ទីក្រុងការ៉ាកាស់៖ ប្រធានាធិបតីប្រទេសវេណេហ្ស៊ូអេឡា លោកម៉ាឌូរ៉ូ (Nicholas Maduro) ព្រមានថាលោកនឹងប្រកាសដាក់ប្រទេសជាតិនៅក្នុងស្ថានភាពសង្គ្រាមបើកងទ័ពអាមេរិកដែលបញ្ជូនទៅឈរជើងនៅសមុទ្រការីប៊ីនចាប់ផ្ដើមវាយប្រហារប្រទេសរបស់លោក។ លោកម៉ាឌូរ៉ូថ្លែងថានៅក្នុងស្ថានភាពដែលប្រទេសវេណេហ្ស៊ូអេឡាកំពុងទទួលរងសម្ពាធផ្នែកយោធាជាអតិបរមាបែបនេះ រដ្ឋាភិបាលបានប្រកាសត្រៀមខ្លួនដល់កម្រិតខ្ពស់បំផុតដើម្បីការពារជាតិមាតុភូមិរបស់ខ្លួន។
ម៉ាឌូរ៉ូចាត់ទុកថាការដាក់ពង្រាយនាវាចម្បាំងដ៏សម្បើមរបស់អាមេរិកនៅការីប៊ីន (Caribbean) មានន័យស្មើនឹងការគំរាមកំហែងឥតសមហេតុផល, អសីលធម៌ និងដ៏បង្ហូរឈាម។ ការថ្លែងរបស់ម៉ាឌូរ៉ូចំពេលដែលទីក្រុងវ៉ាស៊ីនតោនត្រៀមបញ្ជូនកងទ័ព និងអាវុធយុទ្ធភ័ណ្ឌបន្ថែមទៀតទៅឈរជើងនៅសមុទ្រការីប៊ីន។ គោលដៅធំរបស់អាមេរិកមិនមែនទៅឈ្លានពានអ្នកណាទេ គឺទៅចាត់ការពួកឈ្មួញគ្រឿងញៀន ឬពួកកាថែល (cartel)។
រហូតមកដល់ពេលនេះ អាមេរិកពុំដែលបង្ហាញសញ្ញាណាមួយថានឹងលើកកងទ័ពចូលលុកលុយប្រទេសទាំងនោះទេ។ ប៉ុន្តែលោកម៉ាឌូរ៉ូមិនអាចមើលស្រាលស្ថានការណ៍នេះបានឡើយ។ លោកបានចល័តកងទ័ពដើម្បីដាក់ពង្រាយនៅតាមតំបន់មាត់សមុទ្រ និងនៅតាមព្រំដែនជាប់នឹងប្រទេសកូឡុំប៊ី។ ម៉ាឌូរ៉ូថែមទាំងអំពាវនាវឱ្យប្រជាជនចូលរួមជាមួយកងប្រជាការពារផងដែរ។
រដ្ឋាភិបាលអាមេរិកថ្លែងថាខ្លួននឹងបញ្ជូនទ័ពថែមទៀតទៅដាក់ក្បែរប្រទេសវេណេហ្ស៊ូអេឡាដើម្បីចាត់ការក្រុមកាថែលដែលរត់ពន្ធគ្រឿងញៀនចេញពីតំបន់នោះ។ ទោះបីអាមេរិកប្រកាសថាខ្លួនចង់ចាត់ការតែពួកឈ្មួញគ្រឿងញៀន ប៉ុន្តែម៉ាឌូរ៉ូមិនអាចស្ងប់ចិត្តបានឡើយ។ ម៉្លោះហើយគាត់តែងតែឧស្សាហ៍និយាយជារឿយៗថាអាមេរិកនៅតែចិញ្ចឹមចិត្តចង់ផ្ដួលរំលំរបបដឹកនាំរបស់គាត់។ គាត់បានបញ្ជូនកងទ័ព១៥០០០នាក់ទៅឈរជើងនៅតាមព្រំដែនប្រទេសកូឡុំប៊ី។
គ្រឿងសព្វាវវុធដែលអាមេរិកបានបញ្ជូនទៅសមុទ្រការីប៊ីនមានដូចជានាវាចម្បាំងដែលអាចបាញ់មីស៊ីលបំពាក់ប្រព័ន្ធបញ្ជាពីចម្ងាយ, នាវាមុជទឹកនុយក្លេអ៊ែរ, នាវាពិឃាត, នាវាចម្បាំង និងនាវាដឹកជញ្ជូនកងទ័ពឡើងគោក។ ចំនួនកងទ័ពអាមេរិកដែលបញ្ជូនទៅនោះមានជិត៤៥០០នាក់។ ក្នុងនោះ ទ័ពម៉ារីនមានជាង២ពាន់នាក់។ គោលដៅធំរបស់អាមេរិកដូចជម្រាបជូនខាងលើនេះអីចឹងគឺថាដើម្បីចាត់ការក្រុមជួញដូរគ្រឿងញៀន។ ប៉ុន្តែយុទ្ធនាការបង្ក្រាបគ្រឿងប្រើប្រាស់សុទ្ធតែនាវានុយក្លេអ៊ែរបែបនេះធ្វើឱ្យលោកម៉ាឌូរ៉ូដែលតែងតែមានទំនាស់ជាមួយអាមេរិកនៅមិនស្រណុកខ្លួនប៉ុន្មានទេ។ ខាងលើដកស្រង់ប្រភពពីញូស្វីក (Newsweek) និងប្រភពដទៃទៀត៕
ចែករំលែកព័តមាននេះ