ប្រទេសថៃ ៖ ទិន្នន័យពីសហព័ន្ធឧស្សាហកម្មថៃ ហៅកាត់ថា FTI កាលពីថ្ងៃទី២៥ ខែសីហា ឆ្នាំ២០២៥ បានបង្ហាញថា ផលិតកម្មរថយន្តរបស់ប្រទេសថៃបានធ្លាក់ចុះជាលើកដំបូងក្នុងរយៈពេល៣ខែក្នុងខែកក្កដា…
ប្រទេសថៃ ៖ ទិន្នន័យពីសហព័ន្ធឧស្សាហកម្មថៃ ហៅកាត់ថា FTI កាលពីថ្ងៃទី២៥ ខែសីហា ឆ្នាំ២០២៥ បានបង្ហាញថា ផលិតកម្មរថយន្តរបស់ប្រទេសថៃបានធ្លាក់ចុះជាលើកដំបូងក្នុងរយៈពេល៣ខែក្នុងខែកក្កដា ដោយសារតែភាពមិនប្រាកដប្រជានៃពាណិជ្ជកម្មសកល កំពុងតែរារាំងដល់ការនាំចេញ។ នេះបើយោងតាមប្រភពពីទីភ្នាក់ងារព័ត៌មានចិន ស៊ីនហួ និង The Star របស់ម៉ាឡេស៊ីបានចេញផ្សាយនៅថ្ងៃទី២៦ ខែសីហា។
របាយការណ៍ពី FTI បង្ហាញថា បណ្តាក្រុមហ៊ុនរបស់ថៃបានផលិតរថយន្តចំនួន ១១០ ៦១៦គ្រឿង កាលពីខែមុន ពោលធ្លាក់ចុះ ១១,៣៩% ធៀបនឹងឆ្នាំមុន ហើយផ្ទុយពីការកើនឡើង ១១,៩៨% កាលពីខែមិថុនា។ លោក Surapong Paisitpattanapong អ្នកនាំពាក្យ FTI Automotive Industry Club បានឱ្យដឹងថា ការធ្លាក់ចុះនេះ ត្រូវបានកត់សម្គាល់ចំពោះរថយន្តអ្នកដំណើរប្រើសាំងដែលបានធ្លាក់ចុះ ៣១,៨% ពីមួយឆ្នាំទៅមួយឆ្នាំ។ លោកបានប្រាប់សន្និសីទសារព័ត៌មានមួយថា ទោះជាយ៉ាងណាក៏ដោយ រថយន្តអគ្គិសនីសុទ្ធ (EVs) បានឃើញការកើនឡើងច្រើនជាង៥ដង ខណៈក្រុមហ៊ុនផលិតបានបង្កើនការផលិតរបស់ពួកគេ ដោយសារតែការកាត់បន្ថយពន្ធ និងការឧបត្ថម្ភធនរបស់រដ្ឋាភិបាល។
លោកបានអះអាងថា សម្រាប់រយៈពេល៧ខែដំបូងនៃឆ្នាំ ២០២៥ ការផលិតរថយន្តបានធ្លាក់ចុះ ៥,៧៣% ធៀបនឹងឆ្នាំមុន មកនៅត្រឹម ៩៣៥ ៣៣១គ្រឿង បើទោះជាមានការកើនឡើងខ្លាំងសម្រាប់ទាំងរថយន្តអគ្គិសនីសុទ្ធ និងរថយន្តកូនកាត់ Plug-in Hybrid EVs យ៉ាងណាក៏ដោយ។
ការលក់រថយន្តក្នុងស្រុកបានកើនឡើងក្នុងរយៈពេល៤ខែជាប់ៗគ្នាត្រឹមខែកក្កដា ពោលកើនឡើង ៥,៨៤% ពីមួយឆ្នាំទៅមួយឆ្នាំ រហូតដល់ ៤៩ ១០២គ្រឿង ដែលបានបង្កើនល្បឿនផលិតពីការកើនឡើង ៥,០៧% កាលពីខែមុន ទោះបីជាលក្ខខណ្ឌផ្តល់ប្រាក់កម្ចីដ៏តឹងរ៉ឹងបានបន្តរារាំងការលក់រថយន្តភីកអាប់ (Pickup) ចំពេលសេដ្ឋកិច្ចថៃធ្លាក់ចុះយ៉ាងណាក៏ដោយ។
កាលពីខែមុន FTI បានទម្លាក់កម្រិតគោលដៅផលិតកម្មរថយន្តប្រចាំឆ្នាំ២០២៥ របស់ខ្លួន មកនៅត្រឹម ១,៤៥លានគ្រឿងពី ១.៥លានគ្រឿង ដែលបានរំពឹងទុកកាលពីមុន ដោយសារតែវិធានការពន្ធគយរបស់សហរដ្ឋអាមេរិក និងវិបត្តិសេដ្ឋកិច្ចក្នុងចំណោមដៃគូពាណិជ្ជកម្មបាននាំឱ្យមានការថយចុះការទិញអ្នកប្រើប្រាស់ និងការលក់រថយន្ត៕
ចែករំលែកព័តមាននេះ