រាជធានីភ្នំពេញ ៖ អ្នកនាំពាក្យរាជរដ្ឋាភិបាលកម្ពុជា បានអំពាវនាវដល់ប្រជាពលរដ្ឋ ឲ្យប្រយ័ត្នចំពោះសកម្មភាព ដែលអាចធ្វើឲ្យថៃចោទថា មិនគោរពបទឈប់បាញ់ ខណៈថ្នាក់ដឹកនាំ កំពុងខិតខំប្រើយន្តការច្បាប់ ដើម្បីដោះស្រាយបញ្ហាព្រំដែនជាមួយថៃ…
រាជធានីភ្នំពេញ ៖ អ្នកនាំពាក្យរាជរដ្ឋាភិបាលកម្ពុជា បានអំពាវនាវដល់ប្រជាពលរដ្ឋ ឲ្យប្រយ័ត្នចំពោះសកម្មភាព ដែលអាចធ្វើឲ្យថៃចោទថា មិនគោរពបទឈប់បាញ់ ខណៈថ្នាក់ដឹកនាំ កំពុងខិតខំប្រើយន្តការច្បាប់ ដើម្បីដោះស្រាយបញ្ហាព្រំដែនជាមួយថៃ ។
ថ្លែងក្នុងសន្និសីទសារព័ត៌មាន នារសៀលថ្ងៃទី២៦ ខែសីហា ឆ្នាំ២០២៥ លោក ប៉ែន បូណា អ្នកនាំពាក្យរាជរដ្ឋាភិបាល បានលើកឡើងថា ៖ «ខ្ញុំសូមកោតសរសើរចំពោះប្រជាពលរដ្ឋគ្រប់ទិសទី ដែលបានក្រោកឈរឡើង ដើម្បីការពារអធិបតេយ្យភាព បូរណភាពទឹកដី ក្រោមស្មារតីសន្តិភាពនិយម ដែលជាអត្តសញ្ញាណរបស់កម្ពុជា។ ទឹកចិត្តស្នេហាជាតិ និងស្មារតីសាមគ្គីជាធ្លុងមួយរបស់ប្រជាពលរដ្ឋខ្មែរ បានក្លាយជាចលករដ៏ខ្លាំងក្លា ដែលគ្មានឥទ្ធិពលអ្វីមកអាចបំបែកបានឡើយ» ។
អ្នកនាំពាក្យ បានបញ្ជាក់ថា៖ «ទន្ទឹមនឹងនេះ សូមបងប្អូនយើងរក្សាស្មារតីឲ្យបាននូវសន្តិភាពនិយម និងអហិង្សា តាមរយៈទឹកចិត្តស្នេហាជាតិ ដោយប្រើបញ្ញាជាងប្រើអារម្មណ៍ ដើម្បីជៀសវាងធ្លាក់ក្នុងអន្ទាក់ នៃការញុះញង់ បំបែកបំបាក់មហាសាមគ្គីជាតិខ្មែរពីសំណាក់អមិត្តកម្ពុជា (ថៃ) ពិសេសការប៉ុនប៉ង បំបែកកម្លាំងប្រជាពលរដ្ឋពីរាជរដ្ឋាភិបាល និងពីកម្លាំងប្រដាប់អាវុធ ដែលជាខឿនការពារជាតិដ៏រឹងមាំ» ។
ជាមួយគ្នានេះដែរ អ្នកនាំពាក្យរាជរដ្ឋាភិបាល ក៏បានលើកឡើងថា ពេលនេះ គឺជាការអនុវត្តបទឈប់បាញ់ ហើយកម្ពុជាបានគោរពកិច្ចព្រមព្រៀងបានយ៉ាងល្អ ដែលចាត់ទុកថា ជាភាពខ្លាំងរបស់កម្ពុជា នៅលើសមរភូមិ ដែលត្រូវថែរក្សាឲ្យបាន។ ដើម្បីបំផ្លាញភាពខ្លាំង ដែលកម្ពុជាទទួលបាននៅពេលនេះ ថៃបានញុះញង់គ្រប់រូបភាព ដោយបានរៀបចំឡើង ដើម្បីឲ្យកម្ពុជាអស់ភាពអត់ធ្មត់ ដោយឈានដល់ការប្រព្រឹត្តអំពើណាមួយ ដែលប្រើកំហឹងទល់នឹងកំហឹង ដែលគេអាចប្រើជាលេសក្នុងការចោទប្រកាន់ថា កម្ពុជាជាអ្នកវាយប្រហារមុន ។
លោកបានគូសបញ្ជាក់បន្ថែមថា ៖ «នេះជាអន្ទាក់ដ៏គ្រោះថ្នាក់ ដែលបងប្អូនយើង គប្បីប្រុងប្រយ័ត្នខ្ពស់។ សូមបងប្អូនចងចាំថា បទឈប់បាញ់នេះ ផ្តួចផ្តើមឡើងដោយប្រធានាធិបតីអាមេរិក ដោយចូលរួមយ៉ាងសកម្មពីចិន និងយកចិត្តទុកដាក់ពីម៉ាឡេស៊ី» ៕
ចែករំលែកព័តមាននេះ