ទីក្រុងបាងកក៖ គណបក្សប្រជាជនមិនទាន់សម្រេចគ្នាជាសហមតិ ឬកុងសង់ស៊ីស (consensus) នៅឡើយទេដើម្បីបោះឆ្នោតគាំទ្របេក្ខជនគណបក្សភឿថៃ ឬភូមិចៃថៃនៅសភាឱ្យក្លាយជានាយករដ្ឋមន្ត្រីទី៣២របស់ថៃ។ អ្នកនាំពាក្យគណបក្សប្រជាជន លោកផារិត ថ្លែងថាគណបក្សរបស់លោកបានពិនិត្យមើលលក្ខខណ្ឌដែលស្នើឡើងដោយគណបក្សទាំង២។ មតិផ្ទៃក្នុងមិនទាន់ឯកភាពគ្នាក៏ពិតមែន…
ទីក្រុងបាងកក៖ គណបក្សប្រជាជនមិនទាន់សម្រេចគ្នាជាសហមតិ ឬកុងសង់ស៊ីស (consensus) នៅឡើយទេដើម្បីបោះឆ្នោតគាំទ្របេក្ខជនគណបក្សភឿថៃ ឬភូមិចៃថៃនៅសភាឱ្យក្លាយជានាយករដ្ឋមន្ត្រីទី៣២របស់ថៃ។ អ្នកនាំពាក្យគណបក្សប្រជាជន លោកផារិត ថ្លែងថាគណបក្សរបស់លោកបានពិនិត្យមើលលក្ខខណ្ឌដែលស្នើឡើងដោយគណបក្សទាំង២។
មតិផ្ទៃក្នុងមិនទាន់ឯកភាពគ្នាក៏ពិតមែន ក៏ប៉ុន្តែបើសិននាយករដ្ឋមន្ត្រីចាំផ្ទះ លោកភូមិថាម វិឆាយ៉ាឆៃ សម្រេចចិត្តរំលាយសភា មានន័យថាទង្វើនេះស្របទៅតាមការចង់បានរបស់គណបក្សប្រជាជន។ ការថ្លែងដូច្នេះបន្ទាប់ពីគណបក្សភឿថៃគំរាមកាលពីម្សិលមិញថាបើគណបក្សប្រជាជនមិនព្រមបោះឆ្នោតគាំទ្របេក្ខជនរបស់ខ្លួនទេ ខ្លួននឹងរំលាយសភាចោលឱ្យអស់អំណាច និងប្រាក់ខែអ្នកតំណាងរាស្ត្រទាំងអស់គ្នាជាលក្ខណៈបាយមួយឆ្នាំងបើមិនបានបរិភោគទេ ខ្លួនឯងជាន់កម្ទេចចោល។
លោកផារិតថ្លែងបន្តទៀតថាបើមិនរំលាយសភាទេ ហើយប្រើវិធីបោះឆ្នោតជ្រើសរើសនាយករដ្ឋមន្ត្រីវិញ គណបក្សប្រជាជនសម្លឹងឃើញកង្វល់២ធំៗ។ គណបក្សប្រជាជនខ្លាចតែភឿថៃ និងភូមិចៃថៃរួមគ្នាបង្កើតរដ្ឋាភិបាលថ្មី និងដឹកនាំប្រទេសរហូតដល់ចប់អាណត្តិ គិតទៅចូល២ឆ្នាំទៀតឯណោះ។ ដូច្នេះ ផែនការរបស់គណបក្សប្រជាជនដែលចង់ឃើញសភារលាយឆាប់ៗដើម្បីបោះឆ្នោតឡើងវិញបែរជាអសារឥតការជាមិនខាន។
ចំណុចមួយទៀតដែលគណបក្សប្រជាជនព្រួយបារម្ភនោះគឺខ្លាចតែប្រទេសថៃលេងផ្លូវកាត់ តែងតាំងនាយករដ្ឋមន្ត្រីមិនតាមគន្លងប្រជាធិបតេយ្យ។ បញ្ហាកង្វល់ទាំងនេះហើយដែលធ្វើឱ្យគណបក្សប្រជាជនមិនអាចនៅស្ងៀមបានឡើយ ហើយត្រូវតែបើកផ្លូវឱ្យគណបក្សដែលកំពុងប្រជែងគ្នាទាំង២ព្យាយាមបង្កើតរដ្ឋាភិបាលដោយឯករាជ្យពីគ្នា។ លោកថាណាថន (Thanathorn) ដែលគេចាត់ទុកថាជាអ្នកកាច់ចង្កូតពីក្រោយខ្នងគណបក្សប្រជាជនថ្លែងថាបេក្ខជននាយករដ្ឋមន្ត្រីត្រូវតែជាបុគ្គលដែលផ្ដល់ទំនុកចិត្តសម្រាប់ប្រជាជន។ អ្នកនាំពាក្យគណបក្សប្រជាជនថ្លែងថានៅក្នុងចំណោមភឿថៃ និងភូមិចៃថៃគ្មានគណបក្សណាមួយគួរឱ្យជឿទុកចិត្តទេ។ ខាងលើនេះជាការដកស្រង់ប្រភពពីបាងកកប៉ុស្តិ៍, ខាវសត់ (Khaosd) និងប្រភពដទៃទៀត៕
ចែករំលែកព័តមាននេះ