថិតក្នុងភូមិបឹងស្នាយ សង្កាត់សំបួរមាស ក្រុងកំពង់ចាម។ នៅក្នុងហេតុការណ៍នេះ ធ្វើឲ្យស្រីៗនាំគ្នារត់ប្រសាចចេញមកក្រៅរកកន្លែងសុវត្ថិភាព ជាមួយនោះរថយន្តពន្លត់អគ្គិភ័យនៃស្នងការដ្ឋាននគរបាលខេត្ត អធិការនគរបាលក្រុងកំពង់ចាមចំនួន៥គ្រឿងក្នុងការជួយបាញ់ទឹកពន្លត់បង្កឲ្យមនុស្សរាប់រយនាក់ភ្ញាក់ផ្អើលឈរមើលព្រោងព្រាត ។
បើតាមសាក្សីម្នាក់បានប្រាប់ឲ្យដឹងថា ក្នុងពេលដែលនាងកំពុងស្នាក់នៅរោងទីតាំង(សាឡន)ស្រាប់តែត្រូវបានសន្តិសុខស្រែកប្រាប់បុគ្គលិកស្រីៗទាំងអស់ ហើយនាំគ្នាប្រញាប់ប្រញាល់ចេញមកក្រៅ ព្រោះភ្លើងបានឆាបឆេះត្រង់កន្លែងដែលរោងសន្តិសុខស្នាក់នៅនៅវេលាម៉ោងជាង៧យប់ថ្ងៃទី១ កញ្ញា ឆ្នាំ២០២៥ ដោយនាំគ្នារត់ឆ្លងកាត់ផ្លូវមកផ្នែកម្ខាងទៀតឈរមើលពីចម្ងាយពេលភ្លើងកំពុងឆាបឆេះពេញបន្ទុក ដោយមានអណ្ដាតភ្លើងឡើងក្រហមច្រាលទៅលើអាកាស ។
សាក្សីបានប្រាប់បន្តឱ្យដឹងទៀតថា ស្របពេលដែលភ្លើងកំពុងតែឆេះនោះហើយរោងដែលស្នាក់នៅជាប្រភេទរោងឈើដែលមានជាច្រើនបន្ទប់ សម្រាប់ឱ្យបុគ្គលិកស្រីៗស្នាក់នៅហ្នឹងមានបន្ទប់មួយសម្រាប់ផាត់មុខស្រីៗ រួចចេញបម្រើភ្ញៀវតាមបន្ទប់ខារ៉ាអូខេ ស្ថិតនៅក្បែរនោះដែលមានថៅកែតែមួយ តែមិនបានបញ្ជាក់ឈ្មោះថៅកែនោះទេ ។ មួយសន្ទុះធំក្រោយមក ទើបឃើញរថយន្តពន្លត់អគ្គិភ័យនៃអធិការដ្ឋាននគរបាលក្រុងកំពង់ចាមនិងស្នងការដ្ឋាននគរបាលខេត្ត ដោយមានជាច្រើនគ្រឿងមកអន្តរាគមបាញ់ទឹកពន្លត់ភ្លើងដែលកំពុងតែឆាបឆេះនោះ។
បើតាមសាក្សីនេះនិយាយប្រាប់ថា មូលហេតុអគ្គិភ័យដោយសារឆ្លងចរន្តអគ្គិសនី ។ សូមបញ្ជាក់ថា នៅវេលាម៉ោង៨និង ៣០នាទីយប់ថ្ងៃទី១ កញ្ញា រថយន្តពន្លត់អគ្គិភ័យជាច្រើនគ្រឿងនៅតែអន្តរាគមន៍បាញ់ទឹកពន្លត់ភ្លើង ធ្វើយ៉ាងណាកុំឱ្យឆេះរាលដាលទៅកន្លែងផ្សេងទៀត។ ជាមួយនោះ នៅតាមដងផ្លូវគេឃើញកម្លាំងនគរបាលចរាចរណ៍ច្រើននាក់ត្រូវដាក់ពង្រាយដើម្បីសម្រួលចរាចរណ៍កុំឱ្យកកស្ទះ ហើយក្នុងប្រតិបត្តិការអន្តរាគមន៍ពន្លត់ភ្លើងនេះក៏មានការចូលរួមពីកម្លាំងកងរាជអាវុធហត្ថខេត្តផងដែរ។
គិតរហូតមកដល់វេលាម៉ោង៩និង១០នាទីយប់ កម្លាំងសមត្ថកិច្ចបានគ្រប់គ្រងស្ថានការណ៍ទាំងស្រុងគឺរលត់១០០% ហើយប្រើប្រាស់ទឹកអស់ចំនួន២១រថយន្ត ។ ហើយនៅក្នុងហេតុការណ៍នេះ មិនមានអ្នកណារងរបួសនោះទេ ហើយថៅកែខារ៉ាអូខេនេះត្រូវបានសមត្ថកិច្ចបង្ហើបប្រាប់ថា ដូរពីម្នាក់ទៅម្នាក់ ។
ចែករំលែកព័តមាននេះ